މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ސާފު ފައިދާގެ ތެރެއިން މުވައްޒަފުންނަށް ހިއްސާ ކުރަން ހަމަޖެހިފައިވާ މިންވަރު ދޫކުރުމުގެ މަސައްކަތް ފަށައިފި އެވެ.

އެމްޑަބްލިއުއެސްސީން މުވައްޒަފުންނަށް ނެރުނު ސާކިއުލާއެއްގައި ބުނީ މި އަހަރުގެ ފުރަތަމަ ދެ ކުއާޓަރުގެ ޕާފޯމަންސް ޕޭއައުޓް ވެސް ހިސާބު ކުރެވި ކުންފުނީގެ ބޯޑުން މިހާރު ވަނީ ފާސްކޮށްފައި ކަމަށެވެ.

"މި އާ ނިޒާމުގައި ޕާފޯމަންސް ޕޭއައުޓް ހިސާބު ކުރެވުނީ ކޮންމެ ކުއާޓަރެއްގައި. ކުންފުނީގެ ބޯޑުން ފާސްކުރާ ގޮތެއްގެ މަތިން އެ އަހަރަކަށް ކަނޑައެޅޭ މިންވަރެއް މުވައްޒަފުންނަށް ފޯރުކޮށްދެވޭނީ ކޮންމެ އަހަރެއްގެ ވެސް ފަހު ކޮޅު،" އެ ކުންފުނިން ބުންޏެވެ.

އެމްޑަބްލިއުއެސްސީން ބުނީ މުވައްޒަފުންގެ ޕާފޯމަންސް ޕޭއައުޓާ ގުޅޭ ގޮތުން ނުވަތަ ކުންފުނީގެ މާލީ ކަންކަމާ ގުޅޭ ގޮތުން މުވައްޒަފުން ބޭނުންވާ މައުލޫމާތު ހިއުމަން ރިސޯސް އެންޑް އެޑްމިން ޑިވިޝަނުންނާއި ފިނޭންސް ޑިވިޝަނުން ލިބޭނެ ކަމަށެވެ.

އެމްޑަބްލިއުއެސްސީން މުވައްޒަފުންގެ އަގުވަޒަން ކުރުމުގެ ގޮތުން ކުންފުނީގެ ސާފު ފައިދާގެ ތެރެއިން މުވައްޒަފުންނަށް ހިއްސާ ކުރެވޭ މިންވަރު ކަނޑައެޅުމުގެ އާ ނިޒާމަށް އަމަލު ކުރަން ފެށީ އޮކްޓޯބަރު 10، ގަ އެވެ.

އޭގެ އިތުރުން، ކުންފުނީގެ މުވައްޒަފުންނާއި މެދު އޮންނަ އެއްބައިވަންތަ ކަމާއި އެއްބައެއް ވަންތަކަން ގެއްލޭ ގޮތަށް މުވައްޒަފުންނާ ގުޅުންހުރި ކަންކަމުގައި ސައްހަ ނޫން މައުލޫމާތު ފެތުރުމާއި އެކި ގޮތްގޮތުން ހިންގޭ ނޭއްގާނީ ކަންކަމުގައި ބައިވެރިނުވާން ވެސް އެ ކުންފުނިން ބުނެ އެވެ.