މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރު ކުރުމަށާއި ދެމެހެއްޓެނިވި ގޮތެއްގައި އިގުތިސާދު ކުރިއެރުވުމުގެ އެއްބަސްވުމެއްގައި ދަ ނޭޗާ ކޮންސާވަންސީ (ޓީއެންސީ) އާއެކު ރާއްޖެއިން ސޮއިކޮށްފި އެވެ.

ފިނޭންސް މިނިސްޓަރީން މިއަދު ނެރުނު ނޫސްބަޔާނެއްގައި ބުނީ އެ އެއްބަސްވުމުގައި ސޮއި ކުރީ ކޮޕް-29 ގެ ތެރެއިން ކަމަށެވެ.

އެ ރަސްމިއްޔާތުގައި ވާހަކަ ދައްކަވަމުން ފިނޭންސް މިނިސްޓަރު، މޫސާ ޒަމީރު ވިދާޅުވީ ގުދުރަތީ ގޮތުން ދިމާވާ ގޮންޖެހުންތަކާ ގުޅުންހުރި ހައްލުތަކަށް ދެމެހެއްޓެނިވި ފައިނޭންސިން ހޯދުން ރާއްޖޭގެ ކުރި އެރުމަށް ވަރަށް މުހިންމު ކަމަށެވެ. އަދި އެއްބަސްވުމަކީ ފާގަތި މުސްތަގުބަލަކާ ދިމާލަށް އެޅޭ ފިޔަވަޅެއް ކަމަށް ވެސް ޒަމީރު ވިދާޅުވި އެވެ.

މިއަދު ސޮއި ކުރި އެއްބަސްވުމުގެ ދަށުން ލިބޭ ފައިސާ ހަރަދު ކުރާނީ ތިމާވެށި ހިމާޔަތް ކުރުމުގެ މަސައްކަތަށާއި ރަށްރަށުގެ އިގުތިސާދު ކުރިއެރުވުމުގެ އިތުރުން މޫސުމަށް އަންނަ ބަދަލުތަކާ ކުރިމަތިލުމުގެ ގާބިލުކަން އިތުރު ކުރަން ކަމަށް ފިނޭންސް މިނިސްޓަރީން ބުންޏެވެ.

އެ އެއްބަސްވުމުގެ ދަށުން ކުރެވޭ މަސައްކަތުން ރާއްޖޭގެ މެދުރާސްތާ މެކްރޯ ފިސްކަލް ސްޓެބިލިޓީ އާއި ދަރަނީގެ ދެމެހެއްޓެނިވިކަން ކަށަވަރު ކުރުމަށް އިތުރު ބާރެއް ލިބިގެންދާނެ ކަމަށް ފިނޭންސް މިނިސްޓަރީން ބުންޏެވެ.

ޓީއެންސީ އަކީ ތިމާވެށި ހިމާޔަތް ކުރުމުގެ ދާއިރާގައި ދުނިޔޭގެ 70 އަށްވުރެ ގިނަ ގައުމުތަކުގައި މަސައްކަތް ކުރަމުންދާ ޖަމިއްޔާ އެކެވެ.