މިދިޔަ އަހަރު ސެޕްޓެމްބަރު 30، ގައި ބޭއްވި ރިޔާސީ އިންތިހާބުގެ ދެވަނަ ބުރު ކާމިޔާބު ކުރެއްވުމަށްފަހު އޭރު ޕީއެންސީ ކޯލިޝަނުގެ ލީޑަރުގެ ގޮތުގައި ހުންނެވި ކުރީގެ ރައީސް އަބްދުﷲ ޔާމީނު، ޖަލުން ގެއަށް ބަދަލުކުރެއްވުމަށް ރައީސް ޑރ. މުހައްމަދު މުއިއްޒު އެދިނުލައްވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ރާއްޖެ ޓީވީއަށް ދެއްވި ހާއްސަ އިންޓަވިއުއެއްގައި ސޯލިހު މިހެން ވިދާޅުވީ، އިންތިހާބަށްފަހު ޔާމީނު ގެއަށް ބަދަލުކުރީ ރައީސް މުއިއްޒުގެ އެދިލެއްވުމަށް ކަމަށް ތަކުރާރުކޮށް އެމަނިކުފާނު ވިދާޅުވެފައި ވަނިކޮށެވެ. ޔާމީނު ވަނީ އެކަން ދޮގުކުރައްވާ، ގެއަށް ބަދަލުކުރީ ސޯލިހު ކަމަށް މި ފަހުން ވިދާޅުވެފަ އެވެ.

އެގޮތުން އިންތިހާބު އޮތް ރޭ ކުރެއްވި ފޯނު ކޯލާއި ޖެހިގެން އައި ދުވަހު ރައީސް އޮފީހުގައި ބޭއްވި ބައްދަލުވުމުގައިވެސް އެފަދަ ވާހަކައެއް ރައީސް މުއިއްޒު ނުދައްކަވާ ކަމަށް ސޯލިހު ވިދާޅުވި އެވެ. ބައްދަލުވުމުގައި ރައީސް އާއެކު ބައިވެރިވުމަށް ވަޑައިގެންނެވި މިހާރު މަޖިލީހުގެ ރައީސް އަބްދުއްރަހީމް އަބްދުﷲ ވެސް ޔާމީނު ގެއަށް ބަދަލުކުރުމަށް އެދިނުލައްވާ ކަންވެސް އެމަނިކުފާނު ފާހަގަކުރެއްވި އެވެ.

ފޯނު ކޯލު އަޑުއިވުނު އަދި ބައްދަލުވުމުގައި ބައިވެރިވެވަޑައިގެންނެވި ބޭފުޅުންގެ ނަންތައް ހާމަކުރައްވާ ސޯލިހު ވިދާޅުވީ އެ ފޯނުން އަދި ރައީސް އޮފީހުގައި ވެސް އެމަނިކުފާނު ރައީސް މުއިއްޒުއަށް މަރުހަބާ ދެންނެވި ކަމަށެވެ. އަދި އިންތިހާބުގެ އިންތިޒާމުތަކާއި ބާރުތައް ބަދަލުކުރުމަށް ދެއްވާ އެއްބާރުލެއްވުމަށް ރައީސް މުއިއްޒު، ސޯލިހަށް ޝުކުރު ދެންނެވި ކަމަށްވެ އެވެ.

"އަޅުގަނޑު އެހެން ދެންވީމަ ހައިރާންކަމެއް އެ ދެ ބޭފުޅުންނަށް ލިބުނު. އަޅުގަނޑަށް ހަމަ ޔަގީންވި އޭރު އެބޭފުޅުންނަށް އެނގިވަޑައިނުގަންނަވާކަން. ނުވެސް އެނގޭނެ، އެނގޭތޯ."

އަދި، ޔާމީނު ގެއަށް ބަދަލުކުރަން ނިންމިކަން ސޯލިހު، ރައީސްގެ އަރިހުގައި ދެންނެވީ ރައީސް އޮފީހުގައި ބޭއްވި ބައްދަލުވުމުގައި ކަމަށާއި އޭރު އެ ނިންމެވުމުގެ މައުލޫމާތު ވެސް ރައީސަށް އެނގިނުލައްވާނެ ކަމަށްވެސް ސޯލިހު މިއަދު ވިދާޅުވި އެވެ.

"އެއީ އެއްވެސް ހާލެއްގަ [އޭރުގެ] އިންތިހާބީ ރައީސް އެދިވަޑައިގަންނަވައިގެން އަދި މިހާރުގެ ރައްޔިތުންގެ މަޖިލީހުގެ ރައީސް އެދިވަޑައިގަންނަވައިގެން ކުރި ކަމެއް ނޫން."

ސޯލިހު ވިދާޅުވި ގޮތުގައި، ރައީސް އޮފީހުގައި ބޭއްވި ބައްދަލުވުމަށްފަހު ޔާމީނު މިހާރު މާލެ ވަޑައިގަތުމަށް ލޯންޗުގައި އިންނެވި ކަމާއި މަރުހަބާ ދަންނަވަން ވަޑައިގަންނަވަން ވާނެ ކަމަށް ރައީސާއި އަބްދުއްރަހީމުގެ އަރިހުގައި އެމަނިކުފާނުދެންނެވި އެވެ.

އިންތިހާބީ ރައީސްގެ ގޮތުގައި ހުންނަވާ، ރައީސް މުއިއްޒު ސޯލިހުއާ ބައްދަލުކުރެއްވީ އޮކްޓޯބަރު 1، 2023 ގެ މެންދުރު ފަހު އެވެ. ޔާމީނު ގެއަށް ބަދަލުކުރީ އެ ދުވަހު ހަވީރު އެވެ.