އދ. ހަންޏާމީދޫ ގެއެއްގައި ރޭ ދަންވަރު އަލިފާން ރޯވެ، އެ ގެ ބޭނުން ނުކުރެވޭ ވަރަށް އަނދައިފި އެވެ.

ހަންޏާމީދޫ ކައުންސިލްގެ ރައީސް މޫސާ ނާޒިމް ވިދާޅުވީ އަލިފާން ރޯވުމާއެކު އަލިފާން ނިއްވުމުގެ މަސައްކަތް ކުރީ ރަށުގެ ރައްޔިތުން ކަމަށާއި އެއްވެސް މީހަކަށް އަނިޔާއެއް ނުލިބޭ ކަމަށެވެ.

"އެ ގޭގައި ދިރިއުޅެނީ އެންމެ މީހެއް. އޭނާއަށް ބޭނުންވާ އެހީތެރިކަން ކައުންސިލުން މިދަނީ ފޯރުކޮށްދެމުން. ސިފައިން މި ރަށުގައި ނޫޅޭ. އާންމުންވެގެން އަލިފާން ނިއްވީ،" މޫސާ ނާޒިމް ވިދާޅުވި އެވެ.

ނެޝަނަލް ޑިޒާސްޓާ މެނޭޖްމަންޓް (އެންޑީއެމްއޭ) އިން ބުނީ ހާދިސާގައި އެ ގެއަށް ބޭނުން ނުކުރެވޭ ވަރަށް ގެއްލުން ވެފައިވާ ކަމަށާއި ހާލުގައި ޖެހިފައިވާ މީހާއަށް އެހީތެރިކަން ފޯރުކޮށްދިނުމަށް ކައުންސިލާއި ގުޅިގެން މަސައްކަތް ކުރަމުންދާ ކަމަށެވެ.

ސޯޝަލް މީޑިއާގައި އެންޑީއެމްއޭއިން އާންމުކޮށްފައިވާ ވީޑިއޯއާއި ފޮޓޯއިން ފެންނަ ގޮތުގައި އެ ގޭގައި ވަރަށް ބޮޑަށް އަލިފާން ވަނީ ރޯވެފަ އެވެ. ރޯވި އަލިފާން ނިއްވަން މަސައްކަތް ކުރަމުންދިޔައީ ރަށުގެ ރައްޔިތުންކަން ވެސް ވީޑިއޯއިން ފެނެ އެވެ.