ޓޫރިޒަމްގެ މަންޒިލެއްގެ ގޮތުގައި ދަރަވަންދޫ އިޝްތިހާރުކުރަން "ވިޒިޓް ދަރަވަންދޫ" ގެ ނަމުގައި އެރަށު ކައުންސިލުން ހާއްސަ ހަރަކާތެއް ފަށައިފި އެވެ.

ދަރަވަނދޫ ކައުންސިލުގެ ރައީސް އަލީ ސަމީހު "އަދަދު" އަށް ވިދާޅުވީ އެ ހަރަކާތަކީ ކައުންސިލުން އެކުލަވައިލި ތަރައްގީގެ ޕްލޭނުގައި ހިމެނޭ ކަމެއް ކަމަށެވެ. އެ ޕްލޭނުގައި އޮތީ ޓޫރިޒަމްގެ މަންޒިލެއްގެ ގޮތުގައި ދަރަވަންދޫ އިޝްތިހާރުކުރަން ދެމިގެންދާ ގޮތެއްގައި ހަރަކާތެއް ހިންގާށެވެ.

"ތަރައްގީ ޕްލޭން އެކުލަވައިލިއިރުގަ އަޅުގަނޑުމެން ހިމަނާފަ އެބައޮތް ދަރަވަންދޫއަކީ ޑެސްޓިނޭޝަނެއްގެ ގޮތުގައި ޕްރޮމޯޓުކުރުން. އެ ޝިއާރުގެ ދަށުން ޑެސްޓިނޭޝަނަކަށް ދަރަވަންދޫ ފަތުިރުވެރިންގެ މަގުބޫލު މަންޒިލަކަށް ހެދުމަށްޓަކައި ހިންގޭ ހަރަކާތްތަކުގެ ތެރެއިން އެއް ހަރަކާތް މި ވިޒިޓް އިޔާ ފާހަގަކުރުން" ސަމީހު ވިދާޅުވި އެވެ.

އެ ހަރަކާތުގެ ތެރެއިން އަންނަ އަހަރުގެ ކޮންމެ މަހަކު ވަކި ތީމް އެއްގެ ދަށުން ދަރަވަންދޫ ޕްރޮމޯޓުކުރުމުގެ މަސައްކަތް ކުރިއަށް ގެންދާނެ ކަމަށް ވެސް އޭނާ ވިދާޅުވި އެވެ. މިމަހުގެ 24 ވަނަ ދުވަހު އެ ހަރަކާތް އިފްތިތާހު ކުރަން ހާއްސަ ރަސްމިއްޔާތެއް ބާއްވާނެ ކަމަށް ވެސް އޭނާ ވިދާޅުވި އެވެ.

ސަމީހު ވިދާޅުވި ގޮތުގައި ދަރަވަންދޫގެ ޕްރޮމޯޝަނަލް ލަވައަކާއި ލޯގޯއެއް ލޯންޗުކުރުން، އެ ރަސްމިއްޔާތުގައި އޮންނާނެ އެވެ.

އެ ހަރަކާތުގައި ކައުންސިލާއި މަދަނީ ޖަމިއްޔާ އަދި ރައްޔިތުންނާ ގުޅިގެން ކުރާނެ ކަމަކީ އޭނާ ވިދާޅުވި ގޮތުގައި ދަރަވަންދޫއަށް މީހުން އަންނަން ޖެހޭ ސަބަބުތަކެއް އުފެއްދުމެވެ. ބޭރުގެ ޓޫރިސްޓުންގެ އިތުރުން ދަރަވަންދުއަށް ޒިޔާރަތްކުރާ ދިވެހިން ވެސް އިތުރުކުރަން އަމާޒުކޮށްގެން ހިންގާ އެ ހަރަކާތް 2030 ހަމައަށް ދެމިގެންދާނެ ކަމަށް ވެސް އޭނާ ވިދާޅުވި އެވެ.

ދަރަވަންދޫގެ އާބާދީ އަކީ 997 އެވެ. ޑޮމެސްޓިކް އެއާޕޯޓެއް ހިންގާ އެރަށުގައި 14 ގެސްޓްހައުސް ހިންގަ އެވެ އެއީ 250 ޓޫރިސްޓް އެނދެވެ.