އޭއެފްސީ 17 އަހަރުން ދަށުގެ ކޮލިފައިން އާއި 17 އަހަރުން ދަށުގެ ސާފް ޗެމްޕިއަންޝިޕަށް ތައްޔާރުވާ ގައުމީ ޒުވާން ޓީމުގަ ތިބި ކުޅުންތެރިންނާ މެދު ހިތްހަމަ ޖެހޭ ކަމަށާއި، އުންމީދަކީ ރަނގަޅު ނަތީޖާތަކެއް ނެރުން ކަމަށް އެ ޓީމުގެ ކޯޗުކަމާ ހަވާލުވެހުރި މުހައްމަދު އާދަމް ބުނެފި އެވެ.

ކުރިއަށް އޮތް ދެ މުބާރާތައް ގައުމީ ޒުވާން ޓީމުގެ ސްކޮޑް އެކުލަވާލުމުގެ މަސައްކަތް ވަނީ ފަށައިފަ އެވެ. ޒުވާން ގައުމީ ޓީމުގެ ކޯޗެއްގެ ގޮތުގައި މުހައްމަދު މަސައްކަތް ކުރާއިރު, އޭނާގެ އެސިސްޓެންޓަކަށް މަސައްކަތް ކުރާނީ 19 އަހަރުން ދަށުގެ ޔޫތު ޗެމްޕިއަންޝިޕް ޓީސީ ސްޕޯޓްސް ކުލަބާއެކު އުފުލާލި އަހުމަދު ނިމާދު (ނިމާ) އެވެ.

"އަދަދު ސްޕޯޓްސް" އަށް ދިން އިންޓަވިއުގައި މުހައްމަދު ބުނީ، މި މަހު 20 ގެ ކުރިން ގައުމީ ޒުވާން ޓީމުގެ ސްކޮޑް ފައިނަލްކޮށް ފޮނުވަންޖެހޭ ކަމަށެވެ. އަދި މި ވަގުތައް ބަލާއިރު، ސްކޮޑާ ބައެއް ކުޅުންތެރިން ނުގެޅޭ ކަމަށް މުހައްމަދު ވަނީ ފާހަގަކޮށްފަ އެވެ.

"ބައެއް ކުޅުންތެރިން އަދި ސްކޮޑާ ނުގުޅޭ. ސްކޫލް ކަންކަން ހުރުމާ އަދި އެއް ކުޅުންތެރިއަކު ގައުމުން ބޭރުގައި ހުރީ, އެ ކުޅުންތެރިންނާ އެކު، ރަނގަޅު ސްކޮޑެއް ނެގޭނެ" މުހައްމަދު ބުންޏެވެ.

17 އަހަރުން ދަށުގެ ގައުމީ ޓީމުގެ ޓްރަޔަލް ޕްރެކްޓިހުގެ ތެރެއިން.--- ފޮޓޯ: އަތޫފް އާތިފް/ އަދަދު

މުހައްމަދު ބުނީ، ޒުވާން ގައުމީ ޓީމުގެ ސްކޮޑު އެކުލަވާލަން ފަރިތަކުރުންތައް ފެށިއިރު، ވަރަށް ހުނަރުވެރި ކުޅުންތެރިން ފަރިތަކުރުންތަކުގައި ބައިވެރިވެފައިވާ ކަމަށެވެ. ހާއްސަކޮށް އަތޮޅުތެރެއިން އައިސްތިބި ކުޅުންތެރިންގެ ހުނަރު މުހައްމަދު ފާހަގަކުރި އެވެ.

އެސިސްޓަންޓް ކޯޗެއްގެ ގޮތުގައި ނިމާ ހުރުން އެއީ މުހައްމަދު މި ފަހަރުގެ މުބާރާތައް ގައުމީ ސްކޮޑު ނަގައިގެންދާއިރު، ހުރިހާ ގޮތަކުން ވެސް ފައިދާ ވާނެ ކަމެއް ކަމަށް ފާހަގަކުރި އެވެ. އެ ގޮތުން، މިހާރުގެ ޔޫތު ފުޓްބޯޅައިގެ ކަންކަން އެންމެ ބޮޑަށް އެނގޭނެ އެއް ކޯޗަކީ ނިމާ ކަމަށް މުހައްމަދު ފާހަގަކުރި އެވެ.

އޭޝިއަން ކަޕް ކޮލިފައިން އާއި ސާފްގެ 17 އަހަރުން ދަށުގެ މުބާރާތަށެވެ. ބޫޓާނުގައި ސެޕްޓެމްބަރު 18-28 އަށް ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ ހިމެނެނީ، އިންޑިއާ އާއި ބަންގްލަދޭޝާ އެއް ގްރޫޕެއްގަ އެވެ. އެ މުބާރާތުގެ މެޗު ޝެޑިއުލް އާންމުނުކުރެ އެވެ.

ސަތާރަ އަހަރުން ދަށުގެ އޭޝިއަން ކަޕްގެ ކޮލިފައިން, އޮކްޓޫބަރު 19-27 އަށް ކުރިއަށްދާއިރު، ރާއްޖެ ހިމެނުނީ، ގްރޫޕް ސީގަ އެވެ. އެ ގްރޫޕްގެ މެޗުތައް ޗައިނާގައި ކުޅޭއިރު، ރާއްޖޭގެ އިތުރުން ދެން ހިމެނެނީ، ދެކުނު ކޮރެއާ އާއި ބަހުރޭން އަދި ބޫޓާން އެވެ. އޮކްޓޫބަރު 19 ވަނަ ދުވަހު ކޮލިފައިން ފުރަތަމަ މެޗުގައި ރާއްޖޭން ބޫޓާނާ ކުޅޭނެ އެވެ. ދެ ވަނަ މެޗުގައި، 21 ވަނަ ދުވަހު ބަހްރޭނާ ކުޅުމަށް ފަހު ތިން ވަނަ މެޗުގައި، ކޮރެއާއާ ކުޅޭނީ 23 ވަނަ ދުވަހު އެވެ. އަދި ފަހު މެޗުގައި ޗައިނާއާ ދެކޮޅަށް 25 ވަނަ ދުވަހު ނުކުންނާނެ އެވެ.

ޑިފެންޑަރެއްގެ ގޮތުގައި ފުޓްބޯޅަ ކެރިއަރުގައި ހޭދަކުރި މުހައްމަދުގެ ކޯޗިން ކެރިއަރުގައި އެންމެ ބޮޑު އުސްއައްޔަކީ ސްރީ ލަންކާގެ ޓީމުތަކުގައި އޭނާ ކޮށްފައިވާ މަސައްކަތްތަކެވެ. އެ ގޮތުން އޭނާ ވަނީ ސްރީލަންކާގެ ޕްރިމިއާ ލީގު ކްލަބެއް ކަމަށްވާ ޖާވާ ލޭން ސްޕޯޓްސް ކްލަބަށް ވެސް ކޯޗުކޮށްދީފަ އެވެ. ރާއްޖޭގެ ފުޓްބޯޅައިގެ ކޯޗިންގައި މުހައްމަދު ވަނީ ވިކްޓަރީ ސްޕޯޓްސް ކްލަބާއި ޔުނައިޓެޑް ވިކްޓަރީ (ޔޫވީ) އަށް ކޯޗުކޮށްދީފަ އެވެ.

އެފްއޭއެމްގެ އަތޮޅު ފުޓްބޯޅައިގެ ކަންކަމުގައި އިސްކޮށް ހަރަކާތްތެރިވި މުހައްމަދު ވަނީ، ވޮލީބޯލް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީގެ މަގާމު ވެސް އަދާކޮށްފަ އެވެ.