ރާއްޖޭގައި މަރުވި ނޭޕާލްއަށް ނިސްބަތްވާ ކަންޗަން ޑަންގަލް، 25، ގެ ހަށިގަނޑާ ހަވާލުވާނެ ބަޔަކު ނެތި 29 ދުވަސް ގަލޮޅު މޯޗަރީގައި ބޭއްވުމަށްފަހު ގައުމަށް ފޮނުވާލައިފި އެވެ.

ފުލުހުން ބުނީ ކަންޗަންގެ ހަށިގަނޑު އޭނާގެ ގައުމަށް ފޮނުވީ ޖެނުއަރީ 7، ގަ އެވެ. އޭނާގެ ހަށިގަނޑާ ސްޕޮންސަރުގެ ފަރާތުން ހަވާލުވެފައި ނުވާތީ، އަނބުރާ ގައުމަށް ފޮނުވީ ނޭޕާލް އެމްބަސީއާ މަޝްވަރާތައް ކުރުމަށްފަހު އެވެ.

މިދިޔަ ޑިސެމްބަރު 9، ގެ ހެނދުނު ކަންޗަން އައިޖީއެމްއެޗް ހޮސްޕިޓަލުގެ އީއާރަށް ގެންދިޔައީ ވަރަށް ބޮޑަށް ބަނޑުގައި ރިއްސާތީ ކަމަށާއި އޭނާ ހޮސްޕިޓަލަށް ގެނައި މަގުމަތީ ހަބަރު ހުސްވި ކަމަށް ފުލުހުން ބުންޏެވެ.

"އަދަދު" އަށް އެނގިފައިވާ ގޮތުގައި ކަންޗަން މަރުވިއިރު އިނީ ބަލިވެ އެވެ. މަރުވުމުގެ ކުރީ ދުވަހު ވެސް އޭނާގެ ޓިކްޓޮކް އެކައުންޓަށް ފޮޓޯއެއް ލާފައިވެ އެވެ.

ފުލުހުން ބުނީ މެޑިކޯ ލީގަލް ރިޕޯޓުން ކަންޗަން މަރުވި ސަބަބު އެނގިފައި ނުވާއިރު، އޭނާއަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަ ކުރެވިފައި ނުވާ ކަމަށެވެ.

ނަމަވެސް އޭނާއަކީ އެނީމިއާގެ މެޑިކަލް ހިސްޓްރީއެއް އޮންނަ މީހެއްކަން އެނގިފައިވާ ކަމަށް ފުލުހުން ބުންޏެވެ.

އޭނާގެ ކުއްލި މަރުގެ ތަހުގީގު ކުރަމުންދާ ކަމަށް ފުލުހުން ބުނެފައިވެ އެވެ. ނަމަވެސް އެ މަރުގައި ޝައްކު އުފެދޭ ކަންކަން ހުރި ކަމެއް ފުލުހުން ހާމަކޮށްފައެއް ނުވެ އެވެ.