ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 15) - ހުސްވެފައިވާ އެމެރިކާ ފުޓްބޯޅަ ޓީމުގެ ކޯޗަކަށް ވާން އާޖެންޓީނާގެ ކޯޗު މައުރީސިއޯ ޕޮޗެޓީނޯ އެއްބަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.

މި ފަހަރު، އެމެރިކާގައި ބޭއްވި ކޮޕަ އެމެރިކާ ފުޓްބޯޅަ މުބާރާތުގައި އެމެރިކާ ޓީމުގެ ފަރާތުން ނުކުތް ދަށް ނަތީޖާތަކަށް ފަހު، އެ ޓީމުގެ ކޯޗަކަށް ހުރި ގްރެގް ބާހޯލްޓާ ވަނީ މަގާމުން ވަކިކޮށްފަ އެެވެ.

އެމެރިކާ ފުޓްބޯޅަ އެސޯސިއޭޝަނުގެ ސްޕޯޓިން ޑިރެކްޓަރު، މެޓް ކްރޮކާ އާއި ޕޮޗެޓީނޯއާ އެކު ބޭއްވުނު މަޝްވަރާތަކުގައި މިހާރު ވަނީ އެއްބަސްވުމަކަށް އަތުވެފަ އެވެ.

އެމެެރިކާގެ ސްޕޯޓިން ޑިރެކްޓަރު، ކްރޮކާ އަކީ ކުރިން ޕޮޗެޓީނޯއާ އެކު ސައުތެމްޓަންގައި މަސައްކަތްކުރި ފަރާތެކެެވެ، އެހެންކަމުން، މަޝްވަރާތަކުގައި ދެ ފަރާތަށް ވެސް ފަސޭހަތަކެއް ހުރި އެވެ.

ދެ އަހަރުގެ ކޮންޓްރެކްޓެއްގައި މިދިޔަ އަހަރު ޗެލްސީއާ ހަވާލުވި ޕޮޗެޓީނޯ އެއް އަހަރަށް ފަހު މަގާމުން ވަކިވިއިރު، ބުނެފައިވަނީ ރަނގަޅު ޕްރޮޖެކްޓެއް ލިބިއްޖެނަމަ އަވަހަށް ކޯޗިން އިން ފެންނާނެ ކަމަށެވެ.

އާޖެންޓީނާ ގައުމީ ޓީމުގެ ކުރީގެ މިޑްފީލްޑަރު، ޕޮޗެޓީނޯގެ ކޯޗިން ކެރިއަރަށް 15 އަހަރު ވަނީ ވެފަ އެވެ. ކުރީގެ މިޑްފީލްޑަރު، ޕޮޗެޓީނޯ ވަނީ، މީގެ ކުރިން، ސްޕެއިނުގެ އެސްޕަންޔޯލާއި އިނގިރޭސި ދެ ކްލަބް ކަމަށްވާ ސައުތެމްޓަން އާއި ޓޮޓެންހަމްގެ އިތުރުން ފްރާންސްގެ ގަދަބާރު، ޕީއެސްޖީ އަށް ކޯޗުކޮށްދީފަ އެވެ.

އަންނަ މަހު އެމެރިކާ އިން އެކުވެރިކަމުގެ މެޗުތަކެއް ކުޅެން ވަނީ ޝެޑިއުލްކޮށްފަ އެވެ. އެހެންކަމުން، މިއީ ޕޮޗެޓީނޯ، އެމެރިކާގެ ބެންޗުން ފެންނާނެ ފުރަތަމަ މެޗުތަކަށް ވުމުގެ ފުރުސަތު ބޮޑެވެ.

އެމެރިކާ އިން ޕޮޗެޓީނޯ އަށް ކޮންޓްރެކްޓް ދޭނެ ކަމަށް ބެލެވެނީ، 2026 ވަނަ އަހަރު އެމެރިކާ އާއި މެކްސިކޯ އަދި ކެނަޑާގައި ހޯސްޓްކުރާ ފީފާ ވޯލްޑް ކަޕްގެ ނިޔަލަށެވެ.