ބޭރު ފައިސާގެ ގަވާއިދަށް ގެނައި އިސްލާހުގެ ދަށުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން މަޖުބޫރުކުރުމަކީ ފޭރުން ކަމަށް ގިނަ ރިސޯޓުތަކެއް ހިންގަވާ ވިޔަފާރިވެރިޔާ އަދި މީދޫ ދާއިރާގެ މެންބަރު އަހުމަދު ސިޔާމް ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" އަށް ދެއްވި ހާއްސަ އިންޓަވިއުއެއްގައި ސިޔާމް ވިދާޅުވީ ޓޫރިޒަމް ސިނާއަތަށް އަސަރުކުރާ ގޮތަށް ގެންނަ ބަދަލުތަކާ ގުޅިގެން އޭގެ ނުރަނގަޅު އަސަރު ވިޔަފާރިއަށް ކުރަމުންދާ ކަމަށެވެ. އޭގެ ތެރެއިން އެއް ކަމެއްގެ ގޮތުގައި އޭނާ ފާހަގަކުރެއްވީ ޑޮލަރު މާރުކުރުމެވެ.

"އަޅުގަނޑުމެންނަށް ކުރެވޭނެ ކަމެއް ނޫން މީކީ 500 ޑޮލަރު ބޮލެއްގެ މައްޗަށް އެކްސްޗޭންޖު ކުރުމަކީ ކުރެވޭނެ ކަމެއް ނޫން. ކުރެވޭނެ ކަންތައްތަކުގެ ވާހަކަ އަޅުގަނޑުމެން ކައިރީ ދެއްކީމައި އެކަން ކުރެވޭނެ. އެހެން ނަމަވެސް މަޖުބޫރުކޮށްފިއްޔާ އެކަން ކުރަން މަޖުބޫރު ވާނެ. ދެން އަހަރަމެން ކުންފުނިތާ ހަލާކު ވާނީ،" ސިޔާމް ވިދާޅުވި އެވެ.

ޑޮލަރު މާރުކުރުން ގޯސް ކަމަށް ސިޔާމް ގަބޫލުކުރައްވާ ސަބަބުތަކުގެ ތެރޭގައި ބޭރުގެ އިންވެސްޓަރުންގެ ހުރި ކަންބޮޑުވުންތަކާއި މުވައްޒަފުންނާ ގުޅޭ ބައެއް ކަންކަން ވެސް ހިއްސާކުރެއްވި އެވެ.

ސިޔާމް ވިދާޅުވީ މިހާރު އޭނާ ދިވެހި މުވައްޒަފުންނަށް މުސާރަ ދެނީ ޑޮލަރުން ނަމަވެސް މުސްތަގުބަލުގައި އެ މުވައްޒަފުންނަށް ވެސް މުސާރަ ދޭން ޖެހޭނީ ދިވެހި ރުފިޔާއިން ކަމަށެވެ. އަދި މީގެ ސަބަބުން ވިޔަފާރިވެރިންނަށާއި ޓޫރިޒަމް ސިނާއަތުގައި ހަރަކާތްތެރިވާ އެންމެނަށް ވެސް ގެއްލުން ވާނެ ކަމަށް އޭނާ ވިދާޅުވި އެވެ.

"މިހާރު ކިހިނެއްތޯ ތިބޭފުޅާ އަތުގައި އޮތް ހަލާލު އެއްޗެއް. އޮވެފައި ތިމަންނަ ބޭނުމޭ ލަކުޑި ބުރިއެއް، ކަލޭ ކަލޭ އަތުގައި އޮތް ރަންބުރި ދޭށޭ ތިމަންނައަށް. އެއީއެއް ނޫންތޯ މި ބުނާ އެއްޗަކީ. އަޅުގަނޑުމެންގެ ހަލާލު ފައިސާއެއް ނޫންތޯ އެއީ. ކިހިނެއްތޯ އަޅުގަނޑުގެ އޮތް އެއްޗެއް އަތުލަން ދިމާކުރަނީ. އެއަށް ކިޔާނީ ފޭރުން. އެ ފޭރިގެންނެއް ނުވާނެ އިނގޭތޯ،" އޭނާ ވިދާޅުވި އެވެ.

ސިޔާމް މި މޭރުމުން ވާހަކަ ދެއްކެވިއިރު، ޓޫރިޒަމް ސިނާއަތުގައި ހަރަކާތްތެރިވާ އެހެން ދިވެހި ވިޔަފާރިވެރިން ވެސް ވަނީ ޑޮލަރު މާރުކުރުމުގެ ސިޔާސަތާ ދެކޮޅު ކަން ހާމަކުރައްވާފަ އެވެ. އަދި އެ ގޮތަށް ޑޮލަރު މާރުނުކުރެވޭނެ ކަން އަންގައި އެ ގަވާއިދު ބަދަލުކުރަން މަރުކަޒީ ބޭންކު، އެމްއެމްއޭ އާއި ސަރުކާރުގައި އެ ވިޔަފާރިތަކުން އެދިފައިވެ އެވެ.

އެކަމަކު ސަރުކާރާއި އެމްއެމްއޭގެ ވެސް ވިސްނުން ހުރީ މިހާރު އޮތް ގޮތަށް ގަވާއިދު ބާއްވައިގެން ޑޮލަރު މާރުކުރުން ތަންފީޒުކުރާށެވެ. އަދި މީގެ ސަބަބުން ރާއްޖެއަށް ދިމާވެފައިވާ ޑޮލަރު ތާށިކަމުގެ މައްސަލަ ހައްލުވެ، ކަޅު ބާޒާރުގައި ބޮޑު އަގުގައި ޑޮލަރު ވިއްކުން ހުއްޓުވަން މަގުފަހި ކުރެވޭނެ ކަމަށް ވެސް ސަރުކާރުން އަންނަނީ ބުނަމުންނެވެ.

މި ފަހުން ބޭއްވި ނޫސްވެރިންގެ ބައްދަލުވުމެއްގައި އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވީ ޓޫރިޒަމް ވިޔަފާރިތަކަށް ހުރި ފައިނޭންސިން މައްސަލަތައް ވެސް ހައްލުކުރެވޭނީ މި ގޮތަށް ސިޔާސަތު ތަންފީޒުކޮށްގެން ކަމަށެވެ. އަދި އެ ސިނާއަތުގެ ކަންބޮޑުވުމެއް ހުރި ނަމަ މަޝްވަރާގެ މޭޒަށް އަންނަން އޭނާ އެ ދުވަހު ދައުވަތު ދެއްވި އެވެ.

އޭގެ އިތުރުން ރައީސް ޑރ. މުހައްމަދު މުއިއްޒު ވެސް ވަނީ، މިހާރު ގެނެސްފައިވާ ބަދަލުތަކަކީ ޑޮލަރު މައްސަލައިގެއް ހައްލު ކަމަށް ސިފަކުރައްވާ އެކި މަންސަތަކުގައި ވާހަކަ ދައްކަވައިފަ އެވެ.