ބްރިކްސްގެ ގައުމުތައް ގުޅިގެން އުފައްދާ ކަރެންސީއަށް އެމެރިކާ ޑޮލަރު ރިޕްލޭސް ނުކުރެވޭނެ ކަމަށް އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް އެކްސްގައި ކުރި ޕޯސްޓެއްގައި ވިދާޅުވީ ބްރިކްސްގެ ގައުމުތަކުން އެމެރިކާ ޑޮލަރާ ދުރަށް ދާން މަސައްކަތް ކުރާ ތަން ބަލާކަށް ދެނެއް އެމެރިކާއިން ބަލާކަށް ނުތިބޭނެ ކަމަށެވެ.

އެ ގޮތުން ބްރިކްސްއިން އުފައްދާ ފައިސާއާ އެކު ކުރިއަށް ދާން ބޭނުންވާ ގައުމުތައް އެކަން ހާމަކުރަން ޖެހޭކަން ފާހަގަކުރައްވާ ޓްރަމްޕް ވިދާޅުވީ އެފަދަ ކަމެއް ކުރާ ގައުމެއް 100 ޕަސަންޓް ޓެރިފްއާ ކުރިމަތިލާން ޖެހޭނެ ކަމަށެވެ.

"ބްރިކްސް ކަރަންސީއަށް އިސްކަންދީ އެމެރިކާ ޑޮލަރު ބޭނުން ކުރުން ހުއްޓާލާ ގައުމުތަކަށް އެމެރިކާގެ އިގްތިސާދަށް އެ ފައިސާއެއް ނުވިއްކޭނެ. ބައިނަލްއަގުވާމީ ވިޔަފާރީގައި ބްރިކްސްއަށް އެމެރިކާ ޑޮލަރު ނޫން ފައިސާއެއް ބޭނުން ކުރުމަކީ ވާނެކަމެއްް ނޫން،" ޓްރަމްޕް ވިދާޅުވި އެވެ.

ބްރިކްސްގައި ހިމެނެނީ ބްރެޒިލް، ރަޝިއާ، އިންޑިއާ، ޗައިނާ، ދެކުނު އެފްރިކާ، އިރާން، މިސްރު، އިތިއޯޕިއާ އަދި ޔޫއޭއީ އެވެ. އިތުރު 34 ގައުމަކުން ވަނީ ބްރިކްސްގައި ބައިވެރިވުމަށް އެކްސްޕްރެޝަން އޮފް އިންޓްރެސްޓް ފާޅުކޮށްފަ އެވެ.

ބްރިކްސްގެ ގައުމުތަކުން އަމިއްލަ ކަރަންސީއެއް އުފެއްދުމަށް 2023 ގައި އެ ހިޔާލު ހުށަހެޅުއްވީ ބްރެޒިލްގެ ރައީސް ލުއިސް އިނާސިއޯ ލޫލާ ޑަ ސިލްވާ އެވެ. އެކަމާ ގުޅިގެން މަޝްވަރާތަކެއް ކުރެވުނު ނަމަވެސް، ގޮތްތަކެއް މިހާތަނަށް ނިންމިފައެއް ނުވެ އެވެ.