ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކޮށް، ގެއްލުމުގެ ބަދަލު ދިނުމަށް މިދިޔަ ސަރުކާރުން އުފެއްދި ސެޓްލަމަންޓު ކޮމިޓީން ބަދަލު ދީފައިވަނީ ގާނޫނުތަކާއި ގަވާއިދުތަކާ ހިލާފަށް ކަމަށް ތުހުމަތުކޮށް އެ މައްސަލަތައް ބެލުމަށް ޖިނާއީ ތަހުގީގެއް ހިންގަން އެޓާނީ ޖެނެރަލްއަށް އެނގުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

މާލިއްޔަތު ކޮމިޓީން ނިންމީ ކުރީގެ ރައީސް އިބްރާހިމް މުހައްމަދު ސޯލިހު, އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް އަދި މިދިޔަ ސަރުކާރުގައި ރައީސް އޮފީހުގެ މިނިސްޓަރަކަށް ހުރި އަލީ ޝިޔާމްގެ މައްޗަށް ޖިނާއީ ތަހުގީގު ހިންގުމަށް އޭޖީއަށް އަންގަން ވަނީ ފާސްކޮށްފަ އެވެ. މި ތިން ބޭފުޅުންގެ އިތުރުން ބަދަލު ދިނުމުގައި ޝާމިލްވި އެހެން ވެރިންގެ މައްސަލަ ވެސް ތަހުގީގުކުރާން ކޮމިޓީން ނިންމި ކަމަށް މާލިއްޔަތު ކޮމިޓީގެ މެންބަރަކު ވިދާޅުވި އެވެ.

"މަޖިލީހުން އެ ނިންމުން ފާސްކޮށް، އޭޖީއަށް ދަންނަވާނީ އެކަމުގެ ކަންކަން ކުރިއަށް ގެންދަން. އެ ހިސާބުން، އޭޖީން ޕީޖީ އަށް އަންގާނެ،" މެންބަރަކު ވިދާޅުވި އެވެ.

އެ ހުށަހެޅުން މާލިއްޔަތު ކޮމިޓީއަށް ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އަދި, ތާއީދު ކުރެއްވީ ކެލާ ދާއިރާގެ މެންބަރު ޢަބްދުﷲ ޝަރީފް އެވެ. އެ ހުށަހެޅުން ފާސްކުރީ 6 މެންބަރުންގެ ވޯޓުންނެވެ.

"ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުސޫލު" ގެ ނަމުގައި ނޮވެމްބަރު 28، 2022 ގައި އެކުލަވައިލި އުސޫލު ހިންގަމުން އައިސްފައި ވަނީ ގާނޫނީ އޮނިގަނޑެއް ނެތި ކަމަށް މި ސަރުކާރުގެ ބަންޑާރަ ނައިބު އަހްމަދު އުޝާމް ލަފާ ދިނުމުން އެ ކޮމިޓީ ވަނީ އުވާލާފަ އެވެ.