ޓިއުރިން، އިޓަލީ (ޑިސެމްބަރު 2) - އިޓާލިއަން ލީގުގައި ރޭ ޓޮރިނޯ އަތުން 1-0 އިން މޮޅުވެ ނަޕޯލީން ލީގުގެ އެއް ވަަނަ މަގާމުގައި ލީޑު ދިފާއުކުރި ނަމަވެސް އެ ޓީމުގެ ކޯޗު، އެންޓޯނިއޯ ކޮންޓޭ ގިނަ ކަންބޮޑުވުންތަކާ އެކު ޝަކުވާތައް އޮއްސާލައިފި އެވެ.

ސްކޮޓް މެކްޓޮމިނޭ ޖެހި ގޯލުން ޓޮރިނޯ ބަލިކޮށް، ނަޕޯލީން ވަނީ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ. ނަޕޯލީ އަށް 14 މެޗުން 32 ޕޮއިންޓް ލިބިފައިވާއިރު، ދެ ވަނައިގައި އޮތް އެޓަލަންޓާ އަށް ވަނީ 13 މެޗުން 28 ޕޮއިންޓް ލިބިފަ އެވެ. ތިން ވަނައިގައި އޮތް އިންޓަ އާއި ހަތަރެއްގައި އޮތް ފިއޮރެންޓީނާ އަށް ވެސް ވަނީ 13 މެޗުން 28 ޕޮއިންޓް ލިބިފަ އެވެ.

އިންޓަ އާއި ފިއޮރެންޓީނާ މެޗު ރޭ ނުކުޅެވި، ޖެހުނީ ހުއްޓާލާށެވެ.

ނަޕޯލީގެ މެޗަށް ފަހު އެ ޓީމުގެ ކޯޗު، ކޮންޓޭ ބުނީ ނަޕޯލީ މި ވަގުތު ވިސްނާފައި އޮތީ ހަމައެކަނި އިޓާލިއަން ލީގާއި އިޓާލިއަން ކަޕަށް ކަމުގައިވާނަމަ އެ ޓީމުގެ ހާލަތު ރަނގަޅު ކަމަށެވެ.

"މި ވަގުތު އަަހަރެމެންގެ މި ހުރީ އައުޓްފީލްޑް 21 ކުޅުންތެރިން، މިއީ ހަމައެކަނި ލީގާއި ކަޕްގައި ކުޅެލަން ނަމަ ވަރަށް ރަނގަޅު، އެކަމަކު، އަހަރެމެން ވިސްނައިގެން މި ތިބީ، މަސައްކަތް ވެސް މި ކުރަނީ ޔޫރަޕްގައި ވެސް ރަނގަޅުކުރަން، އެހެންވީމަ، މި ކްލަބްގެ ވެރިން އެބަޖެހޭ ޓީމު ވަރުގަދަ ކުރުމުގެ ކަންކަމަށް ވެސް ވިސްނަން،" ކުރިން ޔުވެންޓަސްއާ އެކު އިޓާލިއަން ލީގު ކާމިޔާބުކޮށްފައިވާ ކޮންޓޭ ބުންޏެވެ.

ކުރިން ޗެލްސީއާ އެކު އިނގިރޭސި ޕްރިމިއާ ލީގު ވެސް ކާމިޔާބުކުރި ކޮންޓޭ ބުނީ، ލީގުގެ 14 ވަަނަ މެޗާ ހަމައަށްދާއިރު، އޭނާ ރަނގަޅުކުރަން ބޭނުންވި ބައެއް ކަންތައްތަކަށް އަދިވެސް މަސައްކަތްކުރަން ޖެހުމަކީ ބަލައިގަންނަން އުނދަގޫ ކަމެއް ކަމަށެވެ.

ލީގުގައި ރޭ ލެޗޭ އާއި ޔުވެންޓަސްގެ މެޗު ވަނީ 1-1 އިން އެއްވަރުވެފަ އެވެ. އަންޑްރެއާ ކަމްބިއާސޯ ޔުވެންޓަސް އަށް ލީޑުނަގައިދިންއިރު، ލެޗޭ އިން އިތުރު ވަގުތުގައި އެއްވަރުކުރީ އަންޓޭ ރެބިޗް ޖެހި ގޯލުންނެވެ.