"މިއަދަކީ ޒަމާންތަކަކަށް ފަހު، ދިވެހީން ދިވެހީންގެ ރާއްޖެއަށް އަލުން އެނބުރި ދިޔުމުގެ ހާއްސަ ދަތުރަށް ރިޔާ ކޮށާލި ދުވަސް. މި ވަގުތަކީ ދިވެހީންގެ އުންމީދުތައް ހާސިލުކޮށްދީ، ކަންބޮޑުވުންތައް ހައްލުކޮށްދިނުމުގެ ލޮބުވެތި ވިންދުތައް އަޅުގަނޑުމެންގެ ހިތްތަކުން ޖަހަމުންދާ ވަގުތު."

ދިވެހި ޖުމްހޫރިއްޔާގެ ހަތްވަނަ ރައީސް، ޑރ. މުހައްމަދު މުއިއްޒު، ނޮވެމްބަރު 17، 2023، ގައި ޖުމްހޫރީ މައިދާނުގައި ހުވާ ކުރެއްވުމަށް ފަހު، އެ ދަރުބާރަށް އެއްވެ ތިބި ރައްޔިތުންނާ މުހާތަބު ކުރައްވައި ވިދާޅުވި އުއްމީދީ މި ބަސްކޮޅަށް މިއަދު ހަވީރު ބަރާބަރު އަހަރެއް ފުރޭއިރު، ފަހަތަށް ދިޔަ 365 ދުވަހަށް ވިސްނައި ފިކުރު ހިންގައި، ނަފުސާ ސުވާލުކޮށްލާށެވެ.

އެ ވިދާޅުވި ކަންބޮޑުވުންތައް ހައްލެއް ލިބިއްޖެ ހެއްޔެވެ؟ ނުވަތަ ހައްލެއް ލިބޭނެ ކަމުގެ އުއްމީދެއް އެބަ އޮތް ހެއްޔެވެ؟

ރިޔާސީ އިންތިހާބުގެ ކެމްޕޭނުގައި ޕީއެންސީ ކެންޑިޑޭޓު، ރައީސް މުއިއްޒު އާއި އޭރު މައި އިދިކޮޅު ޕާޓީގެ ގޮތުގައި އޮތް ޕީޕީއެމް އަދި ޕީއެންސީން ވެސް އަޑު އުފުލި ކަންބޮޑުވުންތަކަކީ، ނުހައްގުން ރައީސް ޔާމީނު ޖަލަށް ލާފައި ހުރުމާއި، އިންޑިއާގެ އަސްކަރިއްޔާ ރާއްޖޭގައި ގާއިމުވެފައި އޮތް އޮތުމާއި ރާއްޖޭގެ ދެކުނު ކަނޑުގެ ސަރަހައްދެއް ގެއްލުމެވެ. އަދި، އިގުތިސާދާއި ދަރަނީގެ ވާހަކަ އެވެ.

ޔާމީންގެ ނަން ޖެހި ހުސް ގޮނޑި ބަހައްޓައިގެން ކުރެއްވި ކެމްޕޭނުގައި ރައީސް މުއިއްޒު ދެއްވި ކޮންމެ ތަގުރީރެއް، ބިސްމި އާއި ހަމްދު ސަލަވާތުން ފެއްޓެވުމަށް ފަހު، އިސްކަން ދެއްވީ ޔާމީން ޖަލުގައި ބަންދުކޮށްފައި ހުރި ދުވަހުގެ އަަދަދު ވިދާޅުވުމާއި، އެ މަނިކުފާނު ޖަލަށް ލާފައިވަނީ ނުހައްގުން ކަމާއި، އެކަމަށް ނިމުން ގެންނާނެ ކަމުގެ ޔަގީންކަށް ސަޕޯޓަރުންނަށް ދެއްވުމަށެވެ.

