ހުޅުމާލެ ފޭސް 2 ގެ ހިޔާގެ އަށް ޓަވަރަކުން ފެނުގެ ހިދުމަތް މެދުކެނޑިއްޖެ އެވެ.

އެމްޑަބްލިއުއެސްސީން ބުނީ ހިޔާ ޓަވަރު 1 އިން 8 އަށް ފެނުގެ ހިދުމަތް މެދުކެނޑުނީ ހިޔާ ފްލެޓްތަކަށް ފެން ފޯރުކޮށްދޭ ބޫސްޓާ ޕަމްޕް ސިސްޓަމަށް ދިމާވި ކަރަންޓު މައްސަލައަކާ ގުޅިގެން ކަމަށެވެ.

އެ މައްސަލަ ހައްލުކޮށް ވީހާވެސް އަވަހަށް ފެނުގެ ހިދުމަތް ދޭން މަސައްކަތް ކުރަމުން އަންނަ ކަމަށް އެ ކުންފުނިން ބުންޏެވެ.

ހުކުރު ދުވަހު ވެސް ހިޔާގެ ޓަވަރު 1 އިން 8 އަށް ފެނުގެ ހިދުމަތް މެދުކެނޑުނެވެ. އެފަހަރު އެމްޑަބްލިއުއެސްސީން ބުނީ ފެނުގެ ހިދުމަތް މެދުކެނޑުނީ އެ ސަރަހައްދުގެ ފެނުގެ ވިއުގައަށް ދިމާވި ކުއްލި މައްސަލައަކާ ގުޅިގެން މެއިންޓަނަންސް މަސައްކަތްތަކެއް ކުރުމަށް ކަމަށެވެ.

އެ ދުވަހު ފެނުގެ ހިދުމަތް އަނބުރާ ދިނީ، ހިދުމަތް ކެނޑުނުތާ ގިނަ އިރުތަކެއް ފަހުންނެވެ.

ހިޔާގެ ޓަވަރު 1 އިން 8 އަށް ދިރިއުޅޭ މީހުން އަންނަނީ ކުއްލިއަކަށް ފެނުގެ ހިދުމަތް ކެނޑޭތީ ދަތިތައް ކުރިމަތިވެ، އާންމު ދިރިއުޅުމަށް އަސަރު ކުރާ ކަމަށް ބުނެ ޝަކުވާ ކުރަމުންނެވެ.