ކުރީގެ ޗީފް އޮފް ޑިފެންސް ފޯސް މޭޖާ ޖެނެރަލް އަހްމަދު ޝިޔާމްގެ މައްޗަށް ދައުލަތުން ކުރާ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާގެ ޝަރީއަތުގެ އަޑުއެހުންތައް ނިންމާލައި ހުކުމަކާ ހަމައަށް އައިސްފި އެވެ.

ޝިޔާމަށް ދައުވާ ކުރަނީ ސިފައިންގެ އެންމެ އިސް ޖެނެރަލްގެ ގޮތުގައި އޭނާ ހުންނެވިއިރު ކ. ވިލިނގިލީގައި ހުންނަ ކޯސްޓްގާޑްގެ މެރިޓަމް ރެސްކިއު ކޯޑިނޭޝަން ސެންޓަރު ހުންނަ ބިމުގައި ހުރި ވީއައިޕީ ގެސްޓްހައުސެއްގައި އޭނާގެ ބައްޕަ އަހަރަކަށް ވުރެ ގިނަ ދުވަހު ބަހައްޓައި، އޭނާގެ ބައްޕަ ބެލެހެއްޓުމުގެ ކަންކަން ސިފައިންގެ އޮފިސަރަކާ ހަވާލުކުރި ކަމަށް ބުނާ މައްސަލައިގަ އެވެ.

މިއަދު ކުރިއަށް ދިޔައީ އެ މައްސަލައިގެ ހުލާސާ ބަޔާން އިއްވުމެވެ. ހުލާސާ ބަޔާނަކީ މައްސަލައިގެ ހުކުމް ކަނޑައެޅުމުގެ ކުރިން ހަސްމުންނަށް ފަހު ބަސް ބުނުމުގެ ގޮތުން ޝަރީއަތުގައި ހިނގި ކަންކަމާ މެދު ދެކޭ ގޮތް ހުލާސާ ގޮތެއްގައި ބަޔާން ކޮށްދިނުމަށް ދެވޭ ފުރުސަތެކެވެ.

ހުލާސާ ބަޔާނުގައި ދައުލަތުގެ ވަކީލު މައިގަނޑު ގޮތެއްގައި ފާހަގަ ކުރެއްވީ ދައުލަތުން ހުށަހެޅި ޝަފައީ ހެކިންގެ ހެކިބަހުން ޖެނުއަރީ 2017 އިން ފެށިގެން ޑިސެމްބަރު 2018 އަށް ޝިޔާމްގެ ބައްޕަ އެ ތަނުގައި ބެހެއްޓި ކަމާއި އެ މުއްދަތުގައި އޭނާގެ ކަންކަން ބަލަހައްޓަން ސިފައިންގެ މީހަކު ހަމަޖެއްސި ކަމާއި، ބައްޕަގެ ކެއިން ބުއިމާއި ފެނާއި ކަރަންޓަށް ސިފައިންގެ ބަޖެޓުން ހަރަދުކޮށްފައިވާ ކަން ސާބިތުވަ ކަމަށެވެ.

ދިފާއީ ވަކީލު ގަބޫލުކުރައްވާ ގޮތުގައި އޭނާގެ މުވައްކިލް ޝިޔާމް ކުރެއްވި އަމަލުތަކަކީ ސިފައިންގޭގައި ފެށުނީއްސުރެން ވެސް އޮންނަ އާދަކާދަތަކާއި އުސޫލުތަކުގެ ތެރެއިން ކުރެއްވި ކަންކަމެވެ. އެގޮތުން އަބަދުވެސް ސިފައިންގެ ކޮންމެ ރޭންކެއްގެ އޮފިސަރަކަސް އާއިލާއަށް ބޯހިޔާވަހިކަމުގެ ދަތި ކަމެއް ދިމާވެއްޖެ ނަމަ، ސިފައިންގެ ތަންތަނުގައި ވަގުތީ ބޯހިޔާވަހިކަން ފޯރުކޮށްދޭ ކަން އޭނާ ފާހަގަ ކުރެއްވި އެވެ.

ޝިޔާމްގެ ބައްޕަ މިހާރު ވަނީ އަވަހާރަވެފަ އެވެ. ސިފައިންގޭގެ ގެސްޓްހައުސެއްގައި ބައްޕަ ބެހެއްޓީ، ޝިޔާމްގެ މަންމަ އަވާހަރުވުމަށް ފަހު އެވެ. އޭރު ވެސް ބައްޕައަކީ ވަރަށް ބަލި މީހެއް ކަން ދިފާއުން ފާހަގަކޮށްފައިވެ އެވެ.

