ޅ. ނައިފަރު މަދްރަސަތުލް އިފްތިތާހުގެ ބެލެނިވެރިން މިއަދު ހެނދުނުން އިހުތިޖާޖުކުރަން ފަށައިފި އެވެ.

އެ ސްކޫލުގެ ބޭރުގައި އަދި ޖެންޑާ ކައިރީ ބެލެނިވެރިން އިހުތިޖާޖު ކުރަމުންދަނީ އެކި ޝުއޫރުތައް ލިޔެފައިވާ ބޯޑުތައް ހިފައިގެންނެވެ. އެ އިހުތިޖާޖުގައި ގިނައިން ބައިވެރިވަނީ އަންހެން ބެލެނިވެރިންނެވެ.

"އަދަދު" އާ ވާހަކަ ދައްކަމުން އެ ސްކޫލުގެ ބެލެނިވެރިޔަކު ބުނީ އިހުތިޖާޖު ކުރަމުންދަނީ އެ ސްކޫލުގެ އިސްލާމް ޓީޗަރަށް ކުރެވޭ ތުހުމަތަކާ ކަމަށާއި ބެލެނިވެރިން ގޮވާލަމުންދަނީ އޭނާ ސްކޫލުގައި ކިޔަވައި ނުދޭން ކަމަށެވެ.

"އިސްލާމް ޓީޗަރު ރަށު ތެރޭ އެކި މީހުންނާއެކު ޒިނޭ ކުރާކަމުގެ ތުހުމަތުތަކެއް އެބަ ކުރެވޭ. އެކަން ފަޅާ އެރީމަ މި އިހުތިޖާޖު ކުރަނީ. އޭނާ ސްކޫލުގައި ބަހައްޓަން އަޅުއގަނޑުމެން ބޭނުމެއް ނުވޭ،" އޭނާ ބުންޏެވެ.

ބެލެނިވެރިޔާ ބުނީ ފުލުހުން ވަނީ އިސްލާމް ޓީޗަރަށް ހިމާޔަތްދީ ސްކޫލުން ނެރެގެން ގޮސްފައި ކަމަށާއި މިހާރު އިހުތިޖާޖު ކުރަމުންދަނީ ޖެންޑާ ކައިރީ ކަމަށެވެ.

އިސްލާމް ޓީޗަރު ސްކޫލުގައި ކިޔަވައިދޭން ބެލެނިވެރިން ބޭނުން ނުވާ ކަމަށާއި އެދުމަކީ ސްކޫލުން އޭނާ ވަކި ކުރުން ކަމަށް ބެލެނިވެރިން ބުނެ އެވެ.