އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) އަށް ރައީސުލްޖުމްހޫރިއްޔާއަށް ނުފޫޒު ފޯރުވޭ ގޮތަށް އެ ދެ ކޮމިޝަނުގެ ވެރިން އައްޔަނު ކުރުމުގެ ބާރު ދިނުމަށް ބިލުތަކެއް ހުށަހަޅާފައިވާ ދަނޑިވަޅެއްގައި އެ ދެ ކޮމިޝަނުގެ މެންބަރުންތަކެއް ވަކިކުރުމުގެ މައްސަލަ މަޖިލީހުން ބަލަން ފަށައިފި އެވެ.

މިއަދު މަޖިލީހަށް ވެއްދީ އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ މުހައްމަދު އަދި އީސީގެ ނައިބު ރައީސް އަލީ ނަޝާތާއި މެންބަރުން ކަމަށްވާ ޑރ. މުހައްމަދު ޒާހިރުގެ އިތުރުން މުހައްމަދު އާސިފް ވަކިކުރުމަށެވެ. އެ މެންބަރުންގެ އިތުރުން ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހު ވަކިކުރުމުގެ މައްސަލަ ވެސް މަޖިލީހުން ވަނީ މިއަދު ބަލަން ފަށާފަ އެވެ.

ނާސިހުއާ ދެކޮޅަށް އޮކްޓޯބަރު 21, ގައި މިނިވަން މުއައްސަސާތަކުގެ ކޮމިޓީއަށް ވަނީ މައްސަލައެއް ހުށަހަޅާފަ އެވެ. އެއީ ކޮމިޝަނުގެ ރައީސްގެ މަގާމުގެ މަސްއޫލިއްޔަތުތަކާއި ކޮމިޝަނުގެ މެންބަރުކަމުގެ މަގާމާ އެކަށީގެންވާ އަމަލުތަކެއް ނާސިހު ކޮށްފައިވާ ކަމަށް ތުހުމަތުކޮށް ހުށަހެޅި މައްސަލައެކެވެ.

އީސީގެ މެންބަރުން ވެސް ސުލޫކީ މިންގަނޑާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ވަނީ އޮކްޓޯބަރު 22, ގައި މައްސަލައެއް ހުށަހަޅާފަ އެވެ. އެކަމަކު ކުރަނީ ކޮން ތުހުމަތުތަކެއް ކަމެއް ނޭނގެ އެވެ.

އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ ވަކިކުރަން ހުށަހެޅީ އެންޓި ކޮރަޕްޝަން ކޮމިޝަނުގެ ގާނޫނުގެ 17 ވަނަ މާއްދާގެ ހ. އަދި ށ. އާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ލިބިފައިވާ ދެ މައްސަލައަކާ ގުޅިގެންނެވެ.

މި ތިން މައްސަލަ ވެސް ދިރާސާކުރާނީ މިނިވަން މުއައްސަސާތަކުގެ ކޮމިޓީންނެވެ. މިނިވަން މުއައްސަސާތަކުގެ މެންބަރުންނަށް ތުހުމަތުކޮށް މަޖިލީހަށް ލާފައިވާ ހުރިހާ މައްސަލައެއްގެ ތަފްސީލު ވަނީ ސިއްރުކޮށްފަ އެވެ.

އިތުބާރު ނެތް ކަމުގެ މައްސަލަ ހުށަހަޅާފައި އެންމެންނަކީ ވެސް ކުރީ ސަރުކާރުގެ ދުވަސްވަރު އަދި ރައްޔިތުންގެ މަޖިލީހުގައި އިދިކޮޅު މައި ޕާޓީ، އެމްޑީޕީގެ ސުޕަ މެޖޯރިޓީ އޮތް ދުވަސްވަރު އެ މުއައްސަސާތަކަށް އައްޔަންކޮށްފައިވާ މެންބަރުންނެވެ.

ސީއެސްސީއަށް ނާސިހު އައްޔަނުކުރީ ސެޕްޓެމްބަރު 3، 2020، ގަ އެވެ. އީސީއަށް ނަޝާތު ދެ ވަނަ ދައުރަކަށް އައްޔަނުކުރީ މިދިޔަ އަހަރުގެ ނޮވެމްބަރު 16، ގަ އެވެ. ޑރ. ޒާހިރު ފެބްރުއަރީ 21, 2021، ގައި އަދި އާސިފް އައްޔަނުކުރީ ސެޕްޓެމްބަރު 6، 2021، ގަ އެވެ. އޭސީސީއަށް ތޯހާ އަދި އަބްދުއްސަލާމް އައްޔަނުކުރީ މާޗު 17، 2022، ގަ އެވެ.

މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު މިނިވަން މުއައްސަސާއެއްގެ މެންބަރުންތަކެއް ވަކިކުރަން މަޖިލީހުން މަސައްކަތް ފެށި ފުރަތަމަ ފަހަރެވެ.