ކެމްޕޭނުގައި 550 އަށް ވުރެ ގިނަ ފަހަރު ޔާމީންގެ ނަން ރައީސް މުއިއްޒު ވިދާޅުވުމަކީ ވެރިކަން ކާމިޔާބު ކުރަން ޔާމީން ސަޕޯޓަރުން މުހިންމުވި މިންވަރެވެ. ނަމަވެސް، ދެ ވަނަ ބުރުން އިންތިހާބު ކާމިޔާބުވުމަށް ފަހު، ޔާމީން ވީ "ފަތަފޮޅިދަށުލީ ފަތްގަނޑަށެވެ."

ނަތީޖާއަކަށްވީ ޔާމީން ޕީޕީއެމް ދޫކުރައްވައި، ޕީއެންއެފްގެ ނަމުގައި އާ ޕާޓީއެއް އުފެއްދެވުމެވެ. އެއަށް ފަހު ސިޔާސީ ދައުވާ އާއި ހަރާމް ހުކުމުގެ ވާހަކަ ނިމި، ޔާމީނަށް ބަހުގެ ހަމަލާތައް އެންމެ ބޮޑަށް ދެއްވަން ފެށީ ރައީސް މުއިއްޒުގެ އަރިހުގައި ތިއްބެވި، ކުރިން ޔާމީންގެ މިތުރުން، އަދި މިހާރު ސިޔާސީ ހަތުރުންނެވެ.

ވެރިކަން ބަދަލުކުރަން ޖެހުނު ކަމަށް ރައީސް މުއިއްޒު ވިދާޅުވަމުން ދިޔަ ފުރަތަމަ ކަންބޮޑުވުމަށް އަދިވެސް ބަދަލެއް ނާދެ އެވެ. ޔާމީންގެ މައްޗަށް އުފުލާފައިވާ ދައުވާތަކަށް ބަދަލެއް ނާދެ އެވެ. މައްސަލަތައް ކޯޓުގައި ކުރިއަށް އެބަ ދެ އެވެ. ނަމަވެސް އެއީ މިއަދު އެ ބޭފުޅުންނަށް ނުހައްގު ދައުވާއެއް ނޫނެވެ.

އިންޑިއާ އަސްކަރިއްޔާ

ރާއްޖޭގައި ގާއިމުވެފައި އޮތް އިންޑިއާ އަސްކަރިއްޔާއާ ދެކޮޅަށް އުފުލި އަޑުވެސް، ހުވައާއެކު ކެނޑެމުން ކެނޑެމުން ގޮސް ނިވުނީ، ކުރިން ޕީޕީއެމް/ޕީއެންސީން އިންޑިއާއާ ދެކޮޅަށް ދެެއްކީ ހަގީގަތެއް ނެތް ވާހަކަތަކެކޭ ބުނެވޭހާ ވެސް ބޮޑަށެވެ.

އިންޑިއާގެ އަސްކަރިއްޔާ ގާއިމުވެފައި އޮތް އޮތުމަށް ނިމުން ގެންނާނެ ކަމަށް ވެވަޑައިގެންނެވި ވައުދު މެއި 10، 2024، ގެ ނިޔަލަށް ފުދިއްޖެ ކަމަށް ރައީސް މުއިއްޒު ނިންމެވީ އިންޑިއާގެ ހުރިހާ ސިފައިން ބޭލިއްޖެ ކަމަށް ވިދާޅުވެފަ އެވެ.

ޔުނިފޯމު އެޅި އިންޑިއާގެ އަސްކަރީ މީހުންގެ ބަދަލުގައި އިންޑިއާއިން ފޮނުވީ ޓެކްނިކަލް މީހުންނެވެ. އެއީ މަދަނީ މީހުން ކަމަށް ދިވެހިން ސަރުކާރުން ބުނެ އެވެ. އެއީ އިންޑިއާގެ އަސްކަރިއްޔާއާ ގުޅުމެއް ނެތް މަދަނީ ބައެއްކަން ސަރުކާރުން ކަށަވަރުކޮށް ދެނީ ހަމައެކަނި އަނގަ ބަހުން ބުނާ ބުނުމަކުންނެވެ.

