އެމްޑަބްލިޔޫއެސްސީގެ މާލީ ހާލަތު ދަށްވެ، މުވައްޒަފުންނަށް ބޯނަސް ދިނުން ފަސްކޮށްފި އެވެ.

އިއްޔެ ނެރުނު ސާކިއުލާއެއްގައި ބުނެފައި ވަނީ ބޯނަސް ފަސްކުރަން ނިންމީ އިގުތިސާދީ ހާލަތު ރަނގަޅު ކުރުމަށް ސަރުކާރުން އަޅަމުންދާ ފިޔަވަޅުތަކާ ގުޅިގެން ކަމަށެވެ.

"ރާއްޖޭގެ އިގުތިސޯދީ ހާލަތު ރަނގަޅު ކުރުމަށް ސަރުކާރުން އަޅަމުންދާ ފިޔަވަޅުތަކާ ގުޅިގެން 2023 ވަނަ އަހަރުގެ ބޯނަސް ދިނުމުގެ މަޝްވަރާ، މި އަހަރުގެ ހަތަރު ވަނަ ކްއާޓަރަށް ލަސްކޮށްލުމަށް އަހަރީ ޖަލްސާގައި ނިންމާފައިވާކަން އެންމެހާ މުވައްޒަފުންގެ މައުލޫމާތަށްޓަކައި ދަންނަވަމެވެ،" ސާކިއުލާގައި ބުނެފައިވެ އެވެ.

ބޯނަސް ދިނުމުގެ މަޝްވަރާ ފަހު ކްއާޓަރަށް ބަދަލު ކުރަން ނިންމިއިރު، ބޯނަސް ދޭނެ ވަކި މުއްދަތެއް ސާކިއުލާގައި ބުނެފައެއް ނުވެ އެވެ.

އެމްޑަބްލިޔޫއެސްސީގެ ފަރާތުން ދެމުންދާ އަސާސީ ހިދުމަތްތައް ފޯރުކޮށް ދިނުމާއި ކުންފުނީގެ ހިންގުން ހަރުދަނާ ކުރުމަށް މުވައްޒަފުންދޭ އެއްބާރުލުމަށް ޝުކުރު އަދާކުރާ ކަމަށް އެ ސާކިއުލާގައި ބުނެފައިވެ އެވެ.

"ކުންފުނީގެ އެންމެ އަގުހުރި ރައުސުލްމާލަކީ މުވައްޒަފުންކަމުގައި ބަލައިގަންނަ ހިނދު މުވައްޒަފުންގެ ކަންކަން ދުވަހުން ދުވަހަށް ހަރުދަނާކޮށް ކުރިއެރުވުމަށް ކުރެވެން ހުރި ކަންކަން މެނޭޖުމެންޓުގެ ފަރާތުން އަބަދުވެސް ކުރަމުން ގެންދާނެ ކަމުގެ ޔަގީންކަން އަރުވަމެވެ،" ސާކިއުލާގައިވެ އެވެ.

އެމްޑަބްލިޔޫއެސްސީއަކީ ސަރުކާރުގެ 80 ޕަސެންޓު ހިއްސާ އޮންނައިރު، 20 ޕަސެންޓު ހިއްސާ އޮންނަނީ ޖަޕާނުގެ ހިޓާޗީ ކުންފުނީގަ އެވެ. އެ ކުންފުނީގެ މުވައްޒަފުންނަށް ބޯނަސްގެ ގޮތުގައި ދޭން ކަނޑައަޅާފައި ވަނީ ސާފު ފައިދާގެ އަށް ޕަސެންޓެވެ. އެ ބޯނަސް ދޫކުރަނީ ސްޓާފުންގެ އެޕްރައިޒަލް ހެދުމަށް ފަހު އެވެ.