ގައުމީ ލެވަލްގެ ފެންވަރު ރަނގަޅު ގިނަ ފުޓްބޯޅަ ކުޅުންތެރިންތަކެއް އުފެއްދުމުގެ ވިސްނުމުގައި، މީގެ އަށް މަސް ކުރިން ވުޖޫދުވި އެސްޕަޔާ ފުޓްބޯލް އެކެޑަމީން ކޯޗިން ޓީމު ވަރުގަދަ ކުރުމަށް އިތުރު ދެ ކޯޗުން ހަމަޖައްސައިފި އެވެ.

ޑިސެމްބަރު މަހު ވުޖޫދުވި, އެސްޕަޔާ އެކަޑަމީއާ އަލަށް ގުޅުނު ދެ ކޯޗުންނަކީ, ޓީސީ ސްޕޯޓްސް ކުލަބްގެ ކޯޗު, އަހުސަން ރަޝީދު (ޗޭ) އާއި ފުރަތަމަ ޑިވިޝަނުގައި ކުރިން ގިނަ އަހަރުތަކެއް ވަންދެން ކުޅުނު އަލީ އިމްރާން (އިންމަ) އެވެ.

އަހުސަން އަކީ ޓީސީ ސްޕޯޓްސް ކުލަބްގެ ވެސް ކޯޗެވެ. އޭނާ ވަނީ ޒުވާން ކުޅުންތެރިން ކުރިއަރުވަން މީގެ ކުރިންވެސް ގިނަ މަސައްކަތްތަކެއް އެކި ފެންވަރުގައި ކޮށްފަ އެވެ.

އެސްޕަޔާއާ ދެން ގުޅުނު ކޯޗު، އިންމަ ވަނީ މީގެ ކުރިން ޓީސީ ސްޕޯޓްސް ކުލަބާ ކުލަބް ވެލެންސިއާ އަށް ކުޅެފަ އެވެ.

މި ފަހުން އެސްޕަޔާއާ ގުޅުނު ކޯޗުންނަށް ބަލާއިރު, ގައުމީ ޓީމަށް ކުޅެފައިވާ، އަހުމަދު އަބްދުﷲ (ލިލީ) އާއި މުހައްމަދު ޝަފީއު (ޗެކް)، 19 އަހަރުން ދަށުގެ ގައުމީ ޓީމުގެ ކުރީގެ ކެޕްޓަން އަދި ޓީސީ ސްޕޯޓްސް ކްލަބްގެ ކުޅުންތެރިޔާ، މުހައްމަދު ޔަޒްދާން (ޔަޒޭ)، އީގަލްސްގެ އެސިސްޓަންޓް ކޯޗު، މުހައްމަދު ނަދީމް (ނަޑޭ)، ފުރަތަމަ ޑިވިޝަންގެ ގިނަ ޓީމުތަކަށް ކުޅެ، ފުޓްސަލްގައި ކާމިޔާބު ކޯޗިން ކެރިއަރެއް ބިނާކުރަމުން އަންނަ، މުހައްމަދު ފުހައިދު (ޓޯޑް) އެވެ.

މީގެ އިތުރުން އެސްޕަޔާ އުފެދުނީއްސުރެ އެ އެކަޑަމީގެ ކޯޗުންގެ ގޮތުގައި, ފުޓްސަލް އާއި ފުޓްބޯޅަ ކޯޗިންގައި މަސައްކަތްކުރާ ގައުމީ ޓީމުގެ ކުރީގެ ކުޅުންތެރިޔާ، އަހުމަދު ނިޔާޒް (ނިޔާ)، 19 އަހަރުން ދަށުގެ ގައުމީ ޓީމުގެ އެސިސްޓަންޓް ކޯޗު، އަހުމަދު ފައްރާހު (ފައްރަ)، ގައުމީ އަންހެން ޓީމުގެ ހައްވާ ހަނީފާ އާއި ޝިޔާނާ އަހުމަދު ޒުހައިދު (ތާތި) އަދި ފުޓްބޯޅަ ކޯޗިންގައި މަސައްކަތްތަކެއް ކުރަމުން އަންނަ، ޖައުފަރު އަލީ (ޖައުބެ) ހިމެނެ އެވެ.