މި މައްސަލަ ކްރިމިނަލް ކޯޓުގައި މިހާރު ބައްލަވާ ގާޒީ އާމިނަތު އަޒުލިފާ ވިދާޅުވީ ހުލާސާ ބަޔާން އިއްވާތާ 30 ދުވަހުގެ ތެރޭގައި މައްސަލައިގެ ހުކުމް އިއްވުމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައި އޮންނާތީ ކުރިއަށް އޮތް 30 ދުވަހުގެ ތެރޭގައި ހުކުމް އިއްވުމަށް އަޑުއެހުމެއް ތާވަލުކުރައްވާނެ ކަމަށެވެ.

މައްސަލައިގެ ފަސްފަހަތް

މި މައްސަލާގައި އެންޓި ކޮރަޕްޝަން ކޮމިޝަން (އޭސީސީ)އިން ބުނެފައިވަނީ އެމްއާރުސީސީގެ ވީއައިޕީ ގޭގައި މީހުން ބޭތިއްބުމުގައި އަމަލުކުރާނެ ވަކި ހާއްސަ އުސޫލެއް ނެތް ނަމަވެސް، އެތަނުގެ އިމާރާތުގައި ހުރި ތަންތަނަކީ ސިފައިންގެ ގާނޫނާއި ގަވާއިދުގައިވާ ގޮތުގެ މަތިން އަމަލުކުރެވޭ ތަންތަން ކަމަށްވާތީ، އެމްއާރުސީސީއަށް ހިނގާ އުސޫލު އެތަނުގެ ވީއައިޕީ ގެއަށް ވެސް ހިނގާނެ ކަމަށެވެ. އަދި އެމްއާރުސީސީގައި އާންމުންނަށް ދިރިނޫޅެވޭ އުސޫލުން ވީއައިޕީ ގޭގައި އާންމުންނަށް ދިރިނޫޅެވޭނެކަން އެނގޭ ކަމަށެވެ.

އޭގެ އިތުރުން ސިފައިންގެ ގާނޫނުގައި ބަޔާންކުރާ ސިފައިންގެ ވާޖިބާއި މަސްއޫލިއްޔަތު އަދާކުރުމުގެ ގޮތުން އާންމު ފަރުދުންނަށް ފޯރުކޮށްދެންޖެހޭ ހިދުމަތެއް ފޯރުކޮށްދިނުން ފިޔަވައި، ސިފައިންގެ ވެރިއެއްގެ އިރުޝާދުގެ ދަށުން އާންމު ފަރާތެއް ބެލެހެއްޓުމަށް ސިފައިންގެ އޮފިސަރެއް ހަމަނުޖެއްސޭނެ ކަމަށް ބުނެފައި އޮތް ނަމަވެސް، ޝިޔާމްގެ އެންގުމުގެ މަތިން ސިފައިންގެ އޮފިސަރެއް އޭނާގެ ބައްޕަ ބެލެހެއްޓިކަން ތަހުގީގަށް ހޯދާފައިވާ ލިޔުންތަކުންނާއި ލިބިފައިވާ މައުލޫމާތުން އެނގިފައިވާ ކަމަށެވެ.

އެ ކޮމިޝަނުން ބުނާ ގޮތުގައި ޝިޔާމްގެ ބައްޕަ ދިގު މުއްދަތަކަށް އެ ތަނުގައި ދިރިއުޅުމަށް ބަހައްޓައި، އަދި ބެލެހެއްޓުމަށް ސިފައިންގެ މުވައްޒަފެއް ބަހައްޓާފައިވަނީ މަގާމުގެ ނުފޫޒު ބޭނުންކޮށްގެން، އެނގިހުރެ ސިފައިންގޭގެ ގާނޫނާއި ގަވައިދާ ހިލާފަށް އޭނާގެ ބައްޕައަށް ނާޖާއިޒު ފައިދާތަކެއް ހޯދައިދިނުމަށެވެ.

އަމިއްލަ ފަރާތަކުން ހުށަހެޅި އެ މައްސަލަ ތަަހުގީގުކޮށް، އޭސީސީން ކުރިން ނިންމީ އެކަމުގައި ކޮރަޕްޝަނެއް ނެތް ކަމަށެވެ. އެހެން ނަމަވެސް ޕީޖީން މި މައްސަލަ އަލުން ތަހުގީގު ކުރުމަށް އެންގުމުން މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ކުށުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން އޭގެ ފައިދާ ލިބެން ނުޖެހޭ މީހަކަށް މަންފާއެއް ހޯދައިދިނުމުގެ ކުށުގެ ދައުވާ ޝިޔާމްގެ މައްޗަށް ކޮށްދިނުމަށް އެ ކޮމިޝަނުން އެދުނެވެ.