"ދިވެހި ރައްޔިތުންގެ މިނިވަންކަމާއި، ސިޔާދަތީ ރަތް ރޮނގު ފިސާރި ފަލަކޮށް ދަމާނަން" ކަމަށް ވިދާޅުވިޔަސް، އިންޑިއާގެ ދެ ހެލިކޮޕްޓަރާއި ޑޯނިޔާ މަތިންދާބޯޓު އަދިވެސް އެބަ އޮތެވެ. އެ އުޅަނދު ދުއްވަނީ ދިވެހިންނެއް ނޫނެވެ. އިންޑިއާއިން ފޮނުވި ޓެކްނިކަލް މީހުންނެވެ.

ޕީޕީއެމް އިދިކޮޅުގައި އޮތް އިރު، އިންޑިއާއާ ދެކޮޅަށް ކުރިއަށް ގެންދިޔަ އިންޑިއާ އައުޓު ކެމްޕޭނުގައި ކުރިއަށް ގެންދިޔަ އެއްވުމެއްގައި މިހާރުގެ ޑިފެންސް މިނިސްޓަރު ގައްސާނާއި އިކޮނޮމިކް މިނިސްޓަރު ސައީދު. -- ފޮޓޯ: އަދަދު

"ރައީސުލްޖުމްހޫރިއްޔާއަށް އަންނަ ބޭފުޅަކު ކެމްޕޭނު ޕޯޑިއަމެއްގައި ހުންނަވާފައި ވަރަށް ސާފުކޮށް ހުރިހާ ރަށެއްގައި އިންޑިއާގެ އަސްކަރިއްޔާ ދިވެހިރާއްޖެއިން ބާލާނަމޭ ވިދާޅުވެ، މަގުމަތީ ފޮތި ދަމާފައި މޭމަތީ ބޮޑެތި އަކުރު ޖަހައިގެން ހިންގަވާފައި ވެރިކަމަށް ވަޑައިގެން މިވަރުގެ ބޮޑު ޔޫޓާނެއް ނެންގެވުން އެއީ ގައުމަށް ވެވޭ ވަރަށް ބޮޑު ހިޔާނާތެއް. ހަމަ ހިޔާނާތެއް ގޮތަށް ނޫނީ އެކަން ސިފަ ނުކުރެވޭނެ،" ކުރީގެ ހޯމް މިނިސްޓަރު އުމަރު ނަސީރު ވިދާޅުވި އެވެ.

ކުރީގެ ރައީސް ޔާމީން ވެސް މި މޭރުމުން ވާހަކަ ދައްކަވައި، ވިދާޅުވެފައި ވަނީ އިންޑިއާ އަސްކަރިއްޔާ ރާއްޖޭގައި ދެމި އޮތް ކަމަށެވެ. އެހެންވެ، މިއީ ސީދާ ކަނޑައެޅިގެން އޮޅުވައިލުމުގެ އުކުޅެކެވެ. މިއީ އިންޑިއާ އަސްކަރިއްޔާ ބޭރުކުރަން ވީ ވައުދާ ކަނޑައެޅިގެން ހިލާފުވުމެވެ.

ފޯޅަވައްސާއި އައްޑުއާ ދެމެދު އޮތް ކަނޑުގެ ސަރަހައްދުން ބައެއް ރާއްޖޭން ދޫކޮށްލީ ގާނޫނުއަސާސީއާ ހިލާފަށް ކަމަށް ރައީސް މުއިއްޒުގެ އިތުރުން ޕީޕީއެމް/ޕީއެންސީން ބުނެ އެވެ. ނަމަވެސް ފޯޅަވަހި ކަނޑު އަނބުރާ ހޯދުމުގެ މަސައްކަތުގައި މިހާތަނަށް އެއްވެސް ކާމިޔާބެއް ނުލިބެ އެވެ. އަދި ހާމަކުރަން ބުނި އިންޑިއާގެ އެއްބަސްވުންތައް ވެސް ހާމައެއް ނުކުރެ އެވެ.

