އާބަން ސެންޓަރުތަކުގެ ގޮތުގައި ތަރައްގީކުރާނެ ހަތް ރަށް ސަރުކާރުން މިއަދު އިއުލާނުކޮށްފި އެވެ.

އަތޮޅުތައް ތަރައްގީ ކުރުމުގައި ހަތް ރަށެއް، އާބަން ސެންޓަރުގެ ގޮތުގައި ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

އެ ވައުދާ އެއްގޮތަށް ތަރައްގީކުރާ ރަށްތަކަކީ؛

• ރ. އުނގޫފާރު
• ބ. އޭދަފުށި
• ޅ. ނައިފަރު
• އދ. މަހިބަދޫ
• ފ. ނިލަންދޫ
• ދ. ކުޑަހުވަދޫ
• ލ. ފޮނަދޫ

"އަދަދު" ނޫހަށް މައުލޫމާތު ލިބިފައިވާ ގޮތުގައި މި ލިސްޓަށް ފޮނަދޫ ހިމެނީ އެންމެ ފަހު ވަގުތު އެވެ.

ލ. އަތޮޅު ކައުންސިލްގެ ރައީސް އިސްމާއީލް އަލީ މިދިޔަ ބުރާސްފަތި ދުވަހު ފޭސްބުކްގައި ކުރެއްވި ޕޯސްޓެއްގައި ހިމަނާފައިވާ ލިޔުމުގައި އާބަން ސެންޓަރުގެ ގޮތުގައި ލ. ގަން ހިމަނާފައިވެ އެވެ.

އެ ރަށް އުނިވީ ކީއްވެ ކަމެއް ނޭނގެ އެވެ.

ރައީސް މައުމޫނުގެ ވެރިކަމުން ފެށިގެން ކޮންމެ ވެރިކަމެއްގައި ވެސް ގަން ތަރައްގީ ކުރުމަށް އިސްކަން ދީފައިވެ އެވެ.

ނަމަވެސް މި ވެރިކަމުގައި ފޮނަދޫ އަށް އިސްކަން ދޭން ފަށާފައި ވާއިރު، ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަކީ އެ ރަށަށް އުފަން އެ ދާއިރާގެ މެންބަރު، އަބްދުއްރަހީމް އަބްދުﷲ އެވެ.

މާލެ ސަރަހައްދުގެ އިތުރުން ދިރިއުޅޭ އާބާދީގައި 10،000 މީހުން ހަމަވަނީ ހަމައެކަނި ސ. ހިތަދޫ އަދި ހދ. ކުޅުދުއްފުށީގަ އެވެ.

ރައީސް މުއިއްޒުގެ މެނިފެސްޓޯގައިވާ ގޮތުން ހއ. އަތޮޅާއި، ހދ. އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީގެ ޒޯނުގައި، މައި ހަބަކީ ހދ. ކުޅުދުއްފުއްޓެވެ. އަދި ގއ. އަތޮޅާއި، ގދ. އަތޮޅާ، ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްގީގެ ޒޯނުގައި، މައި ހަބަކީ އައްޑޫ ސިޓީ އެވެ.