މެޑްރިޑް (ސެޕްޓެމްބަރު 11) - މި ވަގުުތު އެއްވެސް ކްލަބެއްގެ ކޮންޓްރެކްޓްގައި ނެތް، ސްޕެއިނުގެ ލެޖެންޑަރީ، ޑިފެންޑަރު، ސާޖިއޯ ރާމޯސް އަށް ހަތަރު ގައުމެއްގެ ލީގުތަކަށް ނިސްބަތްވާ ކްލަބްތަކުން ހުށަހެޅުން ލިބިފައިވާ ކަމަށް ރިޕޯޓްތައް ބުނެފި އެވެ.

މިދިޔަ ސީޒަނުގެ ނިޔަލަށް ސެވިއްޔާއާ އެކު ރާމޯސް ހަދާފައިވާ ކޮންޓްރެކްޓްގެ މުއްދަތު ހަމަވުމުން، އޭނާ ވަނީ އެ ޓީމާ ވަކިވެފަ އެވެ. ސްޕެއިނުގެ މީޑިއާ އަކަށް ދިން އިންޓަވިއުއެއްގައި ރާމޯސް، 38، ވަނީ އަދި ރިޓަޔާކުރުމުގެ ވިސްނުމެއް ނެތް ކަމަށް ބުނެފަ އެވެ.

އެ ގޮތުން، ރާމޯސް އަށް ހަތަރު ގައުމެއްގެ އޮފާތަކެއް ލިބިފައިވާއިރު، އޭނާ ދެން ގުޅޭނެ ޓީމެއްގެ ކަންކަން ނިންމުމަށް އަންނަނީ ވިސްނަމުންނެވެ.

ފުޓްބޯޅަ ތާރީހުގައި ވެސް ފެނުނު އެންމެ މޮޅު އެއް ޑިފެންޑަރު، ރާމޯސް އަށް ހުށަހެޅުން ލިބިފައިވަނީ، ތުރުކީގެ ގަލަސަތަރާ، ސައުދީ އަރަބިއްޔާގެ އަލް ނަސްރު، އެމެރިކާގެ ސެން ޑިއޭގޯ އެފްސީ އަދި ބްރެޒިލްގެ ވަސްކޯ ޑަ ގަމާ އިންނެވެ.

ރާމޯސް ސީނިއާ ކުލަބު ކެރިއަރު ފެށީ ސެވިއްޔާ އިންނެވެ. އެ ކުލަބުގެ ސީނިއާ ޓީމަށް ދެ އަހަރު ކުޅުމަށް ފަހު ސްޕެއިންގެ ރެއާލް މެޑްރިޑަށް އޭނާ ބަދަލުވީ 2005 ވަނަ އަހަރު އެވެ. ރެއާލްގައި 16 އަހަރު ކުޅުމަށް ފަހު އޭނާ އެކުލަބު ދޫށްލީ 2021 ގަ އެވެ. އެ ފަހަރު، ހިލޭ ޓްރާންސްފާއެއްގައި ބަދަލުވީ، ފްރާންސްގެ ޕީއެސްޖީ އަށެވެ. ޕީއެސްޖީ ދޫކޮށްލަން ރާމޯސް ނިންމީ އެ ކްލަބްގެ ދެ އަހަރުގެ ކޮންޓްރެކްޓް ފުރިހަމަ ކުރުމަށް ފަހު އެވެ.