އިންޑިއާ އައުޓު ކެމްޕޭނަކީ ރައްޔިތުންނަށް ހަގީގަތް އޮޅުވާލުމުގެ އަމަލެއް ކަމަށް މިހާރު ބުނެވެން އޮތީ، އޭރު އެ ވާހަކަ ގޮވި، މިހާރު ވެރިކަމުގައި ތިއްބެވި ބޭފުޅުންގެ ބަހާއި އަމަލު ދިމާ ނުވާތީ އެވެ.

ގުޅުންހުރި ބައެއް ލިޔުން

މަތިބަރު, ހަރަދު ބޮޑު ސަރުކާރެއް

ރައީސް މުއިއްޒު ވައުދުވެވަޑައިގަތީ އިސްރާފު ކުޑަ، މަތި ބަރު ނޫން ސަރުކާރެއް ގާއިމުކޮށް، އިގުތިސާދު ހަމައަކަށް އެޅުވުމަށެވެ.

"ތިޔަބޭފުޅުންގެ އުންމީދުތަކާއި އަޅުގަނޑު އެކުލަވައިލާ ސަރުކާރުގެ ވާޖިބުތައް އަދާކުރުމާ، މި ދެމެދުގައި އޮތް ވަޅުގަނޑެއް. މި ދަންނަވާ ވަޅުގަނޑަކީ، ދިވެހިރާއްޖޭގެ އިގުތިސާދު މިއަދު ވެއްޓިފައި މި އޮތް ފުން އަނދަވަޅު. މިއަދު އަޅުގަނޑުމެން ދިވެހި ދައުލަތާ ހަވާލުވާއިރު، ދިވެހި ދައުލަތުގެ ދަރަނި ވަނީ އެކު ޖުމުލަ 119 ބިލިއަން ރުފިޔާއަށް އަރާފައި. މިއީ ރާއްޖޭގެ މުޅި މާލީ ހަޔާތުގައިވެސް ދިވެހި ތާރީހު ދުށް އެންމެ ބޮޑު ދަރަނި. އެހެން ނަމަވެސް، މިކަންކަމުން އަރައިގަތުމަށްޓަކައި އިރާދަކުރެއްވިއްޔާ، އަޅުގަނޑުމެން ނިކަން ހަރުދަނާ، ވަރަށް ހަލުވި ފިޔަވަޅުތައް އަޅާނަން،" ހުވާކުރެއްވި ދަރުބާރުގައި ދެއްވި ތަގުރީރުގައި ރައީސް މުއިއްޒު ވިދާޅުވި އެވެ.

ހާލަތު ރަނގަޅަށް އެނގިވަޑައިގެން ހުންނަވައި ރައީސް މުއިއްޒު އެޅުއްވި ފިޔަވަޅުތަކުން ކަންކަން ގޯސްވަމުން ދިޔަ އެވެ. ސިޔާސީންގެ އަދަދު 700 ގައި ހިފަހައްޓަން ވައުދުވި ނަމަވެސް، އެކަމެއް ނުވި އެވެ. މަތި ބަރުކޮށްލީ ޖުމުލަ ސިޔާސީ މުވައްޒަފުންގެ އަދަދު ވެސް ރަސްމީކޮށް ހާމަކޮށްލަން ނުކެރޭ ވަރަށެވެ.

