ނޭޕްލްސް، އިޓަލީ (އޮގަސްޓް 19) - ނަޕޯލީގެ ކޯޗުކަމާ މި ފަހަރު ހަވާލުވި އެންޓޯނިއޯ ކޮންޓޭގެ އިރުޝާދުގެ ދަށުން، އެ ޓީމު މި ފަހަރުގެ އިޓާލިއަން ލީގުގައި ކުޅުނު ފުރަތަމަ މެޗުން ހެޔަސް ވެރޯނާ އަތުން 3-0 އިން ބަލިވުމުން، ނަޕޯލީ ސަޕޯޓަރުން ކިބައިން ކޮންޓޭ މާފަށް އެދިިއްޖެ އެވެ.

ނަޕޯލީން، 2022-2023 ވަނަ އަހަރުގެ ސީޒަނުގައި ލީގު ކާމިޔާބުކުރި ފަހުން ކޮންޓޭ އަކީ އެ ޓީމާ ހަވާލުވި ހަތަރު ވަނަ ކޯޗެވެ. މިދިޔަ ސީޒަނުގައި ނަޕޯލީއާ ތިން ކޯޗަކު ހަވާލުވެ، އެ ޓީމަށް އިރުޝާދުދިންއިރު، އެ ޓީމު ލީގު ނިންމާލީ 10 ވަނައިގަ އެެވެ.

އަމިއްލަ ދަނޑުގައި ކުޅުނު ވެރޯނާ އިން ނަޕޯލީ ކޮޅަށް ތިން ގޯލު ވެސް ޖެހީ ދެ ވަނަ ހާފުގަ އެވެ. އެ ޓީމުގެ ލަނޑުތައް ޖެހީ ޑެނިއަލް މޮސްކޭރާ ދެ ގޯލާއި ޑައިލޯން ލިވްރަމެންޓޯ އެވެ. މެޗުގައި ދެ ގޯލު ޖެހި، މޮސްކޭރާ ކުޅެން އެރީ ފަހު 15 މިނިޓަށެވެ.

"އިރުގެ އަވިން ވިރިގެން ދިޔަ ސްނޯތަކެއް ހެން އަހަރެމެން ފެނުނީ. އަހަރެން މި ނަތީޖާ އަށް ފަހު އެންމެ އިސްކަމެއް ދެނީ، ވަރަށް ޝައުގުވެރިކަމާ އެކު، ޓީމަށް ހިތްވަރުދޭ ނަޕޯލީގެ ސަޕޯޓަރުން ކިބައިން މައާފަށް އެދެން،" ކުރިން ޗެލްސީ އާއި ޔުވެންޓަސްއާ އެކު ލީގު ކާމިޔާބުކުރި ކޮންޓޭ ބުންޏެވެ.

ކޮންޓޭ ބުނީ ޓީމުގެ ހާލަތު ރަނގަޅުކުރަން ކުޅުންތެރިންތަކެއް ސޮއިކުރަން ޖެހޭ ކަމަށެވެ. އަދި މަސައްކަތް ކުރަމުން އަންނަނީ، މި މަހުގެ ނިޔަލަށް އޮތް ޓްރާންސްފާ މާކެޓްގައި ހަތަރެއް ނޫނީ ފަސް ވަރަކަށް ކުޅުންތެރިން ނަޕޯލީ އަށް ގެނައުމަށް ކަމަށެވެ.

ނަޕޯލީގެ އެއް ވަނަ ފޯވާޑް، ވިކްޓަ އޮސީމެންގެ މުސްތަގުބަލާ މެދު ސުވާލު އުފެދިފައިވާއިރު، އެ ޓީމުން އަންނަނީ ޗެލްސީގެ ފޯވާޑް ރޮމެލޫ ލުކާކޫ ގެންނަން ވެސް މަސައްކަތް ކުރަމުންނެވެ.