ޓިއުރިން (މާޗް 3) - އިޓަލީގެ ވަރުގަދަ ދެ ބާރު ކަމަށްވާ ޔުވެންޓަސް އާއި އިންޓަ މިލާނުން ލިވަޕޫލަށް ކުޅެމުން އަންނަ ބްރެޒިލްގެ ގޯލްކީޕަރު، އެލިސަން ބެކާ އަށް ބިޑްކުރަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ،

އުމުރުން 33 އަހަރުގެ އެލިސަން، ލިވަޕޫލާ އެކު ހަދާފައި އޮތް ކޮންޓްރެކްޓް އޮތީ އަންނަ އަހަރުގެ ޖޫން މަހުގެ ނިޔަލަށެވެ. އާ ކޮންޓްރެކްޓެއްގެ ވާހަކަ އަދި މިހާތަނަށް އެލިސަން އާއި ލިވަޕޫލާ ދެމެދު ދެކެވިފައި ނުވި ނަމަވެސް، އޭނާ ވަނީ އެ ކްލަބްގައި މަޑުކުރަން ބޭނުންވާ ކަމަށް ބުނެފަ އެވެ.

ލިވަޕޫލުން އެލިސަން ގަތީ 2018 ވަނަ އަހަރު އިޓަލީގެ ރޯމާ އަށް 80 މިލިއަން ޑޮލަރު ދައްކައިފަ އެވެ. މިހާތަނަށް ލިވަޕޫލާ އެކު، ކްލަބެއްގައި ހުރެ ލިބޭނެ ބޮޑު ހުރިހާ ކާމިޔާބެއް އެލިސަން ވަނީ ހޯދައިފަ އެވެ. އެ ޓީމަށް ޖުމްލަ އެކު، 328 މެޗު އެލިސަން ވަނީ ކުޅެދީފަ އެވެ.

ރިޕޯޓްތައް ބުނާގޮތުން، އެލިސަންއާ އެކު ލިވަޕޫލުން ވަރަށް އަވަހަށް އާ އެއްބަސްވުމުގެ ވާހަކަތައް ފެށުމުގެ ފުރުސަތު ބޮޑެވެ. އެކަމަކު، މި ސީޒަނަށް ފަހު، އެލިސަން ގަންނަން ޔުވެންޓްސް އާއި އިންޓަ އިން ބޮޑު ބިޑެއް ކޮށްފިނަމަ، ލިވަޕޫލުން އެ ހުށަހެޅުމަކާ މެދު މަޝްވަރާކުރާނެ ކަމަށް އިޓަލީގެ ނޫސްތަކުން ރިޕޯޓްކުރެ އެވެ.

އެލިސަން ވަނީ ލިވަޕޫލްގައި މަޑުކުރުމަށްޓަކައި، ސައުދީ ޕްރޮފެޝަނަލް ލީގު (ޕްރޯ ލީގު)ގެ އަލް ނަސްރުގެ ބޮޑު އޮފާއެއް ދޫކޮށްލައިފަ އެވެ.