ރައީސް ޑރ. މުހައްމަދު މުއިއްޒުގެ ސަރުކާރުން 2280 ސިޔާސީ ވަޒީފާ އުފެއްދި ކަމަށާއި އެ މީހުންނަށް މުސާރަ ދިނުމަށް ދައުލަތުގެ ބަޖެޓުން މަހަކު 40 މިލިއަން ރުފިޔާ ހަރަދުކުރާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވަނީ ވިދާޅުވެފަ އެވެ. އެއީ އަހަރަކަށް ބަލާނަމަ، 480 މިލިއަން ރުފިޔާ އެވެ.

ސިޔާސީ ބޭނުމުގައި ކުންފުނިތަކަށް ވައްދާފައިވާ މީހުންގެ ހަރަދާއި، އިސްރާފުގެ ސަބަބުން ބަޖެޓަށް ބާރުބޮޑުވެ އެންމެ ފަހުން، މުވައްޒަފުންގެ އަދަދު މަދުކޮށް، މުސާރަ ވެސް ކުޑަކުރަން ވަނީ މަޖުބޫރުވެފަ އެވެ.

ރައީސް މުއިއްޒުގެ ސަރުކާރު 22 މިނިސްޓްރީގެ މައްޗަށް އެކުލަވާލުމަކީ ވެސް ހަރަދު ބޮޑުވި ސަބަބެކެވެ. މަތިބަރު މި ސަރުކާރުގެ ބައެއް މިނިސްޓްރީތަކުން ނަތީޖާއެއް ނުފެނެ އެވެ. މިނިސްޓްރީތަކުގައި ދުވެއްޔެއް ނެތެވެ. ނަމަވެސް 50 ބިލިއަން ރުފިޔާ ހުސްވެއްޖެ އެވެ.

މި ވެރިކަމުގައި ދައުލަތުގެ ރިޒާވް މައިނަސްވި އެވެ. އަތް ނުލާން ބުނި އެސްޑީއެފްގައި ހުރި ފައިސާކޮޅު ވެސް ބޭނުން ކޮށްފި އެވެ. މި ހުރިހާ ކަމެއް ދިމާވީ ހަރަދު ކުޑަނުކުރުމުގެ ސަބަބުންނެވެ.

މަޝްރޫއުތައް ފުލުން ދިޔުން

ރައީސް މުއިއްޒު ކުރެއްސެވި ދިވެހީންގެ ރާއްޖެއިން ފެނިގެން ދަނީ ކަނޑު އަޑީގެ ޓަނަލާއި ގިނަގުނަ އެއާޕޯޓުތަކާއި، ވެރިރަށް ހެދިދާނެ ވަރުގެ ސަހަރު، ރަސްމާލެ އާއި، ދެކުނާއި އުތުރުގެ ތަރައްގީގެ ގުޅިފައިވާ މަޝްރޫއުތަކުން ބަދަލުވެގެންދާ ތަނާއި، ހަތް އާބަން ސެންޓަރާއި، ޒަމާނީ ހޮސްޕިޓަލްތަކާއި އިންޓަނޭޝަނަލް ޕޯޓުތަކެވެ.

މާލޭގެ މައްސަލަތަކަށް ހައްލު ހޯދަން މޭޔަރުކަމުގައި އިއުލާނުކުރި މަޝްރޫއުތައް ކުރިއަށް ނުދިޔައީ ވެސް އޭރު އޮތް އެމްޑީޕީ ސަރުކާރުން ފުރުސަތު ނުދިނުމުގެ ސަބަބުން ކަމަށް ރައީސް މުއިއްޒު ތަކުރާރުކޮށް ވިދާޅުވަމުން ގެންދެވި އެވެ. އެހެންވެ، ވެރިކަމުގައި ހަލުއި ސްޕީޑު ފެންނާނެ ކަމަށް އުއްމީދު ކުރެވުނެވެ.

ނަމަވެސް، 50 ބިލިއަން ރުފިޔާގެ ބަޖެޓު ހުސްވިއިރު، މާލޭގެ އިތުރުން އެހެން ރަށެއްގައި ވެސް މި ސަރުކާރުގެ ފާހަގަކޮށްލެވޭ މަޝްރޫއެއް ކުރިއަކަށް ނުގެންދެވުނެވެ.

