ދައުލަތުގެ ބަޖެޓުން އެންމެ ބޮޑު ބަޖެޓެއް ދީގެން ހިންގާ ކައުންސިލު ކަމުގައިވާ މާލެ ސިޓީ ކައުންސިލުގެ މާލީ ހިސާބުތައް އޮޑިޓު ނުކުރާތާ 10 އަހަރު ފާއިތުވެފައިވާކަން ހާމަވެއްޖެ އެވެ.

ހުރިހާ ކައުންސިލެއް ހިމެނޭހެން, ދައުލަތުގެ އޮފީސްތައް އޮޑިޓު ކުރުމުގެ މަސްއޫލިއްޔަތު ހަވާލުކޮށްފައި އޮންނަނީ އޮޑިޓާ ޖެނެރަލް އޮފީހާ އެވެ. އެ އޮފީހުގެ ވެބްސައިޓުން ދައްކާ ގޮތުގައި މާލެ ސިޓީ ކައުންސިލް 2012 އިން 2014 ގެ ނިޔަލަށް އޮޑިޓް ކުރުމަށްފަހު އެ ރިޕޯޓު އާންމުކުރީ 2016 ގަ އެވެ. އެ ފަހުން އެއްވެސް އަހަރެއްގައި މާލެ ސިޓީ ކައުންސިލު އޮޑިޓުކޮށްފައި ނެތެވެ.

އޮޑިޓު ނުކުރާ މައްސަލައިގައި ސުވާލުކުރުމުން މާލެ ސިޓީ ކައުންސިލުގެ މޭޔަރު އާދަމް އާޒިމް "އަދަދު" އަށް ވިދާޅުވީ ސިޓީ ކައުންސިލުގެ އެއްވެސް އޮޑިޓް ރިޕޯޓެއް އެ ކައުންސިލުން ފެންނަން ނެތް ކަމަށެވެ. ނަމަވެސް ކައުންސިލު އޮޑިޓު ކުރަން އޮޑިޓު އޮފީހުން ޕްލޭންތައް ހަދަމުންދާތާ ހަ މަހެއްހާ ދުވަސްވެފައިވާ ކަމަށް އޭނާ ވިދާޅުވި އެވެ.

"އެކްސްޓާނަލް އޮޑިޓް ހަދަން އޮޑިޓް އޮފީހުން ވިޒިޓްތަކެއް އެބަ ހަދާ އަޅުގަނޑުމެންނަށް. ޕްލޭން ކުރުމުގެ މަސައްކަތް އެބަ ކުރޭ. އޮޑިޓާ ޖެނެރަލް އޮފީހުން އެ ޕްލޭން ހަދާތާ މިހާރު ވެދާނެ ހައެއްކަ މަސް މިހާރު. ޕްލޭން ކުރަމުން އެދަނީ. ޕްލޭން ކޮށްފައި ފަށައިގަންނާނީ،" އޭނާ ވިދާޅުވި އެވެ.

އޮޑިޓު އޮފީހުން ޕްލޭންތައް ހެެދި ނަމަވެސް މިއަދާ ހަމައަށް ކައުންސިލުގެ އޮޑިޓު ހަދަން ނުފަށަ އެވެ. އާޒިމް ވިދާޅުވީ އޮޑިޓާ ޖެނެރަލް އޮފީހަށް, އޮޑިޓު ކުރަން ނުފެށިގެން އުޅެނީ ގިނަ ދުވަހު އެ ކައުންސިލް އޮޑިޓް ނުކޮށް އޮތުމުން ކަމަށް ބެލެވޭ ކަމަށެވެ.

އޮޑިޓު އޮފީހުން މި މަސައްކަތް ނުފެށި ނަމަވެސް މާލެ ސިޓީ ކައުންސިލުން ވަނީ އެ ކައުންސިލް އޮޑިޓު ކުރުމަށް ކުރިއަށް އޮތް ދެ އަހަރަށް އިންޓާނަލް އޮޑިޓަރެއް ނަގައި، މަސައްކަތް ފަށާފަ އެވެ. އޮޑިޓް ކުރުމުގެ މަސައްކަތް ހަވާލުކުރީ ކުރޯ މޯލްޑިވްސް އެލްއެލްޕީއާ އެވެ.

އާޒިމް ވިދާޅުވީ މާލެ ސިޓީ ކައުންސިލުގެ ތާރީހުގައި ފުރަތަމަ ފަހަރަށް އިންޓާނަލް އޮޑިޓަރެއް ނަގައި މަސައްކަތް ފެށުމުން ކައުންސިލުގެ ދެފުށް ފެންނަ ސިޔާސަތާ އެކު ރައްޔިތުން ކުރާ އިތުބާރު ވެސް ބޮޑުވެގެންދާނެ ކަމަށް އުންމީދު ކުރެވޭ ކަމަށެވެ.

"އަޅުގަނޑު ހަވާލުވާ ކޮންމެ ތަނެއްގައި ވެސް އެންމެ އިސްކަމެއް ދޭ ކަމަކީ އުސޫލުތަކާއި ހަމަތަކުގެ ތެރެއިން ކަންތައްތަކެއް ކުރުން. އަދި އެކަން އެކަން އެންޝުއާ ކުރުމަށް އޮޑިޓް ފަންކްޝަނަކީ ވަރަށް މުހިންމު ފަންކްޝަނެއް. އެގޮތުން އަޅުގަނޑު ހުންނަ ތަނެއްގައި އޮޑިޓް ފަންކްޝަން ވަރުގަދަކޮށް ހަރުދަނާ ކުރަމުންދާނަން،" އޭނާ ވިދާޅުވި އެވެ.

އާޒިމް އިތުރަށް ވިދާޅުވީ އިންޓާނަލް އޮޑިޓް ހެދުމުގެ ސަބަބުން އެކްސްޓާނަލް އޮޑިޓްތައް ހެދުމަށް ވެސް ފަސޭހަތަކެއް ވެގެންދާނެ ކަމަށް ގަބޫލު ކުރެވޭ ކަމަށެވެ.

މާލެ ސިޓީ ކައުންސިލް އޮޑިޓް ނުކުރެވި 10 އަހަރު ފާއިތުވެފައިވާތީ، އެކަމާ ގުޅިގެން އޮޑިޓާ ޖެނެރަލްގެ ބަހެއް ހޯދުމަށް ގުޅައި މެސެޖު ކުރުމުން ވެސް ޖަވާބެއް ނުދެ އެވެ.