ހަތަރު އަހަރުގެ މެދުކެނޑުމަކަށް ފަހު، މެލޭޝިއަން އެއާލައިންސްއިން ރާއްޖެއަށް ކުރާ ސީދާ ދަތުރުތައް މިއަދު އަލުން ފަށައިފި އެވެ.

ވެލާނާ އިންޓަނޭޝަނަލް އެއާޕޯޓަށް މިއަދު އައި މެލޭޝިއަން އެއާލައިންސްގެ ފްލައިޓަށް އެއާޕޯޓުން މަރުހަބާ ވިދާޅުވީ ޓްރާންސްޕޯޓް މިނިސްޓަރު މުހައްމަދު އަމީނާއި މޯލްޑިވްސް އެއާޕޯޓްސް ކޮމްޕެނީގެ އެމްޑީ އިބްރާހިމް ޝަރީފު މުހައްމަދެވެ.

ދަތުރުތައް އަލުން ފެށުމާ ގުޅޭގޮތުން މެލޭޝިއަން އެވިއޭޝަން ގްރޫޕްގެ ސީއީއޯ އަހުމަދު ލުގްމާން މުހައްމަދު އަޒްމީ ބުނީ ރާއްޖެއަށް ދަތުރުތައް ފެށުމަކީ މުޅި ދުނިޔެ މެލޭޝިއަން އެއާލައިނުން ގުޅުވާލުމަށް ކުރެވުމުންދާ މަސައްކަތްތަކުގެ ތެރެއިން ކުރެވުނު މުހިންމު ކަމެއް ކަމަށެވެ.

މެލޭޝިއަން އެއާލައިންސްގެ ފްލައިޓްތައް ރާއްޖެއަށް ފެށުމާއެކު އެ ގައުމުގެ ޓޫރިސްޓުންނަށް ރާއްޖެ އަންނަން ފަސޭހަ ވެގެންދާނެ އެވެ. އެ ގައުމުން މިދިޔަ އަހަރު އެކަނި ވެސް 13،000 އަށްވުރެ ގިނަ ޓޫރިސްޓުން ރާއްޖެ ޒިޔާރަތްކުރި އެވެ.

މެލޭޝިއަން އެއާލައިންސްއިން އެންމެ ފަހުން ރާއްޖެއަށް ސީދާ ދަތުރުތައް ކޮށްފައި ވަނީ 2019 ގަ އެވެ.

ރާއްޖެއަކީ މެލޭޝިއަން އެއާލައިންސްއިން ދެކުނު އޭޝިއާގައި ދަތުރުތައް ފެށި 13 ވަނަ ގައުމެވެ. އެ ގައުމުން އަންނަނީ އިތުރު އެހެން ގައުމުތަކަށް ވެސް ދަތުރުތައް ފެށުމަށް ތައްޔާރުވަމުންނެވެ.

އެގޮތުން އެ އެއާލައިނުން އޯގަސްޓް، 15 ގައި ތައިލެންޑްގެ ޗިއަންގް މައި އަދި ސެޕްޓެމްބަރު، 24 ގައި ވިއެޓްނާމްގެ ޑަނަންގްއަށް ވެސް ދަތުރުތައް ފެށުމަށް ވަނީ ހަމަޖެހިފަ އެވެ.