"މިފާއިތުވި އެއް އަހަރު ތެރޭގައި ވެސް އެއް ބިލިއަން ޑޮލަރުގެ ލޯނު ނަގައިގެން ގައުމަށް، ރައްޔިތަކަށް އެއްވެސް މަންފާއެއްވާނެ ކަމެއް ނުކޮށް، ސިޔާސީ އަންބޮނޑި ބަނުން ނޫން ކަމެއް ނުކުރައްވާ،" ރައީސް މުއިއްޒު ވެރިކަމަށް ގެނައުމަށް، ދެ ވަނަ ބުރުގައި ތާއިދު ކުރެއްވި ވެލިދޫ ދާއިރާގެ މިހާރުގެ މެންބަރު މުހައްމަދު އައްބާސް ވިދާޅުވި އެވެ.

"މަކަރުވެރި ސިޔާސަތުގެ ތެރެއިން ރައްޔިތުންގެ ލޯބި ހޯދަން ފޮނި ތަގުރީރު ދިނުން ނޫން ކަމެއް ނުކުރޭ. ރައްޔިތުން ނިކަމެތިވާނެހާ ކަމެއް ކޮށްފައި މިބުނަނީ ތިމަން މަނިކުފާނު މިހުރީ ރައްޔިތުންގެ ފަޅީގައޭ."

ގދ. ތިނަދޫ ފަޅުގައި ތަރައްގީކުރަން ވިދާޅުވި ބިޔަ މަޝްރޫއު އާއި ވިލިނގިލީ ފަޅުގައި ތަރައްގީ ކުރަން ވިދާޅުވި މަޝްރޫއު އާއި އައްޑޫ ބުރިޖާއި، ގާދޫ ޕާޓޯއި، ވިލިމާލޭގައި ހައުސިން ޔުނިޓު އިމާރާތް ކުރުމާއި މާލޭ ހިޔާ ސަރަހައްދުގައި ބިނާކުރަން ވައުދުވި ފްލެޓުތަކާއި އަރަބިއްޔާ ސްކޫލާއި، ރައްޔިތުންގެ މަޖިލީހުގެ އިންތިހާބާ ދިމާކޮށް ކަޑަ ޖެހި ގިނަ މަޝްރޫއުތައް ހުރީ ހަމަ ކަޑަޖެހި ހިސާބުގަ އެވެ.

ހެޔޮވެރިކަން އުސޫލުތައް ނެތި، ހުދުމުހުތާރު ވެރިކަމެއްގެ ސިފަ

އެމަނިކުފާނުގެ ވެރިކަމެއްގައި ސިޔާސީ ގޮތުން ބަދަލު ހިފުން ނުފެންނާނެ ކަމަށް ރައީސް މުއިއްޒު ވިދާޅުވި އެވެ. ނަމަވެސް އެންމެ އަރިހުގައި ހުންނެވި، ރައީސް އޮފީހުގެ މިނިސްޓަރު އާދަމް ރަމީޒު ވަކިކުރެއްވި އެވެ. އޭނާގެ ކުރީގެ އަނބިކަނބަލުން ފާތިމަތު ޝަމްޒާނު ޖަލަށްލީ، ތުއްތު ކުއްޖެއް އޮއްވަ އެވެ. ސިހުރު ހެދިކަމަށް ތުހުމަތު ކުރި ނަމަވެސް، ދައުވާ ކުރެވޭނެ އެއްޗެއް، ކަމެއް ނެތެވެ.

