މެލްބާން، އޮސްޓްރޭލިއާ (ޑިސެމްބަރު 29) - ޓެނިހުގެ ދުނިޔޭގެ ރޭންކިންގެ އެންމެ ކުރީގައި އޮތް ކުޅުންތެރިންގެ މަނާބޭހުގެ މައްސަލަތަކަކީ ކުރިއެރުމަށް ބަލާއިރު ޓެނިސް އަށް ރަނގަޅު ކަމެއް ނޫން ކަމަށް އޮސްޓްރޭލިއާގެ ޓެނިސް ތަރި، ނިކް ކިރްގިއޯސް ބުނެފި އެވެ.

ދުނިޔޭގެ ޓެނިސް ކުޅުންތެރިންގެ ފިރިހެނުންގެ އެއް ވަނައިގައި މި ވަގުތު އޮތް އިޓަލީގެ ޖެކް ސިނާ މިދިޔަ މާޗް މަހު މަނާބެހޭކަށް ޕޮޒިޓިވްވި މައްސަލައިގެ ތަަހުގީގުުތައް އަދިވެސް އަންނަނީ ކުރިއަށްދަމުންނެވެ. އެ މައްސަލައިގައި ސިނާ އަށް ސަސްޕެންޝަނެއްގެ ފުރުސަތު ވެސް ބޮޑެވެ. ދުނިޔޭގެ އަންހެން އެއް ވަނައިގައި އޮއްވައި، އީގާ ސްވިއަޓެކް، މިދިޔަ އޮގަސްޓް މަހު މަނާބޭހަށް ޕޮޒިޓިވްވެ، އެއް މަހުގެ ސަސްޕެންޝަނެއްގައި ވެސް ހުންނަން ޖެހުނެވެ.

މަނާބޭހުގެ މައްސަލަތައް ޓެނިހުގައި ހިނގާ މިންވަރު އިތުރުވަމުން އަންނައިރު، އެކަމާ ދެކޮޅަށް އަޑުއުފުލާ އެތުލީޓުންގެ ނިސްބަތް ވެސް އަންނަނީ އިތުރުވަމުންނެވެ. އެ ގޮތުން، ކިރްގިއޯސް ބުނީ، އެންމެ މޮޅެތި އެތުލީޓުންގެ މި ފަަަދަ މައްސަލަތަކަކީ ޖުމްލަކޮށް ޓެނިހަށް މީގެއިން ލިބޭ ގެއްލުމެއް ކަމަށެވެ.

"މި ކަންކަން ބެލެހެއްޓުުމުގެ ނިޒާމް އަހަރެމެންގެ މި ކުޅިވަރު (ޓެނިސް) ގައި ވަރަށް ގޯސްކޮށް މި ދަނީ، މީގެ ސަބަބުން ޓެނިހުގެ މުސްތަގުބަލަށް އަސަރުކުރާނެ. ދުނިޔޭގެ އެއް ވަނައިގައި އޮތް ދެ އެތުލީޓެއްގެ މަނާބޭހުގެ މައްސަލަ އޮތުމަކީ ޓެނިހާ މެދު މީހުންގެ ވިސްނުން ގޯސްވާނެ ކަމެއް،" ކިރްގިއޯސް ބުންޏެވެ.

އަނިޔާގެ މައްސަލަތަކުގެ ސަބަބުން 18 މަސް ދުވަސް ކުޅުމާ ދުރުގައި ހުުރުމަށް ފަހު، ކިރްގިއޯސް އަންނަނީ ކުރިއަށް އޮތް ބްރިސްބޭން މުބާރާތުގެ އިތުރުން، އަންނަ މަހުގެ އޮސްޓްރޭލިއަން އޯޕަންގައި ވާދަކުރަން ތައްޔާރުވަމުންނެވެ. ވާދަވެރި މުބާރާތެއްގައި ކިރްގިއޯސް އެންމެ ފަހުން ފެނުނީ، 2023 ވަނަ އަހަރު ޖޫން މަހު ބޭއްވި ސްޓުޓްގާޓް އޯޕަންގަ އެވެ.