ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލީހުގެ ގޮނޑި ގެއްލޭ ގޮތަށް، ގާނޫނުއަސާސީ ބަދަލު ކުރަން ހުށަހަޅާފައިވާ ބިލް، ގާނޫނުއަސާސީއާ ހިލާފު ކަމަށް، ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.

މަޖިލިސް މެންބަރުން ޕާޓީ ބަދަލުކޮށްފިނަމަ ނުވަތަ ޕާޓީއިން ވަކިކޮށްފި ނަމަ ގޮނޑި ގެއްލޭ ގޮތަށް ގާނޫނުއަސާސީއަށް ގެންނަ އިސްލާހު ހިމެނޭ ގޮތަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލު މިއަދުގެ ޖަލްސާއަށް އެޖެންޑާކޮށްފައި ވަނީ އާންމުކޮށް ބިލް ކުރިއަށް ގެންދިޔުމުގެ މަރުހަލާތައް ކުރުކޮށްލާ ގޮތަށެވެ.

އެ ބިލަށް ބަހުސްކޮށް، ކޮމިޓީން ވެސް ނިންމައި، ބިލް ފާސްކުރާނެ ކަމަށް ޕީއެންސީގެ ބައެއް މެންބަރުން "އަދަދު" ނޫހަށް ވިދާޅުވި އެވެ. އަދި ރައީސް ޑރ. މުހައްމަދު މުއިއްޒު މިރޭ ރާއްޖޭން ބޭރަށް ފުރައިވަޑައިގަތުމުގެ ކުރިން ބިލް ތަސްދީގު ކުރައްވާނެ ކަމަށް އެ މެންބަރުން ވިދާޅުވި އެވެ.

ރައްޔިތުންގެ މަޖިިލީހުގެ މެންބަރުންގެ މިނިވަންކަން ކަށަވަރު ވެފައި އޮތުމަކީ ގާނޫނު އަސާސީގެ އެެންމެ އަސާސީ އެއް ސިފަ ކަމަށާއި، އެއީ ހެޔޮ ރިޔާސީ ނިޒާމެއް ހިންގުމަށް ހަމަ ކޮންމެހެން ލާޒިމު ކަމަކަށް ވާއިރު މެންބަރުންގެ މިނިވަންކަން ގެއްލޭ ގޮތަށް ގާނޫނުއަސާސީ ބަދަލުކުރުން ވެސް ގާނޫނުއަސާސީއާ ހިލާފުވާނެ ކަމަށް އަލީ ހުސައިން ވިދާޅުވި އެވެ.

ގާނޫނުއަސާސީ ބަދަލުކުރަނީ، ޕާޓީ ބަދަލުކޮށްފި ނަމަ އިސްތިއުފާ ދޭންޖެހޭނެ ކަމަށް ބުނާ އެންޓި ޑިފެކްޝަން ގާނޫނުގެ މާއްދާ އުވާލަން ހައި ކޯޓަށް މައްސަލައެއް ހުށަހަޅާފައި ވަނިކޮށެވެ. އަދި ވެރިކަން ކުރާ ޕީއެންސީގެ މަޖިލިސް މެންބަރުންގެ ތެރެއިން ބައެއް މެންބަރުން އެ ޕާޓީން ވަކިވާން އުޅޭކަމުގެ އަޑުތައް ވެސް ފެތުރިފައި ވަނިކޮށެވެ.

ގާނޫނުއަސާސީގެ 261 ގައި ބަޔާންކޮށްފައިވާ ގޮތުން ގާނޫނުއަސާސީ އަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމުލަ މެންބަރުންގެ ހަތަރުބައިކުޅަ ތިންބައިގެ އަގުލަބިއްޔަތުންނެވެ. އެހެންވެ، ޕާޓީ ބަދަލު ނުކުރެވޭ ގޮތަށް ގާނޫނު އަސާސީ ބަދަލުކުރެވޭނީ 70 މެންބަރުންގެ ވޯޓުންނެވެ.