ހާއްސަ އެހީއަށް ބޭނުންވާ ކުދިންނަށް ކިޔަވައިދޭ ސެން ޓީޗަރުން އުފައްދަން މުޅިން އާ ކޮންސެޕްޓެއްގައި ޕްރޮގްރާމެއް ފަށަން ތައްޔާރުވެފައިވާ ކަމަށް ރައީސް ޑރ. މުހައްމަދު މުއިއްޒު މިއަދު އިއުލާން ކުރައްވައިފި އެވެ.

މާފަންނު މަދުރަސާއަށް 40 އަހަރު ފުރުމާ ގުޅިގެން ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އާ ޕްރޮގްރާމުގެ ދަށުން ހުރިހާ ޓީޗަރުންނަކީ ވެސް ހާއްސަ އެހީއަށް ބޭނުންވާ ކުދިންނަށް ކިޔަވައިދެވޭ ފެންވަރަށް ތަމްރީނުވެފައިވާ ޓީޗަރުންނަށް ހެދުމަށް މަސައްކަތް ކުރާނެ ކަމަށެވެ. އަދި އެ ޕްރޮގްރާމުގެ ދަށުން ސެން ޓީޗަރުންގެ ގޮތުގައި ވެސް ހާއްސަ ބަޔަކު ތަމްރީނު ކުރާނެ ކަމަށް އެމަނިކުފާނު ވިދާޅުވި އެވެ.

"ސެން ޓީޗަރުން ތަމްރީނު ކުރުން މިހާރު ވެސް އެޑިއުކޭޝަން މިނިސްޓްރީން އާ ޕްރޮގްރާމެއް ފެށުމުގެ މަރުހަލާގައި އެދަނީ. އާ ކޮންސެޕްޓެއްގައި. އިންކްލޫސިވް ގޮތެއްގައި ހުރިހާ ޓީޗަރުންނަކީ ވެސް އެ ދާއިރާއަށް ތަމްރީނު ލިބިފައިވާ ޓީޗަރުންނަށް ހެދުމާއި ހާއްސަކޮށް އެ ދާއިރާގެ ޓީޗަރުން އުފެއްދުމާ. މި ދެ ކަންތައް ކުރުމުގެ މަސައްކަތްތަކެއް ފެށިގެން އެދަނީ،" ރައީސް ވިދާޅުވި އެވެ.

ސެން ޓީޗަރުންނަށް ވާން ބޭނުންވާ ހުރިހާ ފަރާތްތަކަށް އެ ފުރުސަތު ފަހިކޮށްދީ، ކުރިއަށް އޮތް ތަނުގައި ހާއްސަ އެހީއަށް ބޭނުންވާ ކުދިންނަށް އިންކްލޫސިވް ގޮތެއްގައި ތަފާތު ކުރުމެއް ނެތި ތައުލީމީ ފުރުސަތު ހޯދައި ދިނުމުގައި މެނިފެސްޓޯގައި އޮތް ގޮތަށް އެ މަސައްކަތް ތަންފީޒު ކުރާނެ ކަމަށް ރައީސް މުއިއްޒު ވިދާޅުވި އެވެ.

ރައީސް މުއިއްޒު ވިދާޅުވީ އަންނަ އަހަރު ރާއްޖޭގެ އެކި ކަންކޮޅުގެ ޓީޗަރުންނަށް އެ ޕްރޮގްރާމު ފަށައިގެން ޑިޕްލޮމާއިން ޑިގްރީ ފެންވަރަށް ތަމްރީނު ކުރުމުގެ މަސައްކަތް ކުރިއަށް ގެންދާނެ ކަމަށެވެ.

ސެން ޓީޗަރުންނަށް ރިސްކް އެލަވަންސް ނުވަތަ ހާއްސަ އިނާޔަތެއް ލިބޭނެ ގޮތް ސަރުކާރުން ހަމަޖައްސައި ދެއްވާނެ ކަމަށް ރައީސް މުއިއްޒު ކުރިން ވިދާޅުވި އެވެ.