ލަންޑަން (އޮގަސްޓް 6) - ޗެލްސީ އަށް ގިނަ އަދަދެއްގެ އާ ކުޅުންތެރިން ގަންނަން ފުރުސަތު ލިބެނީ އިނގިރޭސި ޕްރިމިއާ ލީގުގެ ގަވާއިދު ހެދިފައި އޮތް ގޮތުން ކަމަށް ޗެލްސީގެ ކޯޗު އެންޒޯ މަރެސްކާ ބުނެފި އެެވެ.

އެންމެ ފަހުން ހަތަރު ޓްރާންސްފާ މާކެޓްގައި، ޗެލްސީން ވަނީ އާ ކުޅުންތެރިން ގަންނަން އެއް ބިލިއަން ޑޮލަރަށް ވުރެ އިތުރަށް ހަަރަދުކޮށްފަ އެވެ. އެ މުއްދަތުގައި ޗެލްސީން ވަނީ އެ ކްލަބްގެ އެެކެޑަމީ އަށް ނިސްބަތްވާ ގިނަ ކުޅުންތެރިންތަކެއް ވިއްކާލައި، 300 މިލިއަން ޑޮލަރަށް ވުރެ އިތުރު އާމްދަނީއެއް ހޯދައިފަ އެވެ.

ޕްރިމިއާ ލީގުގެ ގަވާއިދު ބުނާގޮތުން، އެކެޑަމީ އަށް ނިސްބަތްވާ ކުޅުންތެރިއަކު ވިއްކާލައިފިނަމަ، އެ ރިކޯޑްކުރެވެނީ، ސައްތަ އިން ސައްތަ ޕްރޮފިޓެއްގެ ގޮތުގަ އެވެ. މާނަ އަކީ، އުސޫލުތަކެއްގެ ތެރެއިން، އާ ކުޅުންތެރިންނަށް ހަރަދުކުރެވޭނެ ދޮރުތަކެއް ހުޅުވުމެވެ.

މަރެސްކާ ބުނީ، ޕްރިމިއާ ލީގުގައި ހެދިފައި އޮތް ގަވާއިދުގެ ތެރެއިން ކަންކަން ކުރަން އުޅޭއިރު، އެއީ ހަަމައެކަނި ޗެލްސީން ކުރާ ކަމެއްގެ ގޮތުގައި ދައްކަން މަސައްކަތްކުރުމަކީ ގޯހެއް ކަމަށެވެ.

"މިއީ ޕްރިމިއާ ލީގުގެ މައްސަލައެއް. ކޮންމެ ކްލަބަކުން ވެސް އެކެޑަމީ ކުޅުންތެރިން ވިއްކާލަން ޖެހޭ ގޮތެއް މި އޮތީ ގަވާއިދު ހެދިފައި. އެހެންވީމަ މިއީ، ހަމައެކަނި ޗެލްސީގެ ކަމެއް ނޫން. މިއީ، ޗެލްސީން އެކަނި ކުރާ ހަރަދެއް ނޫން، ކޮންމެ ބޮޑު ކްލަބެއް ވެސް ކުޅުންތެރިން އެބަގަނޭ، ބައެއް ކްލަބްތައް މަދުން، އަނެއް ބައި ކްލަބްތައް ގިނައިން،" ލެސްޓާ ސިޓީ ދޫކޮށް ޗެލްސީއާ ހަވާލުވި މަރެސްކާ ބުންޏެވެ.

ކުރިން މެންޗެސްޓާ ސިޓީގެ ޔޫތު ޓީމާ އެކު ވެސް މަސައްކަތްކުރި މަރެސްކާ ބުނީ، އެކެޑަމީ ކުޅުންތެރިން ވިއްކައިގެން އެ ލިބޭ ޕްރޮފިޓް ނޫނީ އެޑްވާންޓޭޖް ކަންކަން ބަދަލުވާން ޖެހޭ ކަމަށެެވެ.

"މިއީ ހަމައެކަނި އަހަރެމެންނަށް (ޗެލްސީ އަށް) އަންނަން ވީ ބަދަލެއް ނޫން. އެންމެނަށް ވެސް ބަދަލުގެ ފައިދާކުރާނެ. އިޓަލީގައި އަހަރެމެންނަށް ފެނުނު 20 އަހަރު ވަންދެން ޓޮޓީ އެއް ކްލަބެއްގައި. މިހާރު ވެސް އެ ފަދަ ކަންކަމަށް ތަރުހީބުދޭނެ މީހުން ގިނަވާނެ،" މަރެސްކާ ބުންޏެވެ.

ޗެލްސީން މިހާރު ވިއްކާލަން މަސައްކަތް ކުރަމުން އަންނަ އެކެޑަމީ ކުޅުންތެރިއަކީ ކޮނާ ގެލަގާ އެވެ. ގެލަގާ އަށް ޗެލްސީން ދިނީ ދެ އަހަރުގެ ޑީލެއް، އިތުރު އެއް އަހަރުު ހިމެނޭ ގޮތަށެވެ. އެކަމަކު، ގެލަގާ އެ ޑީލަށް ނުރުހުނީ، މެޗުތަކުގައި ކުޅެވޭނެ ކަމުގެ ޔަގީންކަން ނެތުމުން ކަމަށް މީޑިއާ ތަކުން ރިޕޯޓްކޮށްފައިވެ އެވެ.

"އެއްވެސް ކުޅުންތެރިއަކު އަބަދަކު ޓީމަށް އަރައި ނުއެއް ކުޅޭނެ. އެ ޔަގީންކަމެއް ނުވެސް ދެވޭނެ. އެ ޔަގީންކަން ކުރިން ދީގެން ކަމެއް ކުރުވާނަމަ، އެއީ އެހެން ކުޅުންތެރިންތަކަކަށް އިހުތިރާމް ކުޑަ ކަމެއް،" މަރެސްކާ ބުންޏެވެ.

ޗެލްސީން އަންނަނީ އެތުލެޓިކޯ މެޑްރިޑަށް ގެލަގާ 40 މިލިއަން ޑޮލަރަށް ވިއްކާލުމަށް ފަހު، އެ އަގުގައި، އެތުލެޓިކޯ އަށް ކުޅޭ، ނައިޖީރިއާގެ ފޯވާޑް، ސާމޫ އޮމޮރޮޑިއޯން ގަންނަން މަސައްކަތް ކުރަމުންނެވެ.