ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގައި ޕެނަލްޓީ ޖަހައިގެން، 5-3 އިން ކ. ގުރައިދޫ ބަލިކޮށް ސެމީ ފައިނަލުގައި މާލެ ސިޓީން ބ. އޭދަފުށްޓާ ދެކޮޅަށް ކުޅެން ޖެހިއްޖެ އެވެ.

އޭދަފުށިން ސެމީ ފައިނަލަށް ދަތުރުކުރީ ކުއާޓާ ފައިނަލް ފުރަތަމަ މެޗުގައި މިއަދު ހަވީރު 5-0 އިން ޅ. ނައިފަރު ބަލިކޮށްފަ އެވެ. ކުއާޓާގެ ދެ ވަނަ މެޗުގައި މިރޭ ފުރިހަމަ ވަގުތު ހަމަވިއިރު، ގުރައިދޫ އާއި މާލެ އޮތީ 1-1 އިން އެއްވަރުވެފަ އެވެ.

އޭދަފުށްޓާއި މާލެ ވަނީ ގްރޫޕް ސްޓޭޖުގައި ބައްދަލުކޮށްފަ އެވެ. އެ މެޗުން، 2-0 އިން މޮޅުވީ އޭދަފުށްޓެވެ.

ގަލޮޅު ރަސްމީ ދަނޑުގައި މިރޭ ކުޅުނު މެޗުގައި ގުރައިދޫން ވަނީ ފުރަތަމަ ހާފުގައި ލީޑުނަގައިފަ އެވެ. މި ލަނޑު ޖެހީ އެ ޓީމުގެ ބިދޭސީ ފޯވާޑް، އަހުމަދު އިބްރާހިމް އެވެ. މާލެ ސިޓީ ޓީމުގެ ޑިފެންޑަރު، ހަސަން ޝިފާއު ފަހަތަށް ދިން ބޯޅަ އަހުމަދު އިބްރާހިމް ވަނީ ގޯލަށް ފޮނުވާލައިފަ އެވެ.

އޭގެ ފަހުން، ގުރައިދޫން ފޮނުވާލި ބޯޅަތައް މާލެ ސިޓީގެ ކީޕަރު، ތޮލާލް ހަސަން (ޓޮޕްލަކް) ވަނީ މަތަކޮށްފަ އެވެ.

ދެ ވަނަ ހާފުގެ ކުޅުން ފެށިތާ ދެ މިނިޓް ތެރޭ މާލެ ސިޓީން އެއްވަރުކުރި އެވެ. މިއީ، ގުރައިދޫގެ ޑިފެންޑަރު، އަހުމަދު ނޫމާން (ހެލްމެޓް) އަތުން ބައިކޮޅަށް ވަން ގޯލެކެވެ. މާލެ ސިޓީގެ މިސްރު މިޑްފީލްޑަރު، ހަލީލް ޖަމާލް ހިލޭޖެހުމަކުން ފޮނުވާލި ބޯޅަ ދިފާއުކުރަން ނޫމާން ބޮލުން ޖައްސާލުމުން ވަނީ ބައިކޮޅަށެވެ.

މެޗުގެ ފުރިހަަމަ ވަގުތު ހަމަވިއިރު، ދެ ޓީމު އެއްވަރުވެފައި އޮތުމުން ނަތީޖާ ނެރެން ވަނީ ޕެނަލްޓީ ޖަހައިފަ އެވެ.

ފުރަތަމަ ޕެނަލްޓީ ޖެހި ހަލީލް ކާމިޔާބުކުރިއިރު، ގުރައިދޫގެ ފުރަތަމަ ޕެނަލްޓީ މުހައްމަދު ނާއިމް ފޮނުވާލިއިރު، މާލެ ސިޓީގެ ކީޕަރު ޓޮޕްލަކް ވަނީ މަތަކޮށްފަ އެވެ. މާލޭން ޖެހި ދެ ވަނަ ޕެނަލްޓީ ހުސެއިން ޝުއައިބް ފޮނުވާލުމުން ގުރައިދޫގެ ކީޕަރު އަހުމަދު ސަމީރު މަތަކުރި އެވެ. ގުރައިދޫގެ ދެ ވަނަ ޕެނަލްޓީ ކެޕްޓަން، އަބްދުﷲ ޝަޔަމް ކާމިޔާބުކުރި އެވެ. މާލޭގެ ތިން ވަނަ ޕެނަލްޓީ އަހުނަފް މުހައްމަދު ތަސްނީމް (ނަފްކޮ) ކާމިޔާބުކުރިއިރު، ގުރައިދޫގެ ޕެނަލްޓީ އަހުމަދު ޝޫން ގޯލަށް ވައްދާލި އެވެ.

އިސްމާއިލް ވަޖީހު (ވައްޖެ) ވަނީ މަތީ ކަނަށް ބޯޅަ ފޮނުވާލައި މާލެ ސިޓީގެ ހަތަރު ވަނަ ޕެނަލްޓީ ކާމިޔާބުކޮށްފައިވަނިކޮށް، ގުރައިދޫގެ ބިދޭސީ ކުޅުންތެރިޔާ، މޮއާޒް ގަބޭރް ޖެހި ޕެނަލްޓީ މާލޭގެ ކީޕަރު ތޮލާލް ވަނީ މަތަކޮށްފަ އެވެ. މެޗުގެ ފަހުކޮޅުގައި ބަދަލަކަށް ކުޅެން އެރި ރިލްވާން ވަހީދު (ރިލޭ) ވަނީ މާލޭގެ ފަސް ވަނަ ޕެނަލްޓީ ވައްދާލައި އެ ޓީމު މޮޅުކޮށްދީފަ އެވެ.

މާލެ ސިޓީ މޮޅުކޮށްދިން ކީޕަރު ޓޮޕްލަކް އަށް ޓީމުން ފުރުސަތު ލިބުނީ މުބާރާތް ފެށިއިރު، މާލެ ސިޓީން ބޭނުންކުރި ކީީޕަރު، އާތިފް އަށް އަނިޔާވުމުންނެވެ.