އެކި މޫސުމުގައި ރާއްޖެއަށް ހިޖުރަކުރާ ދޫންޏާއި ރާއްޖޭގައި އުޅޭ ދޫނިސޫފާސޫތްޕާ ބެހޭ ގޮތުން ދިރާސާއެއް ކުރުމަށް ނިއުޒިލޭންޑުގެ އޮކްލޭންޑް ޔުނިވާސިޓީ އާއެކު އެންވަރަމެންޓް ޕްރޮޓެކްޝަން އެޖެންސީ (އީޕީއޭ) އިން ސޮއިކޮށްފި އެވެ.

އީޕީއޭގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ، އެ އެއްބަސްވުމުގެ ދަށުން ދިރާސާ ކުރާނީ ރާއްޖެއަށް ހިޖުރަކޮށް އުޅޭ ދޫނިސޫފާސޫތްޕާއި ރާއްޖޭގައި އުޅޭ ކަނޑުމަތީ ދޫނިތައް ކަމަށެވެ.

އެގޮތުން އެސޮރުމެން ހާލިހަދާ ތަންތަނާއި ނިދަން އަރާ ތަންތަނުގެ އިތުރުން އެސޮރުމެން ކާނާ ހޯދާ ގޮތްގޮތާއި ހޯދާ ތަންތަން ދިރާސާ ކުރާނެ ކަމަށް އީޕީއޭއިން ބުންޏެވެ.

އެ ދިރާސާގެ ސަބަބުން ދޫނިސޫފާސޫފީގެ ވާސަތައް ހިމާޔަތް ކުރުމަށް އިތުރު ބާރެއް ލިބޭނެ ކަމަށް އީޕީއޭއިން ބުންޏެވެ.

އީޕީއޭގެ ފަރާތުން އެ އެއްބަސްވުމުގައި ސޮއި ކުރެއްވީ އެންވަރަމެންޓް މިނިސްޓަރު، ތޯރިގު އިބްރާހިމް އެވެ.

ރާއްޖެއަށް އާންމުކޮށް ދޫނި ހިޖުރަކޮށް އުޅެނީ ކޮންމެ އަހަރެއްގެ ވެސް ހެއި ނަކަތް ފެށި ހުޅަނގު މޫސުން ނިމުމަކާ ހަމައަށް އަންނަން ގާތްވުމުންނެވެ. އިހުގައި މީހުން ބުނެއުޅޭ ގޮތުގައި ހިޖުރަ ކުރާ ދޫނި ރާއްޖެއިން ފެނުމަކީ އެއީ އިރުވައިވުމުގެ އަލާމާތެކެވެ. ދިވެހީންގެ ތެރޭގައި އެގޮތުން އެންމެ މަޝްހޫރު ހިޖުރަކުރާ ދޫންޏަކީ ހެއިނަކަތު ދޫނު ނުވަތަ އާންމު ނަމުން ނަމަ ދޮންދޫންޏެވެ.

މި ހިނގާ ދޮށަ ނަކަތް ނިމި އިރުވައި ފެށުމަށްފަހު ވެސް ރާއްޖެއަށް އެކި ބާވަތްތަކުގެ ދޫނި މި އަހަރު ވެސް ހިޖުރަ ކުރާނެ ކަމަށް ބެލެވެ އެވެ.

ރާއްޖެއަކީ ހިޖުރަ ކުރާ ދިރޭތައްކެއްޗަށް ހާއްސަ އދ. ގެ މުއާހަދާ، ކޮންވެންޝަން އޮން މައިގުރޭޓަރީ ސްޕީޝީޒްގެ މެންބަރު ގައުމެކެވެ.