މި ހިނގާ ޑިސެމްބަރު މަހު ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް 150 އަށްވުރެ ގިނަ ޕްރައިވެޓް ޖެޓު ޖެއްސި ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނެފި އެވެ.

އެމްއޭސީއެލްއިން ބުނީ މި މަހުގެ ތެރޭގައި ވީއައިއޭއަށް ޖެއްސީ ޖެޓުތަކުގެ އަދަދަކީ މިދިޔަ އަހަރާ އަޅާބަލާއިރު އަށް ޕަސަންޓުގެ އިތުރުވުމެއް ކަމަށެވެ.

ރާއްޖެ އަންނަ ފްލައިޓްތައް އިތުރުވެ ވީއައިއޭއަށް ބާރުބޮޑުވުމުގެ ސަބަބުން، އެމްއޭސީއެލްއިން ވަނީ ފުރަންދާ މީހުން ޗެކިން ގަޑިއަށްވުރެ އަވަހަށް އެއާޕޯޓަށް ދިޔުމަށް އިލްތިމާސް ކޮށްފަ އެވެ.

ކޮންމެ އަހަރެއްގެ ޑިސެމްބަރާ ދިމާކޮށް ރާއްޖެއަށް އަންނަ ޕްރައިވެޓް ޖެޓުތަކުގެ ނިސްބަތް ބޮޑުތަނުން އިތުރުވެގެންދެ އެވެ.

ރާއްޖެ އަންނަ ފަތުރުވެރިންގެ އަދަދު ބޮޑުތަނުން އިތުރުވެ، މީގެ ތިން ދުވަސް ކުރިން ރާއްޖެއިން ވަނީ މި އަހަރުގެ ދެ މިލިއަން ވަނަ ފަތުރުވެރިޔާއަށް ވެސް މަރުހަބާ ކިޔާފަ އެވެ. މިއީ ރާއްޖެއަށް ދެ މިލިއަނަށްވުރެ ގިނަ ފަތުރުވެރިން ޒިޔާރަތްކުރި ފުރަތަމަ ފަހަރެވެ.

އެއާޕޯޓުތަކުން ފުރާ ފަސިންޖަރުންގެ އަތުން ނަގާ ފީ އާއި ޓެކުހުގެ ގާނޫނަށް ގެނައި ބަދަލުގެ ދަށުން، މި މަހުން ފެށިގެން ޑިޕާޗާ ޓެކްސް އާއި އެއާޕޯޓު ޑިވެލޮޕްމަންޓް ފީތައް ވަނީ ބޮޑުކޮށްފަ އެވެ.