ހިޔާނާތުގެ މައްސަލަތައް އަމިއްލަ އިސްނެންގެވުމަށް ބައްލަވާނެ ކަމަށް ވެސް ރައީސް މުއިއްޒު ވިދާޅުވި އެވެ. ހިޔާނާތުގެ އެންމެ ބޮޑު ތުހުމަތު އޮތް އެއްބޭފުޅަކީ ރައީސް މުއިއްޒެވެ. އެ މަނިކުފާނުގެ ފަރާތުން މަޖިލީހުގެ މެންބަރުންނަށް ފައިސާ ދޭ ކަމަށް ކުރެވޭ ތުހުމަތާއި، ސިޓީ ކައުންސިލުގައި ހުންނެވިއިރު، ހިންގެވި ކަމަށް ތުހުމަތު ކުރެވޭ ގިނަ މައްސަލަތަކެވެ.

ސިޓީ ކައުންސިލްތަކުގެ އެތައް މައްސަލައެއް އޭސީސީގައި އެބަ އޮތެވެ. އެކަންކަން ސާފުކޮށް ބަލައި ހާމަކުރަން ހިތްވަރު ދިނުމުގެ ބަދަލުގައި އިވިގެން މިދިޔައީ އެ ކޮމިޝަންގެ ރައީސް އާއި ނައިބު ރައީސް އައްޔަން ކުރުމުގެ ބާރު އެމަނިކުފާނު ނަންގަވާކަމުގެ ވާހަކަ އެވެ.

ފެންނަމުން މިދަނީ ހެޔޮވެރިކަމުގެ އުސޫލުތަކާ ދުރަށް ޖެހި ބާރުތައް މުށުތެރެއަށް ޖަމާކުރާ މަންޒަރެވެ. މިހާރު އޮތް ގާނޫނުއަސާސީ އެކުލަވައިލީ، ކުރީގެ ރައީސް މައުމޫން އަބްދުލްގައްޔޫމުގެ ދިގު 30 އަހަރުން އަތްޕުޅަށް ޖަމާކޮށްފައި ހުރި ބާރުތައް ރޫޅައިލުމަށެވެ.

ނަމަވެސް، ރައީސް މުއިއްޒުގެ ވެރިކަމަށް އެއް އަހަރު ނުވަނީސް، ފެނިގެން މިދަނީ ދިވެހިންގެ މިހާރުގެ ޖީލު ތެދުވެ، ދަލާއި ލޭ އޮހޮރުވައިގެން ގެނައި ގާނޫނުއަސާސީގެ އަސްލުތަކާއި ރޫހާ ހިލާފުވަމުންދާ ތަނެވެ. މިނިވަން މުއައްސަސާތަކުގެ ވެރިން ރައީސް އައްޔަން ކުރައްވާ ގޮތަށް ބަދަލުކުރުމަކީ އެފަދަ ކަމެކެވެ.

އެއީ ހިޔާނާތުގެ މައްސަލަ ބަލާ މުއައްސަސާއަށް ރައްޔިތުންގެ އިތުބާރު އެއްކޮށް ގެއްލިގެންދާނެ ކަމެކެވެ. އަދި މައުމޫނުގެ ވެރިކަމުގައި އިލެކްޝަން ކޮމިޝަނަރު އައްޔަން ކުރާ އުސޫލުން، މިހާރު އޮތް ކޮމިޝަންގެ ރައީސް އާއި ނައިބު ރައީސް ރައީސުލްޖުމްހޫރިއްޔާ އައްޔަން ކުރެއްވުމަކީ، އިންތިހާބުތަކަށް އޮންނަ އިތުބާރު ގެއްލިގެންދާނެ ކަމެކެވެ.

~

މިއީ އެންމެ އަހަރެއްގެ ބައެއް ސަފުހާތަކެވެ. ފެނިގެން ދިޔައީ ވީ ވައުދާ ހިލާފުވި މަންޒަރެވެ. އެހެންވެ، ބާކީ އޮތް ހަތަރު އަހަރު ހެޔޮ ވެރިކަމެއް ފެންނާނެ ކަމާމެދު ސުވާލު އުފެދެ އެވެ.