ސިންގަޕޫރުގެ އޮފީސް އަދި ޝޮޕިން ކޮމްޕްލެކްސްއެއް ކަމަށްވާ 24 ފަންގިފިލާގެ ގޯލްޑެން މައިލް ޓަވަރުގައި އަލިފާނުގެ ހާދިސާއެއް ހިނގައިފި އެވެ.

ރިޕޯޓްތައް ބުނާގޮތުން އަލިފާން ރޯވުމާއެކު ކަމާބެހޭ ފަރާތްތަކުން ވަނީ އެތަނަށް ގޮސް އަލިފާން ނިއްވުމުގެ މަސައްކަތްކޮށް، އަލިފާންގަނޑު ކޮންޓްރޯލްކޮށްފަ އެވެ.

"އަލިފާނުގެ ހާދިސާއާ ގުޅޭ ރިޕޯޓް ލިބުމާއެކު އެ ސަރަހައްދަށް ގޮސް ދެ ވޯޓާ ޖެޓް ބޭނުންކޮށްގެން އަލިފާން ވަނީ ނިއްވާލެވިފައި،" ސިންގަޕޫރުގެ ސިވިލް ޑިފެންސް ފޯސްއިން ބުންޏެވެ.

ހާދިސާގައި އެއްވެސް މީހަކަށް އަނިޔާވި ކަމުގެ މައުލޫމާތެއް އަދި ނުލިބެ އެވެ. ނަމަވެސް ދުމުގެ އަސަރުކޮށްގެން ބައެއް މީހުން ހޮސްޕިޓަލަށް ގެންދިޔަ އެވެ.

ސޯޝަލް މީޑިއާގައި ދައުރުވަމުން އަންނަ ފޮޓޯއާއި ވީޑިއޯތަކުން ފެންނަ ގޮތުގައި އެ ޓަވަރުގެ ފުރަތަމަ ފަންގިފިލާގެ ޕާކިން އޭރިއާގައި ހުރި ގިނަ އަދަދެއްގެ ވެހިކަލްތަކުގައި ރޯވި އެވެ.

މީގެއިތުރުން އެ ޓަވަރުން އެކި ކަހަލަ ގޮވުންތަކުގެ އަޑުވެސް އިވެނު ކަމަށް ރިޕޯޓްތައް ބުނެ އެވެ.

ގޯލްޑެން މައިލް ޓަވަރު އިމާރާތްކުރީ 1970 ގެ ތެރޭގަ އެވެ. އެތަނުގައި އެކި ރެސްޓޯރެންޓުތަކާއި، އޮފީސްތަކުގެ އިތުރުން 1،500 މީހުންގެ ޖާގައިގެ މަޝްހޫރު ސިނަމާއެއް ވެސް ހުރެ އެވެ.

އެ ޓަވަރާ ޖެހިގެން މެލޭޝިއާ އަދި ތައިލެންޑަށް ދަތުރުކުރާ ބަސް ޓާމިނަލްއެއްގެ އިތުރުން 300 އެނދުގެ ހޮޓަލެއް ވެސް ހުރެ އެވެ.