ލޯކަލް ގަވަމަންޓް އޮތޯރިޓީ (އެލްޖީއޭ) ގެ ސީއީއޯ ކަމުން ޑރ. މަރިޔަމް ޒުލްފާ ވަކިކޮށް، ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމަށް މިއަދު ބަދަލުކޮށްފި އެވެ.

އެލްޖީއޭގެ ސީއީއޯ ކަމުން ވަކިކޮށް ފޮރިން މިނިސްޓްރީއަށް ބަދަލުކުރިކަން ކަށަވަރުކޮށްދެއްވައި ޒުލްފާ "އަދަދު" އަށް ވިދާޅުވީ އެގޮތަށް ނިންމީ ކީއްވެގެންކަން ނޭނގޭ ކަމަށާއި ނަމަވެސް ރައީސް ޑރ. މުހައްމަދު މުއިއްޒުގެ ކޮންމެ ނިންމެވުމަކަށް އިހުތިރާމް ކުރައްވާނެ ކަމަށެވެ.

"އަޅުގަނޑު މިހުރީ ގައުމުގެ ހިދުމަތުގައި ރައީސުލްޖުމްހޫރިއްޔާ ވިދާޅުވާ ކޮންމެ ކަމެއް ކުރަން ތައްޔާރުވެގެން. އެގޮތުގެ މަތިން ގައުމަށް ހިދުމަތް ކުރަން ވަޑައިގެންނެވި ބޭފުޅުންގެ ތެރޭގައި އަޅުގަނޑު ހިމެނޭ. ރައީސް އޭރުގައި ވިދާޅުވީ މަތީ ތައުލީމު ހާސިލުކޮށްގެން އަދި އެކްސްޕީރިއަންސް ހުރި ބޭފުޅުން ވަޑައިގަތުމަށް މަރުހަބާ ކިޔާނެ ކަމަށް،" ޒުލްފާ ވިދާޅުވި އެވެ.

"އެގޮތުގެ މަތިން އަޅުގަނޑު ވެސް ރައީސް އަރިހުގައި ދަންނަވައިގެން ސީވީ ފޮނުވައިގެން ހިދުމަތް ކުރަން ބޭނުންވި މީހެއް ގޮތަށް ރާއްޖެ އައީ. އައިމަ އަޅުގަނޑަށް ވެސް ފުރުސަތު ދެއްވީ ގައުމަށް ހިދުމަތް ކުރުމުގެ. ވިދާޅުވާ ކޮންމެ ހިދުމަތެއް ކުރުމުގައި އަޅުގަނޑު ދެމިހުންނާނީ،"

ޒުލްފާ އެލްޖީއޭގެ ސީއީއޯގެ މަގާމަށް މިދިޔަ އަހަރުގެ ޑިސެމްބަރު މަހު ރައީސް މުއިއްޒު އައްޔަނުކުރެއްވީ ކުރީ ސަރުކާރުގައި އެ މަގާމުގައި ކުރިން ހުންނެވި އަފްޝަން ލަތީފް އިސްތިއުފާ ދިންތާ ހަތް މަސް ފަހުންނެވެ.

ވެރިކަން ކުރާ ޕާޓީ، ޕީއެންސީއާ ޒުލްފާ ގުޅިވަޑައިގަތީ ރައީސް މުއިއްޒު އިންތިހާބު ކާމިޔާބުކުރެއްވި ފަހުންނެވެ.

ޒުލްފާ ކުރިން ހުންނެވީ އެމްޑީޕީގަ އެވެ. ކުރީގެ ރައީސް މުހައްމަދު ނަޝީދުގެ ވެރިކަމުގައި ކެބިނެޓުގައި ޓޫރިޒަމް މިނިސްޓަރުކަން ވެސް ކުރެއްވި އެވެ. އަދި ނަޝީދުގެ ވެރިކަން ބަދަލުވުމަށް ފަހު، ޒުލްފާ ރާއްޖޭން ބޭރަށް ދިރިއުޅުން ބަދަލުކުރެއްވި އެވެ.

ޒުލްފާ އަކީ ގާނޫނީ ދާއިރާއިންނާއި، އާބަން ޕްލޭނިން އަދި ބިޒްނަސްގެ ދާއިރާއިން މަތީ ތައުލީމް ހާސިލް ކުރައްވާފައިވާ ބޭފުޅެކެވެ.