ދަރަނި ދެއްކޭނެ ކަމުގެ އިތުބާރު ދަމަހައްޓަން އުފައްދާފައިވާ ސޮވެރިން ޑިވެލޮޕްމަންޓު ފަންޑު (އެސްޑީއެފް) އަށް ޖަމާކުރި ޑޮލަރުގެ ތެރެއިން ބައެއް ފައިސާ ބޭނުންކޮށްފައިވާ ކަމަށް ސަރުކާރުން ފުރަތަމަ ފަހަރަށް އެއްބަސްވެއްޖެ އެވެ.

މިކަން ހާމަކުރައްވަމުން ރޭ ބޭއްވި ޖުމްހޫރި ދުވަހުގެ ޖަލްސާގަައި ރައީސް ޑރ. މުހައްމަދު މުއިއްޒު ވިދާޅުވީ، އެމަނިކުފާނު މި އަހަރުގެ މިހާތަނަށް އެ ފަންޑަށް 78 މިލިއަން ޑޮލަރު ޖަމާކޮށްފައިވާ ކަމަށެވެ. މިއާ ވިއްދައި ދެން ވިދާޅުވީ ޖުމްލައިގައި ރައީސް ވަނީ އެ ފަންޑުން ބައެއް ބޭނުންތަކަށް ފައިސާ ބޭނުންކޮށްފައިވާ ކަމަށް އިއުތިރާފުވެވަޑައިގެންފަ އެވެ.

"ދެން އޭގެން ބޭނުން އެކި ފަހަރު، އެކި ޕޭމަންޓްސްތައް ހެދުމަށް ރައްޔިތުންގެ ހައްގުގައި އަޅުގަނޑުމެން ޕޭމަންޓްސް ހަދާ، އަނެއްކާ އެ ރިކަވާ، ރިޕްލޭސް ކުރަނީ. އެހެންވީމަ އަޅުގަނޑުމެންގެ އަމާޒަކީ 78 މިލިއަނުން 100 މިލިއަން ޑޮލަރަށް، އަދި ގޮސް މި އަންނަ އަހަރު ނިމެންވާއިރަށް 150 މިލިއަން ޑޮލަރާ ހަމައަށް ވެސް ގެންދިޔުން،" ރައީސް ވިދާޅުވި އެވެ.

ރައީސް މިކަން ހާމަކުރެއްވި އިރު، އެއްވެސް ބޭނުމަކަށް އެސްޑީއެފްގައި ހުރި ފައިސާ ބޭނުންކުރި ކަމަކަށް ސަރުކާރުން ނުބުނެ އެވެ. ސަރުކާރުން ނުބުނި ނަމަވެސް، އިތުބާރު ހުރި މަސްދަރުތަކާ ހަވާލާދީ "އަދަދު" އިން ވާނީ އެސްޑީއެފްގައި ހުރި ފައިސާ އެކި ފަހަރު މަތިން ބޭނުންކޮށްފައިވާ ކަމުގެ ހަބަރުތައް ގެނެސްދީފަ އެވެ.

މައުލޫމާތު ހޯދައި ލިބިގަތުމުގެ ހައްގުގެ ދަށުން ފިނޭންސް މިނިސްޓްރީން ހުށަހަޅައިގެން ހޯދި މައުލޫމާތުން ދައްކާ ގޮތުގައި އެސްޑީއެފްގައި ހުރި ޑޮލަރު ބޭނުންކުރީ ރަސްމީ ޑޮލަރު ރިޒާވު ރަނގަޅު ކުރުމަށެވެ. މިކަން އެނގެނީ މިދިޔަ އޮގަސްޓު 15، ގައި އެސްޑީއެފްގައި 56 މިލިއަން ޑޮލަރާ ގާތްކުރާ އަދަދަކަށް ހުރުމަށް ފަހު، އެ މަސް ނިމުނުއިރު ހުރި ފައިސާގެ އަދަދު 49 މިލިއަން ޑޮލަރަށް ވެއްޓިފައިވާތީ އެވެ.

އޭގެ ފަހުން ވެސް ސަރުކާރުން ވަނީ ޑޮލަރު ބޭނުންވެގެން އެސްޑީއެފްގައި ހުރި ފައިސާ ނަގައި، ބޭނުންކޮށްފަ އެވެ. މި ނޫހަށް މައުލޫމާތު ދިން މީހުން ބުނި ގޮތުގައި މިދިޔަ މަހުގެ 10، ގެ ނިޔަލަށް އެސްޑީއެފްގައި ހުރީ 20 މިލިއަން ޑޮލަރެވެ. އެ ފަންޑުން ނެގި ފައިސާގެ ތެރޭގައި އެޗްޑީސީގެ ލޯނެއް ދައްކަން ނެގި ފައިސާ ވެސް ހިމެނޭ ކަމަށް ވެސް އެ މީހުން ބުންޏެވެ.

އެސްޑީއެފްއިން ފައިސާތަކެއް ބޭނުންކުރި ކަމަށް ރައީސް ވިދާޅުވި ނަމަވެސް، ރައީސްގެ ވާހަކައިގެ ތެރެއިން އެކަމާ ގުޅޭ އިތުރު ތަފުސީލެއް ނުދެއްވަ އެވެ. އެހެންކަމުން އެ ފަންޑަށް 78 މިލިއަން ޑޮލަރު ޖަމާކުރި ނަމަވެސް މިހާރު އެ ފަންޑުގައި ހުރި ކިހާ ޑޮލަރެއް ކަމެއް ނޭނގެ އެވެ.

ރިޒާވުގެ ހާލަތު ދަށް ވުމާ ގުޅިގެން މި ނޫހުން ވާހަކަ ދެއްކި ތަޖުރިބާކާރުން އޭރު ވެސް ބުނީ، އިތުރު ފައިސާތަކެއް ނުލިބޭ ނަމަ އެސްޑީއެފްގައި އަތްލާން ޖެހޭނެ ކަމަށެވެ. ނަމަވެސް މިކަމަށް ރައްދުދީ ސަރުކާރުގެ އިސް ފަރާތްތަކުން ބުނަމުން ދިޔައީ ރިޒާވުގެ ހާލަތު ރަނގަޅުކޮށް، ހަރަދުތައް ހަމަޖައްސާނީ އެ ފަންޑުގައި ހުރި ފައިސާ ބޭނުންނުކޮށް ކަމަށެވެ.