މަސައްކަތެއް ނެތް ކަމަށް ބުނެ އެމްޓީސީސީގެ މުވައްޒަފަކު ވަކިކުރި މައްސަލައެއް ފެންމަތިވެއްޖެ އެވެ.

ށ. މާއުނގޫދޫގައި އެމްޓީސީސީގެ އެޑްމިން މުވައްޒަފެއްގެ ގޮތުގައި މަސައްކަތް ކުރަމުންދާ އިބްރާހިމް ރަޝާދު ވަކިކުރީ މިދިޔަ ޑިސެމްބަރު 22، ގައި މަސައްކަތުގައި ހުއްޓަ އެވެ.

އެމްޓީސީސީން އިބްރާހިމް ރަޝާދު ވަޒީފާއިން ވަކިކޮށް ފޮނުވި ލިޔުމުގައި ވަކިކުރި ސަބަބަކަށް ބަޔާންކުރީ އޭނާ މަސައްކަތް ކުރަމުންދާ މާއުނގޫދޫގައި އެމްޓީސީސީން ކުރަމުންދާ މަސައްކަތް ހުއްޓި ގިނަ ދުވަސްތަކެއް ވެފައިވާތީ، ސައިޓުގައި ހަވާލުކުރެވޭނެ މަސައްކަތެއް ނެތް ކަމަށް ބުނެ އެވެ.

"ސައިޓުތަކުގެ ވަޒީފާތަކަށް ނަގާ މުވައްޒަފުން އެ ސައިޓެއްްގެ މަސައްކަތް ނިމުމުން ނުވަތަ ސައިޓް އައިޑަލްވުމުން އެ ފަރާތަކާއި އެކު ވެފައިވާ ވަޒީފާ އެއްބަސްވުން ނިމުމަކަށް ގެނެވޭ،" އެމްޓީސީސީން ބުންޏެވެ.

ނަމަވެސް އިބްރާހިމް ރަޝާދު "އަދަދު" އަށް ބުނީ އެ ރަށުގެ ބަނދަރުގެ މަސައްކަތަށް ބޭނުންވާ އެޑްމިން މަސައްކަތްތައް ވަޒީފާއިން ވަކިކުރުމާ ހަމައަށް ކުރަމުން ގޮސްފައިވާ ކަމަށާއި ކުއްލިއަކަށް ވަޒީފާއިން ވަކިކުރި ސަބަބެއް މިހާތަނަށް އެނގިފައި ނުވާ ކަމަށެވެ.

"ވަޒީފާއިން ވަކިކުރި ސަބަބެއް މިހާތަނަށް އެނގިފައެއް ނުވޭ. އެހީމަ ނުއެއް ބުނޭ. ވަޒީފާއިން ވަކިކުރުމުގެ ކުރިން ފިންގާ ކަނޑާލީ. ފަހުން ރަސްމީކޮށް ލިޔުމުން އެންގިފަހުން ވަޒީފާއަށް ނުދަން. އެއީ މިދިޔަ ޑިސެމްބަރު 22، އިން ފެށިގެން،" އޭނާ ބުންޏެވެ.

އިބްރާހިމް ރަޝާދު ބުނީ ވަޒީފާއިން ވަކި ކުރުމުގެ ކުރިން މިދިޔަ ޑިސެމްބަރު 9، ގައި އޭނާގެ އެއްބަސްވުން އިތުރު ހަ މަހަށް އިތުރު ވެސް ކުރި ކަމަށާއި ވަޒީފާއިން ވަކިކުރަން ނިންމާފައިވާނަމަ އެއްބަސްވުން އާނުކޮށް ދޫކޮށްލިނަމަ ވެސް މާ ރަނގަޅުވީސް ކަމަށެވެ.

އޭގެއިތުރުން އިބްރާހިމް ރަޝާދު ބުނީ ވަޒީފާއިން ވަކިކުރި ފަހުން އެމްޓީސީސީން އޭނާއަށް ގުޅައި ހުރާއަށް ބަދަލުވާން އެންގި ކަމަށެވެ. ނަމަވެސް އެގޮތަށް އެއްބަސް ނުވީ ހާލަތު މިވަގުތު ހުރި ގޮތުން އެހެން ރަށަކަށް ދެވެން ނެތުމުން ކަމަށެވެ.

"މިދިޔަ މަހު ކުރީކޮޅު ވަޒީފާގެ އެއްބަސްވުން އިތުރު ހަ މަހަށް އިތުރު ކުރި. އެހެންވީމަ ކީއްވެ ކަމެއް ނޭގެ ފަހުން އަނެއްކާ ވަކި މިކުރީ. ހުރާއަށް ބަދަލުވާން ގުޅި. އެކަމަކު ހާލަތު މިވަގުތު ހުރި ގޮތުން އެގޮތަށް އެއްބަހެއް ނުއެއް ވަން،" އޭނާ ބުންޏެވެ.

ސަރުކާރު މުވައްޒަފުންތައް ކުއްލި ގޮތަކަށް ވަޒީފާއިން ވަކިކުރާ މައްސަލަ ފަހަކަށް އައިސް އަންނަނީ ބޮޑުވަމުންނެވެ. އެގޮތުން މިދިޔަ އަހަރު އެކި ރަށްރަށުގެ ޕްރޮޖެކްޓްތަކަށް ފެނަކައިން ނަގާފައި ތިބި ގިނަ އައަދެއްގެ މުވައްޒަފުން އެއްފަހަރާ ވަކިކުރި އެވެ.

ވަޒީފާއިން ވަކިކުރި ބައެއް މުވައްޒަފުން ކުރިން މި ނޫހަށް ބުނެފައިވާ ގޮތުގައި އެގޮތަށް ތަފާތުކޮށް، ވަޒީފާއިން ވަކިކުރަނީ ސިޔާސީ ފިކުރަށް ބެލުމަށްފަހު، ސަރުކާރަށް ތާއީދު ނުކުރާތީ ކަމަށެވެ.