ގިޔާސުއްދީން އިންޓަނޭޝަނަލް ސްކޫލްގެ ފުޓްބޯލް ޑިވަލޮޕްމެންޓް ޕާޓްނަރަކަށް އެސްޕަޔާ ފުޓްބޯލް އެކަޑަމީ ހަމަޖައްސައިފި އެވެ.

ފުޓުބޯޅައިގެ ޒުވާން ޖީލެއް ބިނާކުރުމުގެ މަގުސަދުގައި މިދިޔަ އަހަރު ޑިސެމްބަރު މަހު އުފެދުނު އެސްޕަޔާ ފުޓުބޯޅަ އެކަޑަމީން ވަނީ އެ އެކަޑަމީގެ ކޯޗުންގެ ގޮތުގައި ފެންވަރު ރަނގަޅު ކޯޗުންތަކެއް ހަމަޖައްސައިފަ އެވެ.

އެސްޕަޔާ އެކެޑަމީން ދާދި ފަހުން ވަނީ ރާއްޖޭގެ އެންމެ ކާމިޔާބު ޔޫތު ފުޓްބޯޅަ ޓީމު، ކްލަބް އީގަލްސްގެ ޔޫތު ލެވަލްގެ ކަންކަމާ ހަވާލުވެފަ އެވެ. އަދި މަޖީދިއްޔާ ސްކޫލްގެ ޔޫތު ޓީމުތަކުގެ ސެޓަޕް ހަދައިދިނުމުގައި، އެސްޕަޔާ ވަނީ އެހީތެރިކަން ފޯރުކޮށްދީފަ އެވެ.

ގިޔާސުއްދީންއާ އެކު އެސްޕަޔާ އިން ވި އެއްބަސްވުމުގެ ދަށުން އެސްޕަޔާ އިން އެ ސްކޫލްގެ ފުޓުބޯޅަ ޑިވޮލޮޕްމަންޓް ހަރަކާތްތަކުގައި ބައިވެރިވެ, އެ ސްކޫލްގެ ދަރިވަރުންނަށް ފުޓުބޯޅައިގެ ތަމްރީންތައް ނަގައިދޭނެ އެވެ.

އެސްޕަޔާގެ ޕްލޭން ހެދުމުގައި މަސައްކަތް ކުރަނީ، ޓެކްނިކަލް ޑިރެކްޓަރެއްގެ ރޯލުގައި ހުރި ޕްރޯ ލައިސަންސް ކޯޗު މުހައްމަދު ޝިޔާޒް (މޯހަން) އާއި އެފްއޭއެމްގެ ކުރީގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) އެވެ. އެ ގޮތުން، އެކެޑަމީގެ ޓެކްނިކަލް އަދި އެޑްމިނިސްޓްރޭޓިވް ކަންކަން، ރަނގަޅަށް ހިންގުމުގައި، ޖަވާ އާއި މޯހަން ހަރަކާތްތެރިވުމަކީ، އެ އެކެޑަމީ އަށް ލިބޭ ބޮޑު ކުރިއެރުމެކެވެ.