އުމްރާނީ ތަރައްގީއަށް ލޯނު ދޫކުރަން ހާއްސަކޮށް މޯލްޑިވްސް ޑިވެލޮޕްމެންޓް ބޭންކު ހުޅުވިތާ 21 ދުވަސް ވީއިރު ވެސް އެތަނުން ހިދުމަތް ދޭން ނުފަށާކަން އެނގިއްޖެ އެވެ.

ދެމެހެއްޓެނިވި އިގްތިސާދީ އަދި އިޖުތިމާއީ ތަރައްގީއަށް އިންވެސްޓުކުރުމާއި އުމްރާނީ ތަރައްގީއަށް ބޭނުންވާ ފައިސާ ހޯދުމުގެ އަމާޒުގައި މި ސަރުކާރުން އުފެއްދި ޑިވެލޮޕްމެންޓް ބޭންކު ހުޅުވީ މިދިޔަ ނޮވެމްބަރު 16، ގައި ރައީސް ޑރ، މުހައްމަދު މުއިއްޒު އެވެ. މި ސަރުކާރުގެ ފުރަތަމަ އެއް އަހަރުދުވަހުގެ ކާމިޔާބީތަކުގެ ތެރޭގައި ވެސް އެކަން ފާހަގަކުރި އެވެ.

ނަމަވެސް އެތަނުން ދޭ ހިދުމަތްތަކާއި އެތަނުގެ ކަންކަން ބަލައިލުމަށް "އަދަދު" ގެ ނޫސްވެރިން ޑިވެލޮޕްމެންޓް ބޭންކަށް ދިޔައިރު، އެތަން ހުރީ ބަންދުކޮށްފަ އެވެ.

ޑިވެލޮޕްމަންޓު ބޭންކު އުފައްދަވަން ރައީސް މުއިއްޒު ނިންމެވީ މެއި، 2024، ގަ އެވެ. އެ ބޭންކު ހުޅުވާނެ ކަމަށް ސަރުކާރުން އެންމެ ފުރަތަމަ ބުނީ ޖުލައި މަހުގެ ތެރޭގަ އެވެ. ނަމަވެސް އެކި ސަބަބުތަކާހުރެ ލަސްވަމުން ގޮސް، ނޮވެމްބަރު 16، ގައި އެތަން ހުޅުވިއިރު ވެސް އެތަނުގެ މަސައްކަތްތައް އެއްކޮށް ނުނިމެ އެވެ.

ޑިވެލޮޕްމަންޓު ބޭންކު ހިންގަން ބޭނުންވާ ލައިސެންސް މޯލްޑިވްސް މަނިޓަރީ އޮތޯރިޓީން ދޫކުރީ އޮކްޓޯބަރު 13، ގަ އެވެ. ލައިސެންސް ދޫކުރީ އަހަރެއްގެ ތެރޭގައި ބޭންކިން ހިދުމަތް ދިނުމަށް ޝަރުތު ކުރުމަށްފަހެވެ.

ސަރުކާރުން މީގެ ކުރިން ބުނެފައި ވަނީ މިހާރު އޮތް ބޭންކިން ނިޒާމުގެ ތެރެއިން ރައްޔިތުން ބޭނުންވާ ތަރައްގީ ގެނެވޭނެ ޖާގައެއް ނެތް ކަމަށާއި ބޭންކިން ނިޒާމުގެ ތެރެއަށް ޑިވެލޮޕްމެންޓް ބޭންކެއް ވައްދަން ޖެހުނީ އެ ސަބަބާ ހުރެ ކަމަށެވެ. އަދި އެ ބޭންކު ގާއިމު ކުރުމުން ތަރައްގީއަށް ބޭނުންވާ ލޯނާއި ފައިސާ ދިނުމުގަ މިހާރަށް ވުރެ މާ ލުއި ގޮތްތަކެއް ފަހިވެގެންދާނެ ކަމަށް ސަރުކާރުން ބުނެފައިވެ އެވެ.

ޑިވެލޮޕްމަންޓު ބޭންކުގެ ޗެއާޕާސަނަކަށް އައްޔަނުކޮށްފައި ވަނީ އޭޝިއާގެ ބޭންކިން ސެކްޓަރުގެ ތަޖުރިބާކާރެއް ކަމަށްވާ އަރުނީ ގުނަތިލެކެ އެވެ. އޭނާއަކީ ސްރީ ލަންކާއަށް އުފަން ސިންގަޕޫރު ރައްޔިތެކެވެ. އޭނާ ޑިގްރީއާ ހަމައަށް ކިޔެވީ ލަންކާގެ ކޮލޮމްބޯ ޔުނިވާސިޓީންނެވެ. އެއަށްފަހު މާސްޓާސް ހެދީ އެމެރިކާގެ ހާވާޑު ޔުނިވާސިޓީންނެވެ.

އެ ބޭންކުގެ ސީއީއޯއަކަށް އައްޔަނުކުރީ ނޮއެލް ގްރެގާ ޕެޓަސަން-ޖޯންސްއަކީ އިނގިރޭސިވިލާތުގެ ރައްޔިތެކެވެ. ދެކުނު އެފްރިކާގެ ކޭޕް ޓައުން ޔުނިވާސިޓީން ޑިގްރީ ފުރިހަމަ ކުރުމަށް ފަހު މާސްޓާސް ހެދީ އޮކްސްފޯޑް ޔުނިވާސިޓީންނެވެ. އޭނާއަކީ ވެސް ބޭންކިން ދާއިރާގައި 28 އަހަރު ހޭދަކޮށްފައިވާ ތަޖުރިބާކާރު ބޭންކަރެކެވެ.