އިއްޔެ ރާއްޖެއަށް ކުރި ވިއްސާރައިގައި ޅ. ކުރެންދޫގައި ފެންބޮޑުވެ، އެރަށުގެ 104 ގެއަކަށް ގެއްލުން ލިބިފައިވާ ކަމަށް ނޭޝަނަލް ޑިޒާސްޓާ މެނޭޖުމެންޓު އޮތޯރިޓީން މިއަދު ބުނެފި އެވެ.

އެންޑީއެމްއޭއިން އެކްސްގައި ކުރި ޕޯސްޓެއްގައި ބުނީ ގެއްލުން ލިބުނު ގެތަކުގެ މީހުންނަށް ބޯހިޔާވަހިކަމާއި ކެއުންބުއިން ކުރެންދޫ ކައުންސިލާ ގުޅިގެން، އެންޑީއެމްއޭއިން ފޯރުކޮށްދީފައިވާ ކަމަށެވެ.

ރަށުގައި ބޮޑުވި ފެންގަނޑު ހިންދުމަށް އެރަށުގައި ހުރި ޕަމްޕެއް ބޭނުން ކޮށްގެން އަދި ކޯރު ކަނޑައިގެން ފެން ހިންދުމުގެ މަސައްކަތް ކުރި ކަމަށް އެންޑީއެމްއޭއިން ބުންޏެވެ. އެގޮތުން ކުރި މަސައްކަތުން ރޭގެ 12 ޖެހުމާ ހަމައަށް ސިފައިންގެ އެހީތެރިކަމާއެކު ފެންގަނޑު ހިންދައިލެވުނު ކަމަށް އެންޑީއެމްއޭއިން ބުންޏެވެ.

ރާއްޖެއަށް މިހާރު ކުރަމުންދާ ވިއްސާރައިގެ އަސަރު ދެކުނާއި މެދުރާއްޖެތެރޭގެ އަތޮޅުތަކާއި އުތުރުގެ އަތޮޅުތަކަށް ކޮށްފައިވާ ކަމަށް އެންޑީއެމްއޭއިން ބުންޏެވެ.

ވިއްސާރައިގެ ސަބަބުން އެކިވަރުގެ ގެއްލުން ލިބިގެން ކުރެންދޫގެ އިތުރުން ސ. ފޭދޫ އާއި ދ. ބަނޑިދޫގެ އިތުރުން ދ. ހުޅުދެލިން ވެސް ރިޕޯޓު ލިވިފައިވާ ވެސް ކަމަށް އެންޑީއެމްއޭއިން ބުންޏެވެ.