ރަޝިއާއިން ޔޫކްރެއިނަށް ދިން މިސައިލް ހަމަލާތަކެއްގައި އެ ގައުމުގައި ހުރި ހަ އެމްބަސީއަކަށް ގެއްލުންވެ، އެކަކު މަރުވުމުގެ އިތުރުން ހަތް މީހަކު ޒަހަމްވެއްޖެ އެވެ.

ޔޫކްރެއިންގެ ފޮރިން މިނިސްޓްރީން ބުނާ ގޮތުގައި ހަމަލާގައި ގެއްލުންތަކެއް ލިބުނީ އަލްބޭނިއާ، އާޖެންޓީނާ، އުތުރު މެސެޑޯނިއާ، ފަލަސްތީން، ޕޯޗުގަލް އަދި މޮންޓެނެގްރޯގެ އެމްބަސީއަށެވެ.

ރިޕޯޓްތައް ބުނާގޮތުން ރަޝިއާއިން އެ ހަމަލާ ދިނީ އަށް މިސައިލް ފޮނުވާލައިގެންނެވެ. ނަމަވެސް އެ ހަމަލާ އަމާޒު ކުރީ ކޮން ބަޔަކަށް ކަމެއް މިހާތަނަށް ނޭގެ އެވެ.

މި ހަމަލާތައް ރަޝިއާ އިން ދިނީ ޔޫކްރެއިނުން ރަޝިއާއަށް ދެމުން އަންނަ ހަމަލާތަކުގެ ރައްދުގައި ކަމަށް އެ ގައުމުން ވަނީ ބުނެފަ އެވެ.

މިދިޔަ ހަފްތާގައި ޔޫކްރެއިނުން ވަނީ ރަޝިއާއަށް ފަސް ބެލެސްޓިކް މިސައިލުގެ އިތުރުން 40 ޑްރޯން ފޮނުވާލާފަ އެވެ. އޭގެ ތެރެއިން 20 ޑްރޯން މަންޒިލާ ހިސާބަށް ނުދެވެނީސް ވަނީ ވެއްޓިފަ އެވެ.

ޔޫކްރެއިނުން އަންނަނީ އެ ގަުއުމަށް ބޭނުންވާ ހަތިޔާރު އެމެރިކާ ފަދަ ގައުމުތަކުން ހޯދައިގެން ރަޝިއާއަށް ހަމަލާތައް ދެމުންނެވެ. ނަމަވެސް ރަޝިއާއިން އަންނަނީ ޔޫކްރެއިނުގެ ބިންތަކަށް ވެރިވެ ގަނެ އެ ގައުމުގެ ބޮޑު ބައެއް ހިފަމުންނެވެ.