ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 10) - ހުސްވެފައިވާ އެމެރިކާ ފުޓްބޯޅަ ޓީމުގެ ކޯޗަކަށް ވުމުގެ ފުރުސަތު މިދިޔަ ސީޒަނަށް ފަހު ޗެލްސީން ވަކިވި އާޖެންޓީނާގެ ކޯޗު މައުރީސިއޯ ޕޮޗެޓީނޯ އަށް ދީފި އެވެ.

ދާދި ފަހުން، އެމެރިކާގައި ބޭއްވި ކޮޕަ އެމެރިކާ ފުޓްބޯޅަ މުބާރާތުގައި އެމެރިކާ ޓީމުގެ ފަރާތުން ނުކުތް ދަށް ނަތީޖާތަކަށް ފަހު، އެ ޓީމުގެ ކޯޗަކަށް ހުރި ގްރެގް ބާހޯލްޓާ ވަނީ މަގާމުން ވަކިކޮށްފަ އެެވެ. އެމެރިކާ ފުޓްބޯޅަ އެސޯސިއޭޝަނުގެ ސްޕޯޓިން ޑިރެކްޓަރު، މެޓް ކްރޮކާ އަންނަނީ އާ ކޯޗެއް ހަމަޖެއްސުމުގެ މަސައްކަތް ކުރަމުންނެވެ.

އެމެރިކާ އިން ފުރަތަމަ ގެންނަން މަސައްކަތް ކުރީ ނުވަ އަހަރަށް ފަހު ލިވަޕޫލް ދޫކޮށްލި ކޯޗު، ޖަރުމަނުގެ ޔާގަން ކްލޮޕް އެވެ. ކްލޮޕް ވަނީ އެ ފުރުސަތަށް ނޫނެކޭ ބުނެފަ އެވެ.

އެމެރިކާ އިން އާ ކޯޗެއް ހޯދުމުގެ މަސައްކަތުގައި މިހާރު މަޝްވަރާތައް ކުރަމުން އަންނަނީ 15 އަހަރުގެ ކޯޗިން ތަޖުރިބާ ހޯދައި، ޔޫރަޕްގެ ވަރުގަދަ ލީގުތަކުގައި މަސައްކަތްކޮށްފައިވާ ޕޮޗެޓީނޯ އެވެ.

އެ ގޮތުން، އެމެެރިކާގެ ސްޕޯޓިން ޑިރެކްޓަރު، ކްރޮކާ އަކީ ކުރިން ޕޮޗެޓީނޯއާ އެކު ސައުތެމްޓަންގައި މަސައްކަތްކުރި ފަރާތެކެެވެ، އެހެންކަމުން، މަޝްވަރާތަކުގައި ދެ ފަރާތަށް ވެސް ފަސޭހަތަކެއް ހުރި ކަމަށް އެމެރިކާގެ މީޑިއާ ރިޕޯޓްތައް ބުނެ އެވެ.

ދެ އަހަރުގެ ކޮންޓްރެކްޓެއްގައި މިދިޔަ އަހަރު ޗެލްސީއާ ހަވާލުވި ޕޮޗެޓީނޯ އެއް އަހަރަށް ފަހު މަގާމުން ވަކިވިއިރު، ބުނެފައިވަނީ ރަނގަޅު ޕްރޮޖެކްޓެއް ލިބިއްޖެނަމަ އަވަހަށް ކޯޗިން އިން ފެންނާނެ ކަމަށެވެ.

އަންނަ މަހު އެމެރިކާ އިން އެކުވެރިކަމުގެ މެޗުތަކެއް ކުޅެން ވަނީ ޝެޑިއުލްކޮށްފަ އެވެ. އެހެންކަމުން، އާ ކޯޗެއް ހަަމަަޖެއްސުމުގެ މަސައްކަތް އަވަހަށް އެމެރިކާ އިން ނިންމާނެ ކަމަށް ބެލެވެ އެވެ.

އާޖެންޓީނާ ގައުމީ ޓީމުގެ ކުރީގެ މިޑްފީލްޑަރު، ޕޮޗެޓީނޯ ވަނީ، މީގެ ކުރިން، ސްޕެއިނުގެ އެސްޕަންޔޯލާއި އިނގިރޭސި ދެ ކްލަބް ކަމަށްވާ ސައުތެމްޓަން އާއި ޓޮޓެންހަމްގެ އިތުރުން ފްރާންސްގެ ގަދަބާރު، ޕީއެސްޖީ އަށް ކޯޗުކޮށްދީފަ އެވެ.