އެމެރިކާގެ ނިއު އޯލެންސްގައި މީހުން ބައިބޯވެފައި އޮތް ސަރަހައްދަކަށް ބާރު ސްޕީޑުގައި ޓްރަކެއް ވަދެ، 15 މީހަކު މަރާލައި، 30 އަށް ވުރެ ގިނަ މީހުން ޒަހަމް ކޮށްލައިފި އެވެ.

ނިއު އޯލެންސްގެ ފުލުހުންނާ ހަވާލާދީ އަލްޖަޒީރާއިން ބުނީ ޓްރަކު ދުއްވި މީހާ މަސައްކަތްކުރީ ވީހާވެސް ގިނަ ބައެއް ގައިގައި ޓްރަކުން ޖެއްސުމަށް ކަމަށެވެ.

އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ހާމަކުރި ގޮތުގައި ޓްރަކް ދުއްވަން ހުރީ އެމެރިކާގެ ޓެކްސަސްއަށް ނިސްބަތްވާ ޝަމްސުއްދިން ޖައްބާރު، 42 އެވެ.

ޝަމްސުއްދީން ޑްރަކް ދުއްވިއިރު ހުރީ މަސްތުގެ ހާލަތުގައި ކަމަށް ނުބެލެވޭ ކަމަށް ނިއު އޯލެންސްގެ ފުލުހުން ބުންޏެވެ.

މީހުންގެ ގައިގައި ޓްރަކް ޖައްސަމުން ދަނިކޮށް ވެހިކަލެއްގައި ޖެހި ހުއްޓުމުން، ޝަމްސުއްދީން ވަނީ އޭނާ އަތުގައި އޮތް ބަޑިން ފުލުހުންނަށް ހަމަލާ ދިނެވެ. ރައްދުގައި ފުލުހުން ދިން ހަމަލާގައި އޭނާ މަރައިލި އެވެ.

ޝަމްސުއްދީން ޖެހި ބަޑިން ދެ ފުލުހަކަށް އަމާޒުވެ ހޮސްޕިޓަލުގައި ދަނީ ފަރުވާ ދެމުންނެވެ. ނަމަވެސް އެ ދެ މީހުންގެ ހާލު ރަނގަޅު ކަމަށް ނިއު އޯލެންސް ފުލުހުން ބުންޏެވެ.

އެ ހަމަލާ ޝަމްސުއްދީން ދޭން ޖެހުނު ސަބަބު ދެނެގަތުމުގެ މަސައްކަތް އެފްބީއައިން އަންނަނީ ކުރަމުންނެވެ. އެއީ ޓެރެރިސްޓް ޖަމާއަތަކާ ގުޅުން އޮތް ހަމަލާއެއްތޯ ވެސް ދެނެގަންނަމުންދާ ކަމަށް އެފްބީއައިން ވަނީ ބުނެފަ އެވެ.