މިލާން (ޑިސެމްބަރު 30) - އިޓާލިއަން ލީގުގައި ރޭ ކުޅުނު މެޗުތަކުން އޭސީ މިލާނާއި ޔުވެންޓަސް އަށް ވެސް މޮޅެއް ނުލިބި ޕޮއިންޓަކުން ފަރުޖައްސާލަން ޖެހިއްޖެ އެވެ.

ޔުވެންޓަސް އިން ފިއޮރެންޓީނާއާ ކުޅުނު މެޗު ނިމުނީ 2-2 އިން އެއްވަރުވެގެންނެވެ. މިލާނުން ރޯމާއާ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.

ލީގު ތާވަލަށް ބަލާއިރު، ފަސް ވަނައިގައި އޮތް ފިއޮރެންޓީނާ އާއި ހަ ވަނައިގައި އޮތް ޔުވެންޓަސް އަށް ލިބިފައިވަނީ 32 ޕޮއިންޓެވެ. ފިއޮރެންޓީނާ އިން 18 މެޗު ކުޅެފައިވާއިރު، ޔުވެންޓަސް އިން ކުޅުނީ 17 މެޗެވެ. މިލާން އަށް ވަނައިގައި އޮތީ 17 މެޗުން 27 ޕޮއިންޓް ހޯދައިގެންނެވެ. ލީގުގެ އެއް ވަނައިގައި އޮތް އެޓަލަންޓާ އާއި ދެ ވަނައިގައި އޮތް ނަޕޯލީ އަށް ވަނީ 18 މެޗުން 41 ޕޮއިންޓް ލިބިފަ އެވެ. ތިން ވަނައިގައި އޮތް އިންޓަ މިލާނަށް 17 މެޗުން ވަނީ 40 ޕޮއިންޓް ލިބިފަ އެވެ.

ޔުވެންޓަސްގެ ކެޕްރެން ތުރާމް އެ ޓީމަށް ލީޑުނަގައިދީފައިވަނިކޮށް ފުރަތަމަ ހާފު ނިމުމުގެ ކުރިން ފިއޮރެންޓީނާ އިން އެއްވަރުކުރީ މޮއިސޭ ކީން ޖެހި ގޯލުންނެވެ. ދެ ވަނަ ހާފު ފަށައިގެން ތިން ވަނަ މިނިޓްގައި ތުރާމް ވަނީ ދެ ވަނަ ފަހަރަށް ޔުވެންޓަސް އަށް ލީޑުނަގައިދީފަ އެވެ. މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ވަނިކޮށް، ފިއޮރެންޓީނާ އިން އެއްވަރުކުރީ ކީން ދިން ބޯޅައަކުން ރިކާޑޯ ސޮޓީލް ޖެހި ގޯލުންނެވެ.

މިލާން ދަނޑުގައި ރޭ 16 ވަނަ މިނިޓްގައި ޓިޖާނީ ރައިންޑާސް ވަނީ ގޯލެއް ޖަހައި، އެ ޓީމަށް ލީޑުނަގައިދީފަ އެވެ. އެކަމަކު، މާ ގިނައިރު ލީޑުގައި އޮވެވޭ ގޮތެއްނުވި އެވެ. މިލާނަށް ލީޑުފުޅާކޮށްދޭން އަލްވާރޯ މޮރާޓާ އަށް ލިބުނު ފުރުސަތުގެ ބޭނުންނުހިިފި ިދިޔަތާ މާ ލަސްތަކެއް ނުވެ، މެޗުގެ 23 ވަނަ މިނިޓްގައި، ޕައޮލޯ ޑިބާލާ ވަނީ ގޯލެއް ޖަހައި، ރޯމާ އަށް އެއްވަރުކޮށްދީފަ އެވެ.