ވެރިކަން ކުރާ ޕީއެންސީ އެތެރޭގެ އިންތިހާބުގެ ވޯޓުލުން ކުރިއަށް ދަނިކޮށް ތ. ކަނޑޫދޫ ދާއިރާއަށް ވާދަކުރި ދެ ކެންޑިޑޭޓުންގެ މެދުގައި ހަމަނުޖެހުން ހިންގައި ވޯޓު ފޮށި ފަޅާލައިގެން ވޯޓު ކަރުދާސްތައް ގެއަށް ގެންގޮސްފި އެވެ.

އާންމުވެފައިވާ ވީޑިއޯއިން ފެންނަނީ އެ ރަށުގައި ބަހައްޓާފައި ހުރި ވޯޓު ފޮށްޓެއް ކައިރިއަށް މީހަކު ގޮސް ކައިރިވާން މަސައްކަތް ކުރުމުން އިތުރު މީހަކު ގޮސް ބައްދާ ތަނެވެ. ދެ މީހުން ބައްދައިގަނެގެން އޮޅުލަމުން ގޮސް ބިންމައްޗަށް ވެއްޓޭ މަންޒަރު ވެސް ވީޑިއޯއިން ފެނެ އެވެ.

އެކަމާ ގުޅިގެން ކަނޑޫދޫ ކައުންސިލުގެ ރައީސް، އަހުމަދު ރީހާންއަށް ގުޅުމުން ވިދާޅުވީ އެކަން ހިނގީ މެންދުރުފަހު 2:30 ހާއިރު ކަމަށެވެ. އަދި ހަމަނުޖެހުން ހިންގި ދެ ކެންޑިޑޭޓުންގެ ތެރެއިން އެކަކު ވޯޓު ފޮށި ފަޅާލައި ކަރުދާސްތައް އޭނާގެ ގެއަށް ގެންގޮސްފައިވާ ކަމަށް ވެސް ރީހާން ވިދާޅުވި އެވެ.

"ވޯޓާސް ލިސްޓަށް އައި ބަދަލަކާ ގުޅިގެން ދެ މީހުން ހިތްހަމަނުޖެހިގެން ކަމަށް އަޅުގަނޑަށް މައުލޫމާތު ލިބެނީ، ވޯޓު ފޮށި ފަޅާލާފައި އޮތީ ދެން ކަރުދާސްތައް އެތަނުން ކެންޑިޑޭޓެއް ގެންގޮސްފައިވީ،" ރީހާން ވިދާޅުވި އެވެ.

ޕީއެންސީގެ އެތެރޭގެ އިންތިހާބުގެ ވޯޓުލުން މިއަދު ކުރިއަށް ގެންދިޔައީ ހެނދުނު 10:00 އިން މެންދުރުފަހު 2:00 އަށެވެ.

33500 މީހުންނަށް ވޯޓުލުމުގެ ހައްގު ލިބުނު އިންތިހާބުގައި 1984 މަގާމަކަށް އައްޔަނު ކުރާނެ އެވެ. މާލެ އާއި އަތޮޅުތެރޭގެ 88 ރަށެއްގައި ވޯޓުލުން ކުރިއަށޤ ގެންދިޔަ އިންތިހާބުގެ ނަތީޖާ އިއުލާނު ކުރަން އަދި ނުފަށަ އެވެ.

ޕީއެންސީގެ އެތެރޭގެ އިންތިހާބު ފުރަތަމަ ބާއްވަން ތާވަލު ކުރީ އޮކްޓޫބަރު 19، ގަ އެވެ. އޭގެފަހުން ނޮވެމްބަރު 9، އަކަށް އިންތިހާބު ފަސްކުރުމަށްފަހު، މިއަދަށް އިންތިހާބު އަނެއްކާވެސް ފަސް ކުރީ އެވެ.

ޕީއެންސީގެ އެތެރޭގެ އިންތިހާބަށް ކުރިމަތިލި ކެންޑިޑޭޓުންގެ ލިސްޓު ނޮވެމްބަރު 13، ގައި އިއުލާނު ކުރިއިރު، ބައެއް ކެންޑިޑޭޓުންގެ ނަން އުނިކޮށް، ކުރިމަތި ނުލާ މީހުންގެ ނަން އިތުރު ކޮށްފައި ހުރުމުން ވަރަށް ބޮޑަށް މައްސަލަ ގޯސްވި އެވެ.

އެ ހިތްހަމަ ނުޖެހުމުގައި ބައެއް ކެންޑިޑޭޓުން އެމީހުންގެ ނަން ވެސް އަނބުރާ ގެންދިޔަ އެވެ.