ފައިނަލުގައި އައްޑޫ ސިޓީ 2-0 އިން ބަލިކޮށް، ނައިންޓީ ޕްލަސް ގޯލްޑް ކަޕްގެ ޗެމްޕިއަންކަން ބ. އޭދަފުށިން ހޯދައިފި އެވެ.

މިއީ، 2016 ވަނަ އަހަރަށް ފަހު އޭދަފުށިން އަތޮޅުތަކަށް ހުޅުވާލައިގެން ކުޅުނު މި ފަދަ މުބާރާތެއްގެ ތަށި ހޯދި ފުރަތަަމަ ފަހަރެވެ. އެ ފަހަރު، އެފްއޭއެމް އިން ބޭއްވި މިނިވަން ޗެމްޕިއަންޝިޕްގެ ތަށި ހޯދީ ފައިނަލުގައި 1-0 އިން ތ. ތިމަރަފުށި ބަލިކޮށްފަ އެވެ.

ގޯލްޑް ކަޕްގެ ފައިނަލަށް އޭދަފުށިން ކުރި ދަތުރުގައި ބަލިވީ ގްރޫޕް ސްޓޭޖުގެ ދެ ވަނަ ބުރުގައި ކ. މާފުށި އަތުންނެވެ. އައްޑޫ ސިޓީން ފައިނަލާ ހަަމައަށް އައީ މެޗަކުން ބަލިނުވެ އެވެ.

ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ޝަރަފްވެރިކޮށްދެއްވި މިރޭގެ ފައިނަލް މެޗުގެ ކުރިން މުބާރާތުގެ ޓްރޮފީ ދައްކާލީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) އެވެ.

ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅުނު މިރޭގެ ފައިނަލުގައި އޭދަފުށިން ކުޅެމުން އައީ އިޝާން އިބްރާހިމް (ސައްޓު)ގެ ކެޕްޓަންކަމުގެ ދަށުންނެވެ. އަނެއްކޮޅުން، އައްޑޫ ސިޓީ ޓީމުގެ ކެޕްޓަނަކީ، ގައުމީ ފުޓްބޯޅަ ޓީމުގެ ކުރީގެ ތަރި، ޝަމްވީލް ގާސިމް (ބޮންޑާ) އެވެ.

އޭދަފުށިން މެޗު ފަށައިގެން ކޮންޓްރޯލް ނަގައިގެން ކުޅެން މަސައްކަތް ކުރަމުންދިޔައިރު، އެ ޓީމަށް ލިބޭ ފުރުސަތުތަކުގައި އެޓޭކްކުރަމުންދިޔަ އެވެ. އެ ގޮތުން، އޭރިއާތެެރެއިން އޭދަފުށީގެ ފޯވާޑަކަށް ކުޅެމުންދިޔަ، މުހައްމަދު ފާސިރު (ފާއްޓޭ) ފޮނުވާލި ބޯޅައެއް ދިޔައީ ގޯލާ ސީދާނުވެ އެވެ. އަނެއްކޮޅުން، އޭދަފުށީގެ އަލީ ފާސިރު (ސެންޓޭ) ފޮނުވާލި ބޯޅަ އައްޑޫ ސިޓީގެ ކީޕަރު ވިޝާން އަބްދުލް މަޖީދު ވަނީ އަތަށް ނަގައިފަ އެވެ.

ލަނޑެއް ޖެހޭތޯ އޭދަފުށިން ކުރި މަސައްކަތް އޭދަފުށިން ވަނީ ފުރަތަމަ ހާފު ނިމުމުގެ ކުރިން ކާމިޔާބުކޮށްފަ އެވެ. މި ލަނޑު ޖެހީ ފާއްޓޭ އެވެ. ކޯނަރަކުން އޭދަފުށީގެ ހަމްޒާ މުހައްމަދު (ހަމްޕު) ނެގި ބޯޅައެއް އޭރިއާތެރެއިން ހުސްކޮށް އަރައި، ފާއްޓޭ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.

އައްޑޫ ސިޓީން ދެ ވަނަ ހާފު ފަށައިގެން، ކުރިއަށް ޖެހިގެން ކުޅެން ފެށިއިރު، ބޮންޑާ އާއި އިސްމާއިލް އީސަ (މެސީ) ބޮޑަށް އެޓޭކަށް ޖެހި ކުޅެން ފެށި އެވެ. އައްޑޫ އަށް އެއްވަރުކޮށްދޭން އިބްރާހިމް ވަހީދު ހަސަން (އިއްބެ) ބޮލުން ފޮނުވާލި ބޯޅަ ދަނޑިކައިރިން ދިޔައިރު، ބޮންޑާ އަށް ހުސްކޮށް ލިބުނު ފުރުސަތުގައި ޖެހި ބޯޅަ ވަނީ ބްލޮކްވެފަ އެވެ.

އޭދަފުށްޓަށް މި މޮޅު ކަށަވަރުކޮށްދިން ގޯލު ޖެހީ ފަހު ވަގުތު ސެންޓޭ އެވެ. މިއީ، ހަމްޕު ބޮލުން ޖައްސާލި ބޯޅައެއް ހޯދައި، ސެންޓޭ އޭރިއާތެރެއިން ކުޅުންތެރިއަކު ނައްޓާފައި ތިރިތިރިން ގޯލަށް ބޯޅަ ފޮނުވާލައިގެން ޖެހި ގޯލެކެވެ.