އަފްގާނިސްތާނުގެ ކާބުލްގައި ދިން ބޮމުގެ ހަމަލާއެއްގައި އެ ގައުމުގެ ރެފިއުޖީ މިނިސްޓަރު ހަލީލް ރަހްމާން ހަގާނީ މަރާލައިފި އެވެ.

އަފްގާނިސްތާނުގެ ނޫސްތަކުން ބުނާ ގޮތުގައި އެ ބޮމުގެ ހަމަލާގައި ހަގާނީ އިތުރުން ފަސް މީހުން މަރުވި އެވެ.

އަފްގާނިސްތާނުގައި ވެރިކަން ކުރަމުން އަންނަ ތާލިބާނުގެ ޒަބީހުﷲ މުޖާހިދު ވިދާޅުވީ އެ ހަމަލާ ދީނީ އައިސިސް ޖަމާއަތުން ކަމަށެވެ.

ނަމަވެސް އެ ހަމަލާގެ ޒިންމާ މިހާތަނަށް އެއްވެސް ޖަމާއަތަކުން ނުނަގާ ކަމަށް ރިޕޯޓްތައް ބުނެ އެވެ.

އަފްގާނިސްތާނުގެ އިންޓީރިއާ މިނިސްޓްރީގެ އޮފިޝަލަކާ ހަވާލާދީ ދަ އެސޯސިއޭޓެޑް ޕްރެސް ނިއުސް އެޖެންސީން ބުނީ އެ ބޮމުގެ ހަމަލާދިނީ ޖާނުން ފިދާވެގެން ކަމަށެވެ.

އަދި އަފްގާނިސްތާން ސަރުކާރުގެ އޮފިޝަލަކާ ހަވާލާދީ އޭއެފްޕީން ބުނީ އެ ހަމަލާ ދިނީ އެ ގައުމުގެ މިނިސްޓްރީ އޮފް ރެފިއުޖީސްގައި ކަމަށެވެ.

ތާލިބާނުގެ ވަގުތީ ސަރުކާރުގެ މިނިސްޓަރުކަން ހަގާނީއަށް ލިބުނީ އެ ގައުމުން ބޭރުގެ ސިފައިން 2021 ގައި ފޭބި ފަހުންނެވެ. ހަގާނީ އަކީ ހަގާނީ ނެޓްވޯކްގެ ސީނިއާ ލީޑަރެކެވެ.