ޔޫރަޕްގެ ގައުމުތަކުގައި ބޭނުން ކުރުމަށް އެ ގައުމުތަކުގެ ސިއްހީ އިދާރާތަކުން ހުއްދަ ދީފައިވާ ކޮލިޓީ ބޭސްތައް ގަނޑުކޮށް ރާއްޖެ ގެނައުމުގެ މަސައްކަތް ފަށައި ފުރަތަމަ މަރުހަލާއަށް ހަތް ބޭހެއް ގަނޑުކޮށް އެތެރެކޮށް ވިއްކަން ފަށައިފި އެވެ.

މި ކަން އިއުލާންކޮށް ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އާއި، ދައުލަތުގެ ހެލްތު އިންޝުއަރެންސް ހިންގާ އާސަންދަ ކުންފުންޏާއި ފުޑް އެންޑް ޑްރަގް އޮތޯރިޓީއާއި، ފިނޭންސް މިނިސްޓްރީއާއި، ހެލްތު މިނިސްޓްރީ، އަދި އެސްޓީއޯ ގުޅިގެން ޖޮއިންޓް ސްޓޭޓްމަންޓެއް ނެރެފަ އެވެ.

އެ ސްޓޭޓްމަންޓްގައި ވެސް ބުނެފައިވާ ގޮތުން ރައީސް ޑރ. މުހައްމަދު މުއިއްޒުގެ ކެބިނެޓުން ފާސްކޮށް ނިންމަވާފައިވާ އާ ސިޔާސަތުގެ ދަށުން ރާއްޖެ އެތެރެކޮށް ބޭނުން ކުރެވޭނީ ޔޫރަޕްގެ ގައުމުތަކުގައި ބޭނުން ކުރުމަށް އެ ގައުމުތަކުގެ ސިއްހީ އިދާރާތަކުން ހުއްދަ ދީފައިވާ ކޮލިޓީ ބޭސް އެކަންޏެވެ.

މި ސިޔާސަތު ތަންފީޒު ކުރުމުގެ މަސައްކަތް މިއަދުން ފެށިގެން ފަށާފައިވާ ކަމަށް ޖޮއިންޓް ސްޓޭޓްމަންޓްގައިވެ އެވެ. އެ ގޮތުން ދެ މަރުހަލާއަކަށް ބަހާލައިގެން، އެސްޓީއޯއިން ރީޓެއިލްކޮށް އަދި ހޯލްސޭލްކޮށް އެ ބޭސްތައް ވިއްކަން ނިންމާފައިވާ ކަމަށާއި ފުރަތަމަ ތައާރަފު ކުރެވޭ ހަތް ބޭސް މިހާރު ލިބެން ހުންނާނެ ކަމަށް އޭގައި ބުނެފައިވެ އެވެ.

ސިޔާސަތަށް ގެނެވުނު މި ބަދަލާ ގުޅޭ ގޮތުން ސިއްހީ ދާއިރާގައި މަސައްކަތްކުރާ ހުރިހާ ޑޮކްޓަރުންނަށް ވެސް ފޯރުކޮށްދެވިފައިވާ ކަމަށް ބަޔާނުގައިވެ އެވެ. އަދި ބަދަލަށް އަހުލުވެރިވެ ތައްޔާރުވުމަށް ބޭނުންވާ ފަރާތްތަކަށް އެކަށޭނަ ވަގުތު ދިނުމުގެ ގޮތުން އަންނަ އޮކްޓޯބަރު މަހާ ހަމައަށް އަހުލުވެރި ކުރުމުގެ ޕްރޮގްރާމްތައް ހިންގާނެ ކަމަށް ބަޔާނުގައި ބުނެފައިވެ އެވެ.

މިހާރު އެތެރެކޮށްފައިވާ ބޭސްތަކުގެ ފުލް ކަވަރޭޖް އާސަންދަ ހިދުމަތުން ލިބޭނެ ކަމަށް ވެސް ބަޔާނުގައި ބުނެފައިވެ އެވެ.