މާލެ އާއި ހުޅުމާލެ ގުޅުވައިދޭ ސިނަމާލެ ބްރިޖު މަތީގައި އެކްސިޑެންޓުތަކެއް ހިނގައި، ގިނަ އަދަދެއްގެ އުޅަނދުތަކެއް ބްރިޖު މަތީގައި ތާށިވެ ޓްރެފިކް ތޮއްޖެހިއްޖެ އެވެ.

މިކަމާ ގުޅިގެން ފުލުހުން މީޑިއާތަކާ ހިއްސާކުރި މެސެޖެއްގައި ބުނީ ދެ އެކްސިޑެންޓެއް ހިނގައިގެން އެ ސަރަހައްދުގައި ފުލުހުން ހަރަކާތްތެރިވަމުންދާ ކަމަށެވެ.

އެއް އެކްސިޑެންޓު ހިނގީ ސައިކަލެއްގައި ދިޔަ ދެ އަންހެނަކު ކަހާލައިގެން ވެއްޓިގެންނެވެ. އަނެއް އެކްސިޑެންޓު ހިނގީ ބްރިޖު މަތީގައި ބަހަކާއި ކާރެއް ޖެހިގެންނެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ބްރިޖުގައި ތޮއްޖެހިފައި ހުރި ވެހިކަލްތައް މާލެއިން އަރާ ސަރަހައްދާ ހަމައަށް އެބައޮތެވެ. އަދި މާލެއިން ހުޅުޅެއާ ހަމައަށް އޮންނަ ދެ ލޭނުން ވެސް ކުރިއަށް ނުދެވޭ ވަރަށް އޮތީ ޓްރެފިކް ތޮއްޖެހިފަ އެވެ.