މިހާރު ކުރިއަށްދާ މައިލޯ ވޮލީބޯލް އެސޯސިއޭޝަން ކަޕުގައި ދިވެހި ސިފައިންގެ ކްލަބް އާއި ސިޓީ ސްޕޯޓްސް ކްލަބުން މޮޅުވުމުގެ ރެކޯޑް ދަމަހައްޓައިފި އެވެ.

މި މުބާރާތުގައި އިއްޔެ ތިން މެޗު ކުޅެފައިވާއިރު, އިއްޔެގެ ފުރަތަމަ މެޗުގައި, ސިޓީ ސްޕޯޓްސް ކްލަބުން ވަނީ ބްލޫސް ފޯ ވޮލީބޯލްގެ މައްޗަށް ސީދާ ތިން ސެޓުން ކުރިހޯދައިފަ އެވެ. މި މެޗުގެ ސެޓުތައް ދިޔައީ, 25-19, 25-20 އަދި 25-21 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ސިޓީ ސްޕޯޓްސްގެ އިޝާން މުހައްމަދު (ބަޓިސް) އެވެ.

އިއްޔެގެ ދެވަނަ މެޗުގައި ދިވެހި ސިފައިންގެ ކްލަބުން ނުކުތީ, ކްލަބް ހާފް ލައިން ލިންކޭޖްއާ ދެކޮޅަށެވެ. މި މެޗު ދިވެހި ސިފައިންގެ ކްލަބުން ކާމިޔާބުކުރީ ސީދާ ތިން ސެޓުންނެވެ. މެޗުގެ ސެޓުތައް ދިޔައީ, 25-14, 25-16 އަދި 25-20 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ އާދަމް ނަސީމް (އެޑަމް) އެވެ. މިއީ މި މުބާރާތުގައި ސިފައިން ކުޅުން ދެވަނަ މެޗެވެ. ސިފައިން ވަނީ ފުރަތަމަ މެޗުގައި ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) ގެ މައްޗަށް 3-2 ސެޓުން ކުރިހޯދައިފަ އެވެ.

އިއްޔެގެ ތިންވަނަ މެޗުގައި ޕޮލިސް ކްލަބުން ނުކުތީ ސްޕޯޓްސް ކްލަބް ސިޓީއާ ދެކޮޅަށެވެ. މި މެޗު ސިޓީ އިން ކާމިޔާބުކުރީ 3-2 ސެޓުންނެވެ. މި މެޗުގެ ސެޓުތައް ދިޔައީ, 23-25, 25-16, 20-25, 25-23 އަދި 14-16 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ, ސިޓީގެ ހަސަން ނިލާމް (ޕާޓޭ) އެވެ.

މި މުބާރާތުގައި ސިޓީ އިން ކުޅުނު ފުރަތަމަ މެޗުގައި ސިޓީ ސްޕޯޓްސް ކްލަބްގެ މައްޗަށް 3-1 ސެޓުން ކުރިހޯދައިފަ އެވެ. އަދި ދެވަނަ މެޗުގައި, ބްލޫސް ފޯ ވޮލީބޯލްގެ މައްޗަށް ސިޓީން ކުރިހޯދީ ވެސް 3-1 ސެޓުންނެވެ.