ސްވިމިން އެސޯސިއޭޝަން އޮފް މޯލްޑިވްސް އިން ކުރިއަށްގެންދިޔަ ބެންކް އޮފް މޯލްޑިވްސް (ބީއެމްއެލް) ފަސް ވަނަ ކިޑްސް ސްވިމިން ފެސްޓިވަލުން މޯލްޑިވްސް ލައިފްގާޑް އެސޯސިއޭޝަން (އެމްއެލްއޭ) އިން ބޮޑު ކާމިޔާބެއް ހޯދައިފި އެވެ.

އެމްއެލްއޭ އިން ވަނީ މުބާރާތުގެ ހުރިހާ ކެޓަގަރީއަކުން އެއް ވަނަ ހޯދައިފަ އެވެ.

އެ ގޮތުން، އެމްއެލްއޭ އިން ވަނީ، ކިޑްސް އޭ ކެޓަގަރީ (2016 އާއި 2017) ވަނަ އަހަރުގެ އަންހެން ކުދިންނާއި ފިރިހެން ކުދިންގެ ބައިން އެއް ވަނަ ހޯދައި، ކިޑްސް ބީ ކެޓަގަރީ (2014 އާއި 2015) ވަނަ އަހަރު އަންހެން ކުދިންނާއި ފިރިހެން ކުދިންގެ ބައިން އެއް ވަނަ ހޯދުމުގެ އިތުރުން، ކިޑްސް ސީ ކެޓަގަރީ (2013) ވަނަ އަހަރުގެ އަންހެން އަދި ފިރިހެން ކުދިންގެ ބައިން އެއް ވަނަ ހޯދައިފަ އެވެ.

ކްލަބް ބޮޑުރިޔާގެ ކުދިންތަކެއް ތަށްޓާ އެކު.--- ފޮޓޯ: ސްވިމިން އެސޯސިއޭޝަން އޮފް މޯޯލްޑިވްސް

ކްލަބް ބޮޑުރިޔާ އިން ވަނީ، ކިޑްސް އޭ ކެޓަގަރީގެ ފިރިހެން ބައިން ދެ ވަނަ އާއި އަންހެން ބައިން ތިން ވަނަ، ކިޑްސް ބީ ކެޓަގަރީގެ ފިރިހެން ބައިން ދެ ވަނަ އާއި އަންހެން ބައިން ތިން ވަނަ އަދި ކިޑްސް ސީ ކެޓަގަރީން އަންހެން ބައިން ދެ ވަނަ އަދި ފިރިހެން ބައިން ތިން ވަނަ ހޯދައިފަ އެވެ.

ދެން އެންމެ ނަތީޖާ ރަނގަޅީ، ނިއު ލެގޫން ސްވިމިން ކްލަބްގެ އެވެ. އެ ގޮތުން އެ ކްލަބުން ވަނީ، ކިޑްސް އޭ ކެޓަގަރީގެ އަންހެން ބައިން ދެ ވަނަ، ކިޑްސް ބީ ކެޓަގަރީގެ އަންހެން ކެޓަގަރީން ދެ ވަނަ، އަދި ކިޑްސް ސީ ކެޓަގަރީގެ އަންހެން ބައިން ދެ ވަނަ ހޯދުމުގެ އިތުރުން، ކިޑްސް ބީ ކެޓަގަރީގެ ފިރިހެން ބައިން ތިން ވަނަ އަދި ކިޑްސް ސީ ކެޓަގަރީގެ ފިރިހެން ބައިން ތިން ވަނަ ހޯދައިފަ އެވެ.

ނިއު ލެގޫން ސްވިމިން ކްލަބްގެ ކުދިން ތަށްޓާ އެކު،--- ފޮޓޯ: ސްވިމިން އެސޯސިއޭޝަން އޮފް މޯލްޑިވްސް

މޫދު މާލިމީން ވަނީ ކިޑްސް އޭ ކެޓަގަރީގެ ފިރިހެން ބައިން ތިން ވަނަ ހޯދައިފަ އެވެ.

ކިޑްސް ފެސްޓިވަލްގައި މި ފަހަރު އަށް ކްލަބަކުން ވާދަކުރި އެވެ. ކްލަބް ބޮޑުރިޔާ އިން އެންމެ ގިނަ ކުދިން ވާދަކުރިއިރު، އެ ކްލަބުން އެކަނި 76 ކުދިން ފެނިގެންދިޔަ އެވެ.

ދެން ވާދަކުރި ކްލަބްތަކަށް ބަލާއިރު، އަކުއަފީނާ އިން 30 ކުދިން، ގާޑިއަން ސްޕޯޓްސް ކްލަބް އިން 25 ކުދިން، އެމްއެލްއޭ އިން 61 ކުދިން، މޫދު މާލިމީ އިން 28 ކުދިން، ނިއު ލެގޫންސް ސްވިމިން ކްލަބުން 43 ކުދިން، ސޯލްޓެޑް ވެންޗާސް ސްވިމާސް އިން 15 ކުދިން، އަދި ސްޕޯޓްސް ނޭޗާ އިން 40 ކުދިންގެ އިތުރުން، އެއްވެސް ކްލަބަކާ ނުގުޅި 107 ކުދިންނެވެ.